یادی سەروەران

سەروەری گەل: شەهید عەبدوڵا نانەوا

هەر وەك خوێنی شەهید وشك نابێتەوە و ڕێبازی كوێر نابێتەوە، هەروا ناویان سەر زاریانە و یادیان لە دڵاندایە. شەهید ژیانی دانا بۆ هەژاران دەردی مردنی وە ئەستۆ گرت بۆ تیماری دەردەداران.  بە خوێنی دێڕی ڕێبازی شۆڕشی كێشا. 

كە دوا شوێنی كوێر نەبێتەوە. تروسكەی گیانی چۆڵە چرای شۆڕشگێڕانە لە شەوەزەنگی ستەمدا و هەناسەی بەسڕو سپێردراوی پشوو دێنێتەوەبەر ماندوان و ورە دەدا بە زیندوان، دەژێنێتەوە دڵی دڵ مردووان. شەهید كۆڵەكەی گەلانە، سەرمایەی ژیانە، سەنەدی نیشتمانە. هەر جێیەك لەو نیشتمانە، سەنەدێكی لە سەرە، كۆرپە شەهیدێكی لە بەرە. خوێنی لە سەر ڕژاوە، كوردێكی خەباتگێڕی لە سەر كوژراوە. لاوی بە ورە و قارەمانی لە سەر داناوە. 

جوێ لەوە كە هی خۆیەتی چەند جار بەخوێن كڕیویەتی. 

چ بكەین ئەوە میراتە بۆ كورد بە جێ ماوە نیشتمانی بە خوێن پاراوە، مێشكیان لە سەر بست بەستی پڕژاوە. واش پێمان ڕەوا نابینن. دوژمنان لێمان دابێنن لە گشت لاوە تێمان وەردەدەن. وەك گورگی چەشتە بۆمان دێن ناهێڵن تاوێك پشوودەین، ئاورێك لە زوو ڕابردوو وەردەین لە دوا ڕۆژمان بیركەینەوە باری ژینمان لێك دەینەوە. شار و دێمان دەڕوخێنن، بەروو باغمان دەسووتێنن. 

گەلان لە كوێ وئێمە لە كوێین؟

ئەمڕۆكەمان خۆزگە بە دوێنێ. 

بەڵام ئەستۆ كەج ناكەین. خەبات ئەكەین هەتا هەین، با هەر هەڵێن بەزیوان خۆبشارنەوە لە نەدیوان، دیارەخۆفرۆش چەندن و لە ڕێی جۆش بەندن. با بڕۆن بەرهەڵستوو هەڵێن هەل پەرەست. ئێمە شەهید لە بیر ناكەین و ڕێبازیان كوێر ناكەینەوە، زوو زوو یادیان دەكەینەوە، بە دۆعای خێر یادیان دەكەین، گۆڕیان بە هەڵاڵە پەژرین دەكەین، ئاوی ڕەحمەت لە گیانیان ئاژین دەكەین، ناویان بۆ خەڵك تازە دەكەینەوە ئاوڕ لە مێژوویان دەدەینەوە، با لە بیر بن ودڵگیر بن. تا ببنە چرای بەری دوایی، بەرەو بەهەشت بۆیان ببنە بەرایی. ئەمڕۆ نۆرەی سووكەڵە سوارێكی مەیدانی خەباتی خوێناوییە. نۆرەی نەونەمامێكی باخی شەهیدییە. دەم وشكێكی ناهومێدییە، بەو دەم وشكەش بە خوێنی ئاڵی، خاكی پاكی كوردستانی ئاوداو بە مناڵی و كاڵی و بە شانزدە ساڵی خۆی خزاندە كۆڕی شەهیدانی سازمانی خەباتەوە. شەهید كاك عەبدوڵا نانەوا كوڕی مام حسێن لە بنەماڵەیەكی هەژار و دێ نشین لە گوندی ( بارێی گەورە ) لە ناوچەی سێوەیل لە دایك بوو. پاشان ماڵیان چووە شاری بانە. لەوێ خوێندنی سەرەتایی دەست پێكرد. دوای ڕوخانی ڕژێمی شایەتی و هێرشی ناڕەوای تازە پیاكەوتوو بۆ سەر كوردستان.

هەر چەندە درێژەدان بە خوێندنەكەی لەلا بەنرخ بوو، بەڵام هەستی بە ستەم دەكرد و خۆی ڕانەگرت كە لە بەربەرەكانێی چەكدارانە لە بەرانبەر هێرشی دوژمنی شەڕخوازدا دەست ڕاگرێ. لە ساڵی 1359دا چەكی پێشمەرگایەتی هەڵگرت. هەر چەندە پێیان دەگوت جارێ كوردستان پێویستی بە چەك هەڵگرتنی تۆ نییە. دڵی ڕا نەدەوەستاو لە ڕیزی خەبات نەدەچووە دەر و بۆ چالاكی و جەنگ دەڕۆیی. 

زۆر جار كە فەرماندەكان لەگەڵ خۆیان نەیان دەبرد بە خۆشی ونوكتە دەیگوت منیش بەرن ئەو هەموو پێشمەرگە نانەوایەكیان دەوێ بە شانازییەوە بۆ خۆی و بە داخەوە بۆ هەموو هاوسەنگەرانی لە ڕۆژی 16/خاكەلێوە/1361 دا لە دووڕیانی ( سیاومە ــ ماماڵ ) لە دەشتە تاڵی ناوچەی بانە بە هۆی مینێكی دوژمن كە لە ژێر ماشێنەكەیاندا تەقییەوە شابازی گیانی بەرەو بەهەشتی شەهیدان لە شەقەی باڵیدا و لەشی زەنوێری بە ئاگری كینەی قین لە دڵان هەڵپڕوكا. 

 

هەزاران سڵاو لە گیانی ئازیز و خۆشەویستی بێت

 
ڕێکه‌وت: 2020-03-28 09:46:55
به‌شی ( شه‌هیدان )







سیاسی