له‌سه‌رهێل 94
سێ‌شه‌مه 17 پووشپه‌ڕ 2720
سازمانی خه‌باتی کوردستانی ئێران
كۆماریی یا دیكتاتۆری؟

نووسینی بابەشێخ حسینی

چەند ڕۆژ لەوە پێش ئاخوند حەسەن روحانی لە كۆبونەوە لە گەڵ ئوستانداران و فەرماندارەكانی پاریزگاو شارەكانی ئێران باسی لە هەلومەرجی ئاڵۆزی هەڵبژاردن و ئەو كۆسپ و ڕێگریانە كرد كە لە لایەن باڵی دەست ڕۆیشتوو بە سەرۆكایەتی خامنەیی دەخرێتە بەردەم پاڵێوراوانی باندی بە ناو ڕیفۆرمخواز.

ڕۆحانی لە قسەكانیدا باسی لە ڕەدكردنەوەی پاڵێوراوانی لایەنگری خۆی، بۆ شانۆی هەڵبژاردنی مەجلیس كردو ڕایگەیاند كە ئەگەر ئەو شێوە هەڵس و كەوت و ڕێگریانە بەردەوام بێ‌،  ناڕەزایەتیەكان پەرە دەستێنێ‌ و هەروەها كۆماریی بوون(جمهوریەت)، كە لە قانوونی ئەساسیدا پەسەند كراوە، دەكەوێتەژێر پرسیار.

 ئاخوند روحانی بەباس كردنی بنەماكانی  قانوونی ئەساسی ڕژیم لە پێوەند بە كۆماریی بوونی دەسەڵات، وە هەڕەشەكانی باڵی دەست ڕۆیشتوو لە سەر یاسای بنەڕەتی، هەوڵیدا ئەوە بگەێنێ‌ كە لایەنگرانی خامنەیی وبە تایبەتی شۆڕای نیگەهبان، پێشێلی قانوونی بنەڕەتی وولات دەكەن، وە ئەو پێشێلكاریانەش پێچەوانەی یاسایە، كە لە بنەڕەتدا قانونی ئەساسی دواكەوتوانەیەو سەرەرای دواكەوتوانە بوونیشی لە لایەن تێكڕای پێكهاتەی دەسەڵاتەوە پێشێل دەكرێ‌.

 ئەگەر چی ڕۆحانی ڕاستەوخۆ هێرشی نەكردە سەر خامنەیی و لە قسەكانیدا ووتی، تەنانەت ڕێبەر پێ‌ شێلكردنی قانونی ئەساسی پێ‌ دروست نیە. بەڵام  ڕۆحانی لە هێرش كردن بۆ سەر شۆڕای نیگەهبان، ئامانجی ئەوە بوو ناڕاستەوخۆ  هێرش بكاتە سەر خامنەیی.

 قسەكانی ڕۆحانی لەو كۆبونەوەدا جیاواز لە هێرش بۆ سەر باڵی دەست ڕۆیشتووی دەسەلات و خامنەیی، هەوڵیش بوو بۆ گەرم داهێنانی شانۆی هەڵبژاردنی مەجلیسی ڕژیم، بەو بیانوەی كە بە ناو بەرەی چاكسازی و جمهوریەت و كۆماریخوازیی لە مەترسیدایەو، ئەگەر خەڵك بەشداری چالاكانەیان لە شانۆی هەڵبژاردن ببێ‌ و بچنە سەر سندوقەكانی دەنگدان، ئەو كات دەسەڵات بەرەو ڕیفۆرم و چاكسازی هەنگاو دەنێ‌. چاكسازی و ڕیفۆرمێك كە چەندین ساڵە كەسانی وەك محەممەد خاتەمی، میرحسەین موسەوی و كەڕووبی وتەنانەت ڕەفسنجانی پڕوپاگەندەیان بۆ دەكرد، كە ئاكامی ئەوبەڵێنیانەمان بینی و دەركەوت كە نە ئەوان دەتوانن ریفۆڕم و چاكسازی بكەن ونە دەسەڵات چاكسازی و ئاڵوگۆڕ لە خۆیدا پێك دێنێ‌.

