راگەیەندراوی كومیتەی ناوەندی سازمانی خەبات بە بۆنەی نۆیەمین ساڵرۆژی كۆچی دوایی كوردستانیانی نیشتمانپەروەر!
خەباتگێڕانی رێی رزگاری نەتەوە و نیشتمان!
دۆست و ئەندامانی دڵسۆزی رێبازی مامۆستا شێخ جەلال حسێنی
نۆساڵ لەوەپێش و لە 30ی پووشپەڕی 1389ی هەتاوی، مامۆستا سەید جەلالی حسێنی یەكێك لە رێبەرانی نەتەوەیی كورد و دامەزرێنەری سازمانی خەباتی كوردستانی ئێران، لە دوای زیاتر لەدواى 65 ساڵ خەبات و تێكۆشان لە پێناو رزگاری كورد و كوردستان دا، بەداخەوە لە 30ی پوشپەر كۆچی دوایی كرد و رێ و رێبازەكەی بە كورد و رێبوارانی سازمانی خەبات سپارد. مامۆستا شیخ جەلال حسێنی، لە هەڕەتی مێرمنداڵیەوە بە هۆی هەستی خۆشەویستی و دڵسۆزی بۆ نەتەوەكەی بووە ئەندامی كۆمەڵەی ژێكاف و وەك كوردێكی دڵسۆز لە كۆماری كوردستاندا دەوری بینی، لە دوای كۆماری كوردستانیش هەمیشە هومێدوار بوو بە سەرهەڵدانەوەی شۆرش لە كوردستان بۆ وەدیهێنانی مافە نەتەوەییەكان و بەرەنگاربوونەوەی رژیمی پاشایەتی.
مامۆستای نەمر، هەمیشە پشتیوانی خەڵكی زەحمەتكێش و بەشمەینەتی كوردستان بووە و ئەوەندەی بۆی كراوە هەوڵی داوە دژی هەموو زوڵم و زۆرێك بوەستێتەوە، لە راپەڕین و رابوونە یەك لە دوای یەكەكانی كوردستانی ئێران، پشتیوانی شۆرشگێڕان بووە و هەروەها بە شێعر و پەخشان و نووسین هەستی خۆی بۆ نیشتمان و نەتەوەو ئازادی دەربریوە و هەمیشە تێكۆشاوە بۆ هاتنە دیی ئازادیی و دادگەری لەو سەردەمەدا كە زوڵم و زۆری خانەوادەی پەهلەوی وەڵاتی لە خەڵكەكەی كردبووە زیندان، جەماوەری ئێران راپەرین و خرۆشان، مامۆستا وەك پێشەوا و رێبەرێك لە شاری بانە و شارەكانی دیكەی کوردستان، پێش جەماوەر كەوت و سەركرایەتی راپەرینی لە كوردستان گرتە ئەستۆ و تا روخانی یەكجاری رژیمی شا درێژەی بە ئەركی پیرۆزی رێبەری جەماوەر دا. لە دوای روخانی دەسەڵاتی شا و بە دەسەڵات گەیشتنی خومەینی، مامۆستا لە شاری بانە شۆرایەكی بۆ بەرێوەبەری كار و باری خەڵك دامەزراند و كاری جیددی بۆ رێكخستنی هێزی پێشمەرگە بە مەبەستی پاراستن و پشتیوانی لە خەڵكی كوردستان كرد. لەكاتی وتووێژەكانی نێوان كورد و نوێنەری حكومەتی نوێ لە ئێران، مامۆستا سەید جەلال یەكێك بوو لە بەشداربووانی كۆبوونەوەی مەهاباد و بۆ وتووێژ لەگەڵ داریوشی
فروهەر و هەیئەتەکەی. مامۆستا شێخ جەلالی نەمر لە كاتی بشێویەكانی شاری سنەدا و هەوڵەكان بۆ چارەسەر و رێكەوتن لەگەڵ حكومەت، یەكێك بوو لە رێبەرانی كورد بۆ چارەسەری ئەو كێشانەی روویاندابوو و لە رێكەوتن لەگەڵ تاڵەقانی و دانانی ئیبراهیمی یونسی بە پارێزگاری سنە دەوری كاریگەری بینی.
مامۆستا و رێبەری پایەبەرزی نەتەوەكەمان، هاوڕێ لەگەڵ مامۆستا شێخ عزەدین و مامۆستا عەبدولرەحمانی زەبێحی لە ساڵی 1358ی هەتاوی، هەوڵی دامەزرانەوەی تەشكیلاتێكی نەتەوەیی و نیشتمانیاندا، بەڵام بەهۆی هەندێ كێشە لەلایەن نەیارانەوە پێكهاتنی ئەو تەشكیلاتە سیاسیە كە گەلێك گاریگەریی لە سەر ڕەوتی روداوەكان دەبوو سەری نەگرت، لە دوای گەرانەوەی عەبدولرەحمانی زەبێحی بۆ عێراق و بێ سەرووشوێن بوونی، مامۆستا شێخ جەلال لەگەڵ كۆمەڵێك لە كەسایەتیە تێكۆشەر و دڵسۆزەكانی هاوڕێی، دەفتەری مامۆستا شێخ عزەدینیان دامەزراند و لە چوارچێوەی ئەو دەفتەرەدا كاروچالاكی سیاسی و پێشمەرگانەیان دەكرد.
