له‌سه‌رهێل 78
شه‌ممه‌ 21 پووشپه‌ڕ 2720
سازمانی خه‌باتی کوردستانی ئێران
ڕژیمی ئاخوندی و قەیرانی ڤایرۆسی كڕۆنا

 سیامەند

 ڕۆژی پێنج شەممە 8ی ڕەشەممەی 1398 كۆچی خۆری ئاخوند خامنەیی ڕێبەری ڕژیم دوای نزیك مانگێك بە سەر بڵاوبونەوەی ڤایرۆسی كڕۆنا لە ئێراندا، بە شێوەێكی چاوەڕوان نەكراو دەركەوت، ئەویش جیاواز لە جارەكانی دیكە بە تەنیا، وە بێ‌ ئەوەی هیچ ئاپۆرای بەكرێگیراوانی لە دەور بێ‌.

 خامنەیی كە پێشتر هەڵۆێستی لە پێوەند بە نەخۆشی و سامناكی ڤایرۆسی كڕۆنا نەبوو،ئیتر نەیتوانی هیچ نەڵی، هەر بۆیە، بە هۆی بەربڵاوی كارەساتەكەو بڵاوبوونەوەی ڤایرۆسی كڕۆنا لە سەرانسەری ئێران و مردنی دەیان كەس بە هۆی ئەو ڤایرۆسە، ناچار بوو لێدوان بدا، خامنەیی لە ژوورێكدا بە تەنیا، كە ترسێكی زۆر لێ‌ نیشتبوو، لە ڕێگەی تلویزیۆنی ڕژیم باسی بڵاوبونەوەی ڤایرۆسی كڕۆنای كردو سپاسی كارمەندانی نەخۆشانەكانی كردو ووتی  هەوڵی باش دەدەن بۆ چارەسەر كردنی نەخۆشەكان.

 ئەو هەڵۆێست و قسانەی خامنەیی نەك نەیتوانی بەرپرسایەتی كاربەدەستانی ڕژیم و كەمتەرخەمیان لە بڵاوبوونەوەی ڤایرۆسی كڕۆنا، وەشارێ‌، بەڵكو بووە هۆی سەلماندنی ئەو ڕاستیەی كە بەرپرسانی رژیم بە تێكڕا،وە خامنەیی بە تایبەت لە بڵاوبونەوەو تەشەنە كردنی ڤایرۆسی كڕۆنا لە ئێراندا تاوانباری سەرەكین، چونكە لە رۆژانی یەكەمی سەرهەڵدانی ڤایرۆسی كڕۆناو هەواڵ و زانیاریەكان لە سەر مەترسی و هەرەشەی ئەو بەڵایە بۆ سەر خەڵكی ئێران، بەرپرسانی ڕژیم و خامنەیی بە ئەنقەست خۆیان لە باسی ئەو نەخۆشیە پاراست، وە تەنانەت رێگەیان لە هاتوو چۆی فڕۆكەی نەفەر هەڵگری ماهان كە سەر بە سپای پاسدارانە، بۆ ووڵاتی چین نەگرت و تەنانەت هەوڵیان دەدا قەیرانی ڤایرۆسی كڕۆنا وەك هۆیه‌ک بۆ نزیك بوونەوەی زیاتر لەو حكومەتی چین بەكار بێنن، وە بە ناوی هاوكاری كردنی چین، ویستیان وەڵامی  پشتیوانی ئەو ووڵاتە بدەنەوە كە هێندێك جار پشتگیری ڕژیم دەكات لە قەیران و لە كێشە جیهانیانەی  كاربەدەستانی ڕژیم بۆ خۆیان خۆلقێنەرین.

ناردنی هەزاران دەمامك (ماسك) لە ئێرانەوە بۆ چین، وەك هاوكاری ڕژیم، یەكێكە لە گاڵتەجارانەترین نەوعی هەڵۆێستی دەسەلاتدارانی ئێرانه، چونكە هەر لەو كاتەی دەمامك دەنێردرا بۆ چین، لە ناوخۆی ئێراندا خەڵك پێویستی لە ڕادەبەدەری بەو دەمامكانە هەبوو. وەك ئاشكرایە قەیرانی كەمی دەمامك لە ئێرانداو زیادبوونی نرخی دەمامك كێشەێكی گەورەی خەڵكە لە ئێستادا كە بە پێ‌ زانیاریەكان ژمارەێك لە بەكرێگیراوانی رژیم بەرپرسن لە بەرز بوونەوەی نرخی دەمامك.

