چینیش كرینی نەوتی لەئێران راگرت  

 زۆربەی كریارانی چینی هاوردەی نەوتی خۆیان لە ئێران راگرت.
بەپێی راپۆرتی هەواڵدەری رۆیتەرز، هەردوو شیركەتی گەورەی دەوڵەتی چین؛ شیركەتی پترۆشیمی سیناپێكی چینی و شیركەتی میللی نەوتی چینی ناسراو بە(سی ئێن پی سی)، كە گەورەترین پاڵاوگەی نەوتی ئەو وڵاتەیان تێدایە، لەمانگی رابردوی میلادی دا لەكرینی نەوت لە ئێران خۆیان بوارد.
ئەمەش بەهۆی نیگەرانی ئەو دوو شیركەتە گەورەی چین لە گەرانەوەی دەوری دووهەمی گەمارۆكانی ئامریكا بۆسەر ئێران بووە، دوای ئەوەی كە ئامریكا لێخۆشبوونی چین و 7 وڵاتی دیكەی لە گەمارۆكان لە دەستپێكی مانگی زایینی تازە نوێ‌ نەكردەوە.
بەپێی سەرچاوە چینیەكان، ئەو وڵاتە لەماوەی 4 مانگی یەكەمی ساڵی زایینی، گەورەترین كریاری نەوتی وڵاتی ئێران بووە و رۆژانە 475 هەزار بۆشكە نەوتی ئێران هەناردەی وڵاتی چین كراوە.
بەڵام هەواڵدەری رۆیتەرز لەزاری سەرچاوەیەكەوە ئاماژەی بەوە كردووە كە شیركەتی سیناپێك كە گەورەترین هاوردەكەری نەوتی ئێران بووە، هیچ نەوتكێشێكی بۆ مانگی مەی پێشوەختە داوا نەكردووە.
رۆیتەرز هەروەها دەڵێت، لە نێوان پێنج نەوتكێشی گەورە كە لەمانگی ئاوریل دا نەوتی ئێرانیان بۆ چین دەبرد، 2 دانەیان بەتاڵ كراون و 3 نەوتكێشی تریش لە بەندەرەكانی چین چاوەرێن.

 

 
ڕێکه‌وت: 2019-05-11 21:10:51
به‌شی ( هه‌واڵی ئێران )







سیاسی