له‌سه‌رهێل 79
شه‌ممه‌ 21 پووشپه‌ڕ 2720
سازمانی خه‌باتی کوردستانی ئێران
پەیامی سكرتێری گشتی سازمانی خەباتی كوردستانی ئێران بەبۆنەی بڵاوبونەوەی نەخۆشی كۆڕۆنا



هاونیشتمانیانی بەڕێز!

دوكتورو كادری تێكۆشەری نەخۆشخانەكان!

وەك ئاشكرایە نەخۆشی كۆڕۆنا لە كوردستان و سەرانسەری ئێران بڵاوبۆتەوە، جێگەی داخە بە هۆی بڵاوبونەوەی ئەو نەخۆشیە، سەدان كەس لە ئێران و كوردستان كۆچی دواییان كردوەو هەزاران كەسی دیكە نەخۆش كەوتوون، كە ژمارەێك لە نەخۆشەكان ژیانیان لە مەترسیدایە. لەم هەلومەرجە حەستەمەدا، جارێكی دیكە دەسەڵاتدارانی ڕژیمی ملهوری ئاخوندی زۆر بێ‌ دەربەستانە لە بەرانبەر ئەو نەخۆشیەو چارەنووس و ژیانی خەڵكی ئێران كەمتەرخەم بوون،وە تەنانەت لە هێنانی نەخۆشیەكەو بڵاوبوونەوەی لە ئێراندا بەرپرسن. بەردەوام بوونی هاتوو چووی گەشتیاران وچوونی فڕۆكەكانی ئێران بۆ ووڵاتی چین لەو ڕۆژانەی كە نەخۆشی كۆڕۆنا لە شاری ووهان و زۆبەی شارەكانی دیكەی ئەو ووڵاتە بڵاو بۆوە، دەرخەری نەزانكاری و كەمتەرخەمی دەسەڵاتدارانی ڕژیمە بەرانبەر بە خەڵكی ئێران.

هاونیشتمانی خۆڕاگر!
كادری پزیشكی ماندویی نەناس!

بێگومان ئەو هەلومەرجە نەخوازراوەی كە ئێستا لە شارەكانی كوردستان وسەرانسەری ئێراندا هەیە، بەرپرسایەتی هەر تاكێك لە كۆمەڵگە، و بە تایبەت دوكتورو پەرەستارەكان و كادری نەخۆشخانەكان زیاتردەكا لە چارەسەری نەخۆشەكان و كۆتایی هاتن بە نەخۆشی كۆڕۆنا وكەم بوونەوەی ژمارەی مردووەكان.
جێگەی خۆیەتی سپاسی بێ‌ پایانم بە پزیشك و كادری نەخۆشخانە و تێكڕای چالاكانی مەدەنی لە كوردستان ڕابگەێنم كە بەو پەڕی دڵسۆزی و هەست بە بەرپرسایەتی خزمەتی نەخۆشەكان دەكەن و تەنانەت هەستیاری ئەو نەخۆشیە نەیتوانیوە كاریگەری بخاتە سەر خزمەت و چارەسەری نەخۆشەكان. لەو پێوەندیانەی كە ژمارەێك لە مامۆستایان و كەسایەتی و خۆشكان و برایان بە ئێمەوەیان كردووە، داوایان كرد پەیامی خۆم و سازمانی خەبات بۆ هاونیشتمانیان بنێرم و داوایان لێ‌ بكەم كە گرینگی زیاتر بە باری تەندروستیان بدەن و ئەو ڕاسپاردانەی پزیشكەكان جێ‌ بە جێ‌ بكەن.
هەر بەم بۆنەوە داوا لە هاونیشتمانیانی بەڕێز دەكەم ئاگاداری خۆیان و دەوروبەریان بن و هیچ كۆبوونەوەێك نەكەن، و تا دەتوانن لە ناو ماڵەكانیان بمێننەوە. هەروەها ئەندامانی ئەو خانەوادانەی، كەس یا كەسانێكیان نەخۆشی كۆڕۆنای گرتووە هەوڵ بدەن خۆ بپارێزن لە سەردانی دۆستان و ناسیاوانیان وهەوڵ بدەن بە زوترین كات پشكنین بۆ خۆیان بكەن و هەروەها خۆ لە نزیك بوونەوە خەڵك بپارێزن. لە هاونیشتمانیانی تێكۆشەر داواكارم چۆن لە ئەنجامدانی یارمەتی كردنی یەكتر لە ڕابردودا،وە بە تایبەت لە ماوەی سەرهەڵدانی نەخۆشی كۆڕۆنا بەو پەڕی سەخاوەت و هەستی هاوكاری تێكۆشان، لە ئێستاو داهاتوشدا لە هاوكاری یەكتر بەردەوام بن. هەروەها داوا لە دەوڵەمەندو بازرگانەكانی كوردستان دەكەم بە ڕەچاو كردنی بەرپرسایەتی و هاونیشتمانی بوون، لەم قۆناغە حەستەمەدا هاوكاری نەخۆش و خەڵكی هەژار بكەن و ئەركی نیشتمانی و نەتەوەیی یان لە بیر نەكەن. بێگومانم كە جەماوەری ئێران و سەرانسەری جیهان بە سەر نەخۆشی كۆڕۆنادا زاڵ دەبێ‌ و بە زوویی شاهێدی لە ناوچوونی ئەو نەخۆشیە مەترسیدارەو هەروەها شاهێدی لە ناوچوونی ڕژیمی ئاخوندی دەبن كە دەیان جار قێزەونترو زیانبارتر لە كۆڕۆنایە. لە كۆتاییدا لە لایەن سازمانی خەبات ی كوردستانی ئێران سەرەخۆشی بە خانەوادەی كۆچ كردوانی نەخۆشی كۆڕۆنا ڕادەگەێنم و هومێدوارم غەمی لە دەست دانی ئازیزانیان ببێتە قینی تۆڵەو بەرەنگاری لە بەرانبەر حكومەتی ستەمگەری ئاخوندی كە سەرچاوەی زۆربەی نەیامەتی و چارەڕەشیەكانی جەماوەرە. لەگەڵ هومێد بە چاك بوونەوەی نەخۆشەكان و هومێد بە سەلامەتی بۆ هەموو هاونیشتمانیانی كوردستان و جەماوەری سەرانسەری ئێران و تێكڕای كۆمەڵگەی مرۆڤایەتی.
سازمانی خەبات ی كوردستانی ئێران
سكرتێری گشتی
بابەشێخ حوسەینی
24 ی ڕەشەممەی 1398 كۆچی خۆری
ڕێکه‌وت: 2020-03-14 10:38:41
به‌شی ( سیاسی )





دیمانه

سیاسی