 كاربەدەستانی ڕژیم بەو خۆش خزمەتیەیان بە حكومەتی چین، هیچ كە نەیانتوانی كارێكی بە كەڵك بۆ خەڵكی ئەو وولاتە بكەن لە بەرانبەریشدا، بوونە هۆی زیان گەیاندن بە خەڵكی ئێران. یەكێكی دیكە لە هۆكانی شاردنەوەی بڵاوبونەوەی ڤایرۆسی كڕۆنا لەئێران، بەو مەبەستە بوو تابتوانن خەڵك لە سەر سندوقەكانی دەنگدانی شانۆی هەڵبژاردنی مەجلیسی یانزدەهەمی ڕژیم كۆبكەنەوە، بەڵام كاتێك شانۆگەریەكەیان بێ‌ بینەر بوو وە كەمترین ڕێژەی خەڵك بەشداری كرد، هێندێك لە كاربەدەستان ڕژیم هۆكەیان بۆ مەترسی خەڵك لە ڤایرۆسی كڕۆنا گێڕایەوە، وەك ئەوەی بەرپرسانی ڕژیم لە بیریان چوبێتەوە كە پێشتر یا هیچ زانیارێكیان بە خەڵك نەداوە وە ئەگەر زانیاریان بە خەڵك داوە هیچ كات ئەوەیان ڕانەگەیاندوە كە ڤایرۆسەكە گەیشتۆتە ئێران. بێگومان بێ‌ هەڵۆێستی و كەمكاریەكانی ڕژیم لە حاست ئەو ڤایرۆسە سەرچاوەكەی بۆ دوژمنایەتی دەسەلاتداران بەرانبەر خەڵكی ئێران و لە بەرانبەردا گرینگیدانە بە خۆیان و دەسەڵاتە نامەشروعەكەیان دەگەڕێتەوە.

كاتێك لە ووڵاتی چین ڤایرۆسی كڕۆنا بڵاو بوەوە، چەند شار بە تایبەت شاری (ووهان) بە تەواوی قەرەنتینە كراوەو رێگەی هاتوچۆ بە دانیشتوانیان نەدرا، وە هەموو ئەو كەسانەی تووش ڤایرۆس بوون، بە شێوەێكی زۆر كاریگەر لە ژێر چاوەدێریدان و هەروەها حكومەتی چین لە ماوەی تەنیا 10 رۆژ گەورەترین بیمارستانی بۆ نەخۆش و ڤایرۆس لێدراوان دروست كرد، بەڵام كاربەدەستانی ڕژیم گاڵتە بە باسی قەرەنتینەو گرتنە بەری ڕێوشۆێنی كاریگەر بۆ چارەسەری ئەو قەریرانە مەترسیدارە دەكەن.

ئاخوند رۆحانی سەرۆك كۆماری ڕژیم لە ڕۆژی 7ی ڕەشەممە دەڵێ‌، نیازمان نیە هیچ شارێك قەرەنتینە بكەین و تەنانەت ئەمجارەش هەوڵیدا قەیرانی ڤایرۆسی كڕۆنا ببەستێتەوە بە پیلانی دوژمنانی ڕژیم. هەروەها (نمكی) وەزیری بیهداشتی ڕژیم قەرنتینەی بە كارێكی دواكەوتوانە ناو هێناو ڕایگەیاند هیچ شارێك كە ڤایرۆسی تێدا بەربڵاوە قەرەنتینە ناكەین. بەڵی ئەوە شێوەی هەڵۆێست و كاری نابەرپرسانەی دەسەڵاتدارانی ڕژیمی ئێران بۆ ئەو بەلا مەترسیدارە گەندەڵی و نەزانی و خەیانەتكاریان بەرانبەر بە خەڵكی ئێران نیشان دەداو لە بەرانبەریشدا هەڵۆێست و كاری بە جێ‌ حكومەت و دەسەلاتدارانی چین بۆ چارەسەری قەیرانی ڤایرۆسی كڕۆنا كە بە دەیان جار بەربڵاوترو مەترسیدارتریشە لەو لە ئێراندا باس دەكرێ‌ غەمخۆری و دڵسۆزیان بۆ خەڵك و ووڵاتەكەیان دەردەخا.

لە كۆتاییدا لایەنێكی دیكەی گاڵتەجاری دەسەلاتدارانی ڕژیم، خۆ بە نەخۆش نیشاندان و ڤایرۆس لێدراویی چەندین كاربەدەستی حكومەتە،كە زۆر وێ‌ دەچێ‌ ئەوەش یەكێكی دیكە لە فێڵ و چاوبەستەكانی كاربەدەستان و دەسەلاتداران بێ‌، كە گۆیا ئەوانیش نەخۆش دەكەون و ئەو ڤایرۆسە دەیانگرێتەوە، تەنانەت یەكێك لە بەرپرسانی ڕژیم كە گۆیا تووش ڤایرۆسی كڕۆنا بووە، دەڵێ‌ كڕۆنا وەك دیموكراسی وایە فەقیرو دەوڵەمەندو بەرپرس و غەیرە بەرپرس ناناسێ‌. وەك پێشتر باس كرا زۆر وێ‌ دەچێ‌ ئەوەی كە چەند بەرپرسی ڕژیم تووش كڕۆنا بوون پیلانی ڕژیم بێ‌ بۆ كەم كردنەوەی ڕەخنەكان لە سەر دەسەڵاتی ملهورو دیكتاتۆر لە ئێران.

 ئەگەر چی هومێدوارین ئەو ڤایرۆسە مەرگ هێنەرو مەترسیدارە لە خەڵكی ئێران بە دوور بێ‌ و ئاخوندە ملهورو دەسەڵاتدارە ستەمگەرەكان كە چل ساڵە بوونەوایرۆس و بەڵا لە سەر خەڵك هەڵگرێ‌ و كۆتاییان پێ‌ بینێ‌.
ڕێکه‌وت: 2020-02-29 01:25:31
به‌شی ( سیاسی )





دیمانه

سیاسی