خۆپیشاندانی ئێرانیانی ئازاد دژ به‌ ڕژیم له ستۆکهۆڵم

رۆژی شەممە 20ی ژولای 2019 بەرامبەر بە 29ی پووشپەڕی 1398، لەسەر بانگهێشتی سازمانی موجاهیدینی خەڵكی ئێران و شۆرای مقاومەت ژمارەیەكی بەرچاو لە بەرپرسان و ئەندامانی سازمانی خەبات لە وەڵاتانی سكاندیناوی بەشداریان لە كۆبوونەوەیەكی بەرینی جەماوەری كرد كە بۆ پشتیوانی لە خەبات و خۆراگری خەڵكی ئێران و بزوتنەوەی شۆرشگێڕانە تا روخانی دەسەڵاتی ئاخوندی. لەو گۆدبوونەوە جەماوەریەدا ژمارەیەكی بەرچاو لە كەسایەتی سیاسی و ئەندامانی پارڵمانی وەڵاتانی سكاندیناوی بەشدار بوون و وتاریان پێشكەش كرد، پشتیوانی خۆیان بۆ خەباتی رەوای خەڵكی ئێران لە پێناو روخان و نەمانی رژیمی دیكتاتۆری ئاخوندی و بەرنامەكانی شۆرای ملی مقاومەت و خانم مریەم رەجەوی دووپات كردەوە و داوایان لە وەڵاتەكانیان كرد كۆتایی بێنن بە پشتگوێ خستنی ویستی خەڵكی ئێران بۆ ئازادی و سیاسەتی قازانج خوازی لەگەڵ رژیمی دیكتاتۆری ئاخوندی. ئه‌و خوازیاری پشتیوانی و بە رەسمی ناسینی شۆرای ملی مقاومەت وەك تاكە ئاڵترناتیوی دیموكراتیكی رژیمی ئێران بوو. كاك رێبواری حوسێنی ئەندامی دەفتەری سیاسی سازمانی خەبات وتارێكی بە هەردوو زمانی فارسی و كوردی پێشكەش كرد. بەرێزیان لە وتەكانی دا تیشكی خستەسەر سیاسەتەكانی سازمانی خەبات دژ بە رژیمی ئاخوندی و وتی: ئێمە وەكوو سازمانی خەباتی كوردستانی ئێران لە مەیدانی خەبات دژ بە رژیمی دیكتاتۆری و مەزهەبی ئاخوندی لە ئێران زیاتر لە چل ساڵە بە كردەوە لە مەیدانی خەبات و شۆرشدا بووین و هەین لەسەر خەبات و هاوئاهەنگی لەگەڵ ئێوە پشتیوانانی مقاومەتی ئێران شانازی دەكەین. ئێمە چل ساڵە بە تەواوی جیهان دەڵێین ئەو رژیمە دژی دیموكراسی، دژی ئازادی، دژی مرۆڤایەتی و ماڤی مرۆڤە و دەبێ بروا و دەبێ لە دژی خەبات بكرێ. ئێمە خەباتمان كرد و درێژەمان پێ داو هەتا رۆژی سەركەوتن درێژەی پێ دەدەین. بەرێز حوسێنی لە بەشێكی دیكەی وتارەكەیدا روو بە وەڵاتانی ئوروپایی وتی: ئێوەی ئوروپایی لەگەڵ ئێمە دروشمتان دا، هاودەردیتان لەگەڵ كردین، ئیتر كاتی ئەوەیە بە كردەوە پشتیوانیمان لێ بكەن، هەنگاوێك زیاتر لە دروشم هەڵێنن، لەم كاتەدا كە رژیمی ئێران لەسەر لێواری روخانە و جیهان پرۆتستۆی دەكات و وەك بوونەوەرێكی مەترسیدار لە قەفەسێكی بچوكیان هاویشتووە، رێكەوتن و وتووێژ و سات و سەودا جوێ لە كات كوشتن و پەشیمانی، ئاكامێكی نابێ. ئێمە رێبوارانی سازمانی خەباتی كوردستانی ئێران، قوتابی و شاگرد و رێبوارانی عەلمامەی نێوداری نەتەوەی كورد، مەرحوم مامۆستا سەید جەلال حوسێنین كە ئەمرۆ نۆهەمین ساڵی كۆچی دوایی بەرز رادەگرین و درود بۆ رەوانی پاكی، ئەو رێی خەباتی لە سەرەتاوە دژ بەو دەسەڵاتە تا ئاخر رۆژی سەركەوتن نیشان داوین. دڵنیا بن ئێمە ئەگەر بە تەنیایش لە مەیدانی خەبات بمێنن، ئەو رێگەیە بە گیان و دڵ درێژە پێ دەدەین و پشتویانی مقاومەتی ئێران و رێی روخانی رژیم و دژی هەر جۆرە وتووێژ و موزاكرەیەك لەگەڵ ئەو رژیمە دەوێستینەوە. كاك رێبوار لە درێژەدا ئیشارەی بە خەبات و ماندوو بوونی نەتەوەی كورد كرد وتی: خەڵكی كورد بە درێژایی ئەم 40 ساڵە خەباتی كرد و خوێنی دا و ئەشكەنجەی بینی بەڵام كۆڵی نەدا. خەڵكی كورد پاداشی خەبات و خوێنی رۆڵەكانی بە دانیشتن و وتووێژ لەگەڵ دژمنانی میللەتەكەی ناوێ، خەڵكی كورد خەباتی دەوێ تا رۆژی روخانی ئەو دەسەڵاتە. ئێمە وەك ئەندام و لایەنگر و پێشمەرگەكانی سازمانی خەبات، خەباتمان بۆ رزگاری گەلی كورد و بۆ بەدەستهێنانی مافی گەلی كورد لە چوارچێوەی ئێرانێكی دیموكراتیك كە جیوازی دەوڵەت لە دین، سێكۆلار و پارلەمانی كە مافی هەموو نەتەوەكانی ئێران وەك یەك بناسێ و هەموو ناوچەكانی ئێران وەك یەك چاو لێبكات، بۆ ئەوەش خەباتمان كردووە و خوێنمان بۆ داوەو خوێن دەدەین و خەباتی بۆ دەكەین.
ڕێکه‌وت: 2019-07-21 23:43:26
به‌شی ( چالاکیه‌کان )







سیاسی