لەكاتی كێشەی نێوان دەرەبەگ و رەعیەتەكانی ناوچەی دیواندەرە و تیلەكۆ دا، مامۆستا سەید جەلال بە بەردەوامی هەوڵی چارەسەر و هێوركردنەوەی ئاڵۆزیەكانی دەدا بۆ ئەوەی ئەو كێشانە لەو دۆخەدا لەلایەن رژیمی تارانەوە كەڵكیان لێوەرنەگیرێ و نەتوانن لەو رێگەوە درز و كەلێن بخەنە نێو ریزەكانی گەلەوە. لەدوای ئەوەی رژیمی خومەینی كەوتە بیانووگرتن و هەڕەشە بۆ سەر گەلی كورد، مامۆستا شار بە شار و ناوچە بە ناوچەی كوردستانی ئێران بەتایبەت بەشی باشوور، دەگەرا و بە گرتنی كۆروكۆبوونەوە و میتینگ جەماوەری لە رووداوەكان و ئەگەرەكان و سیاسەتەكانی رژیمی نوێ ئاگادار دەكردەوە.
لە دوای رووداوەكانی ساڵی 1358ـــ 1359ی هەتاوی، مامۆستا سەید جەلال لەگەڵ كۆمەڵێك لە هاوڕێ و هاوبیر و كەسایەتیە دیارەكانی كوردستان بیریان لە دامەزرانی تەشكیلاتێكی سیاسی ئەوتۆ كردەوە كە بتوانن زۆرترین رێژەی خەڵكی تێدا رێکبخەن بە مەبەستی بەرةنگاربوونەوەی هێزەكانی رژیم و پێشخستنی بزوتنەوەی كوردستان و هێنانەدیی ئاوات وگەیشتن بە مافە بنەڕەتیەكانی نەتەوەكەمان، هەر بۆیە لە پێنجی خەرمانانی 1359ی هەتاوی سازمانی خەباتی كوردستانی ئێرانی دامەزراند كە هاوكات بوو لەگەڵ هێرش و پەلاماری هێزە دژە مرۆییەكانی رژیمی خومەینی بۆ سەر كوردستان. مامۆستای نەمر وەك سكرتێری گشتی سازمانی خەبات لە بەرامبەر هێزە داگیركەرەكانی رژیمی ئاخوندی و پەلاماری نەیارانی نێوخۆیی، زۆرترین ئەركی گرتەئەستۆ و بە ماڵ و گیان و بەو پەڕی دڵسۆزی و فیداكاریەوە درێژەی بە خەبات دا. لە كاتێكدا یادی نۆیەمین ساڵرۆژی كۆچی دوایی مامۆستا سەید جەلالی حسیَنی رێبەری فیداكار و كەم وێنەی نەتەوەی كورد دەكەینەوە، كە رێبازەكەی بە شێوەیەكی بەرچاو لە گەشەدایە و لە باكوور بۆ باشوری كوردستانی ئێران خاوەن پێگەیەكی بەرین و پتەوی جەماوەریە و پۆل پۆل كوڕان و كچانی نیشتمان رووی تێدەكەن و درێژە بە خەبات بۆ رزگاری كوردستان لە پیناو وەدیهێنانی مافە بنچینەییەكانی نەتەوەی كورد دەدەن. سازمانی خەبات لە هەركاتێكی دیكە شێلگیرانەتر و بە جیددیەتی زیاترەوە لە پێناو هێنانەدیی هيواو و ئاواتەكانی مامۆستای نەمر كار دەكا و بۆ سەرخستنی سیاسەت و بەرنامە شۆرشگێڕیەكانی تێدەكۆشێ و كار لەسەر پەرەپێدانی بیری نەتەوەیی و كۆكردنەوەی هەموو هێز و وزەكان بۆ رزگاری نەتەوەو ونیشتمان دەدات، ئەو هەنگاوانەشی رۆژ لە دوای رۆژ زیاتر لەلایەن كۆمەڵانی خەڵكی كوردستانەوە پێشوازی لێ دەكرێ.
یاد و ناوی مامۆستا سەید جەلالی حسیَنی رێبەری خەڵكی و راستگۆ و دڵسۆز و فيداكاری نەتەوەكەمان بەرز و پیرۆز بێ.
هەر شەكاوە بێ ئاڵای سازمانی خەباتی كوردستانی ئێران.
سەركەوێ خەباتی نەتەوەیی كورد و ئازادیخوازان لە ئێران دا.
كۆمیتەی ناوەندی سازمانی خەباتی كوردستانی ئێران.

 

 

 

 

 

 
ڕێکه‌وت: 2019-07-19 09:38:43
به‌شی ( به‌یاننامه‌کان )







سیاسی