 هەروەك لە ڕابردودا دەركەوت بێگومان لە ئێستاش دا، باس لە ریفۆڕم و چاكسازی لە سیستم و پێكهاتەی دەسەڵاتی ئاخوندەكان بێجگە لە فریوكاری شتێكی دیكە نیە. چل ساڵ حكومەتی ئاخوندەكان و ئەو گشتە جینایەت و مرۆڤ كوژی و تاوانەیان، كە باندەكانی دەسەڵات بێ‌ جیاوازی لێ‌ بەرپرسن، ئەو ڕاستیە دەسەلمێنێ‌ كە ئاخوندەكان باس لە چاكسازیی بەكار دێنن بۆ بەردەوام بوونی دەسەڵاتی دواكەوتوانەیان.

 ئەگەر ڕۆحانی  هەر وەك چەندین ساڵی ڕابردوو قسەی زریقەو بریقەدارو بی ناوەرۆك دەكا ئامانجی فریوكاریە، هەر وەك چۆن لە هەڵبژاردنی سەرۆك كۆماری ڕژیم بە نیشاندانی (كلیل) بە قسە بەڵێنی كردنەوەی هەموو دەرگا داخراوەكان لە سەر خەڵكی ئێران و خۆشگوزەرانی و ئاسایش و هەروەها ئازادی و دیموكراسی دا، نەك هیچ یەك لە بەڵێنیەكانی نەهێنایە دیی، بەڵكو خەڵكی ئێران لە ماوەی  حكومەتی ناوبراودا لە گەڵ قورس ترین و بێ‌ بەزەییانەترین نەوعی ستەم و بێدادی، گرانی و بێكاری، زیاتر بوونی كێشە كۆمەڵایەتیەكان و تێك چوونی ژیانی خانەوادە، زیاتر بوونی فەسادو گەندەڵی لە ئێراندا بەرەو ڕوو بوون.

 بێگومان ئەو بەشە لە قسەكانی ڕۆحانی كە ڕایگەیاند كۆماریی بوونی دەسەڵات (جمهوریەت) كەوتۆتە ژێر پرسیار،ڕاستێكی حاشا هەڵنەگرە، بەلام بەو جیاوازیەی كە ئەو دەسەڵاتە لە بنەڕەتدا كۆماری نەبوەو هەر لە سەرەتای هاتنە سەر دەسەڵاتی ئاخوندان پڕۆسەی هەڵبژاردن ودەنگی جەماوەری ئێران بە مەبەستی درێژە كێشانی حوكمی دیكتاتۆرانەو بۆ فریوی كۆمەڵگەی دیموكراتیكی جیهان بە كار هێندراوە. دەسەڵات و حاكمیەت لە ئێراندا، بەستراوەیە بە ستەمكاری و دیكتاتۆری و لێك جیاناكرێنەوە.

حاشا هەڵنەگرە كە سیستمی دەسەلاتداری لە گەڵ هیچ یەك لە بنەماكانی حكومەتێكی خەڵكی و كۆماریی نایەتەوە، پوچەل كردنەوەو نەسەلماندنی  پاڵێوراوان بۆ بەشداری كردن لە شانۆی هەڵبژاردن، تەنانەت پاڵێوراوانی باڵی ڕۆحانی و باڵی بە ناو ڕیفۆرمخوازو زیندانی كردنی كەڕوبی و موسەوی زۆر مۆرەی دیكە، دەگەێنێ‌ كە رژیمی ئاخوندی سیستم و دەسەڵاتێكی مافیاییە، كە خاوەنی هێزی سەربازی و دەسەڵاتی بە ناو دادوەریی بۆ بە قانونی كردنی جینایەتكاریی،هەروەها خاوەنی ئابووری قۆرغ كراوە،كە لە هەركام لەو تایبەتمەندیانە بە قازانجی خۆی و بۆ مانەوەی بە كار دێنێ‌. بەو پێناسانەو ناساندنەی خودی كاربەدەستان دەسەلات، سەبارەت بە مەترسیدار بوون و بێ‌ سەرەوبەرەیی دەسەڵات ، ئەركی  خەڵكی ئێران و خەڵكی كوردستانە که‌،  ڕۆژی 2 ی ڕەشەممە، بەشداری شانۆی هەڵبژاردنی مەجلیسی ڕژیم نەكەن و بە بەشداری نەكردنیان، ئەو ڕاستیە بە جیهانیان و بە كاربەدستانی دەسەڵات بسەلمێنن، كە دەسەلات لە ئێراندا بە دەست گروپێكی مافیایی و جینایەتكارە و ئەو دەسەڵاتە لە ئێستاو لە رابڕدوشدا، دژ بە هەموو بنەماكانی جۆری حكومەتی كۆماریی بووە.
ڕێکه‌وت: 2020-02-04 21:05:17
به‌شی ( سیاسی )





دیمانه

سیاسی