راپەرینێكی پیرۆز بەڵام ئاكامێكی رەشسیامه‌ند


ڕاپەرینێكی پیرۆز بەڵام ئاكامێكی ڕەش


سیامەند


هەر كات یادی سەركەوتنی راپەڕینی خەڵكی ئێران دژ بە رژیمی شاهەنشاهی دەكرێتەوە، ئەو پرسیارە دێتە پێش كە ئایا ئەو ڕاپەڕنە كارێكی پێویست بوو؟ وەلامی ئەو پرسیارە لە لای زۆر كەس ئەوەیە كە ئینقلاب لە دژی حكومەتی شاهەنشایی شتێكی پێویست و زەرورەتێكی مێژوویی بوو، بەڵام ئەگەر چاوێك بە ئاكامی ئەو ڕاپەڕینەداو ئاسەوارە زیانبارەكانی ئەو شۆڕشە مێژوویە بگێڕین بۆمان دەردەكەوێ‌ كە ئاكامێكی پڕ لە نەگبەتی، تاڵی،جەنگ، وێرانی،خۆێن ڕشتن و داڕمانی ئەوەی چاك و بە كەڵك بوو لە ئێراندا، لە گەڵ ئەو ڕاستیەی رژیمی شا دزو گەندەڵ و دژە مرۆف بوو.


لە ئێستادا شاهیدی سەرهەڵدانی هەلو مەرج و دۆخێكین كە تەنیا دوو دوژمن بە یەك خوازیارن بەرانبەر بە تەرەفەكەی بێتە دیی. خەڵكی ئێران كەی چاوەڕی ئەوەی دەكرد بەریی رەنج و فیداكاری، ئازاری چەندین ساڵە، قوربانی و جەرگ سووتانی دایكان و باوكان ببیتە بڵقی سەر ئاو وە تەنیا ئاخوندە ملهوڕەكان و دەست و پێوەندەكانیان لەو ئێرانەدا دڵخۆش بن و ئەوەی خێرە بیبەن بۆ خۆیان و شەڕو ماڵوێرانیش بە نسیبی خەڵكی ئێران بكەن.


چل ساڵی تەواوە ئێران كەوتۆتە داوی دەستەیەك ئاخوندی دواكەوتووی هیچ نەزان،كە دواكەوتوانەترین سیستمی حوكمڕانیان لە ئێراندا بە فێڵ و چاوبەست لە جەماوەرو هەروەها بە هاوكاریی ووڵاتانی خاوەن هێزی جیهان دامەزراندوە.ووڵاتانی خاوەن هیزی جیهان دڵخۆش بوون بە دەسەڵات وحكومەتێكی مەزهەبی لە ئێراندا كە بە خەیاڵی خۆیان ئەو حكومەتە مەزهەبیە رێگە لە پەرە گرتن و پەلكێشان و كاریگەری حكومەتی كۆمارەكانی سوسیالیستی شۆرەوی بۆ ناوچەی خۆرهەڵاتی ناوەڕاست بگرێ‌، هەر بەو بیركردنەوە هەڵەو نابەجێ‌ یەیان رێگەیان خۆش كردبۆ بەدەستەوە گرتنی دەسەڵات لە لایەن خومەینی و دەست و پێوەندەكانی. بەڵام نەك بیركردنەوەی ووڵاتانی ڕۆژئاوایی ئانجەكانیان نەهاتە دیی بەڵكو رژیمی خومەینی نەك بوو بە بەڵاو نەگبەتی بۆ خەڵكی ئێران بەڵكوو بووە هۆی ئاژاوە، ترۆر،وێرانی و كێشە لە خۆرهەلاتی ناوەڕاست و سەرانسەریی جیهاندا. لە ماوەی چل ساڵ حوكمڕانی دواكەوتنانەی ئاخوندەكان، ئەو ڕژیمە لە ئێستادا بۆتە گەورەترین كێشە بۆ كۆمەڵگای مرۆفایەتی،ئێرنی كردۆتە بنكەو سەرچاوەری ترۆریستی لە جیهان و بەئامانجە شەڕخوازیەكانی و هەوڵەكانی بۆ دروست كردنی بۆمبی ئەتۆم و پەرەپێدان بە توانای مووشەكی هێرشبەرو چەك و تەقەمەنی قەدەغەكراو بە یەكجاری هیواو ئامانجی ووڵاتانی ڕۆژئاوایی كردە بڵقی سەر ئاو بەڵكوو بوو بە هەڕەشەی جیددی بۆ سە ئامانجی ووڵاتانی ڕۆژئاوایی ودروست كردنی مەترسی بۆ سەر ئیسرائیل و ووڵاتانی عەرەب لە ناوچەكەدا.


بە داخەوە چۆن لە سەرەتاوە ووڵاتانی ڕۆژئاوایی لە هەڵسەنگاندن و بەراوردەكانیان لەسەر ڕژیمی خومەینی هەڵەیان كرد،لە ئێستاشداو دروست لە دوای چل ساڵ حوكمڕانی مەترسیداری ئاخوندەكان و سەرەڕای ئەوەی بە ڕوونی ئەو مەترسیانە دیارن،بەو حاڵەش بەشێك لە وولاتانی ڕۆژئاوایی هەر بەردەوامن لە خۆش خەیاڵی و بەو هومێدەن رژێمی ئاخوندی ئەو ئامانجانەیان بۆ بەدیی بێنێ‌ كەبە ئاشكرا دیارە بۆیان بە دیی ناهێنێ‌. بێگومان ووڵاتانی خاوەن هێزی جیهان ناڕاستەوخۆ بەرپرسن لەو گشتە مەینەتیەی كە خەڵكی ئێران بە هۆی حوكمرانی ئاخوندەكانەوە تووشیان هاتوە، هەر خۆشیان بەرپرسن لە ئاكامە خراپەكانی ئەو پشتیوانیانەی كردیان لە بەدەسەڵات گەیشتنی خومەینی و هەروەها بەردەوام بوونی حكومەتی دیكتاتۆرو خۆێن ڕێژ لە ئێراندا. ئێستا كە یادی چل ساڵەی سەركەوتنی راپەڕینی ڕەوا لە دژی حكومەتی شاهەنشاهی دەكەینەوە، ئەو حكومەتەی كە جینایەتی زۆری لە دژی خەڵكی ئێران و بەتایبەت گەلی كورد كرد، بەلام بێگومان هیچ كات ستەم و بێدادیەكانی حكومەتی شا بە رادەی حكومەتی ئاخوندان بەربڵاو هەمەچەشنە نەبوو.ئاشكرایە ئەو ستەمانەی كە ئاخوندان لەماوەی 40 ساڵ بەرانبەر بە خەڵكی ئێران و خەڵكی كوردستان كردیان بە ڕادەیەك زۆرو بێ‌ بەزییانە بوون وبەردەوامن كە ستەمی حكومەتی دیكتاتۆری شاهەنشاهی پەراوێزخستوەو هەروەها ئاكامی ئینقلاب و شۆرشە گەورەكەی ساڵی 1357 كۆچی خۆری تاڵ كردوە وەك زەقنەبووت.
ڕێکه‌وت: 2019-02-13 22:07:43
به‌شی ( سیاسی )







سیاسی