له‌سه‌رهێل 98
سێ‌شه‌مه 17 پووشپه‌ڕ 2720
سازمانی خه‌باتی کوردستانی ئێران
قۆناغی نوێ‌ و زەروریەتی درێژەدان بە خەبات دژی رژیمی ئاخوندی!

شیلان محەممەدی
ڕاپەڕینی ۲۲ی ڕێبەندانی ۱۳٥۷ی ک خ، بە بەشداری زۆربەی چین و توێژەكانی كۆمەڵگا تواندرا سیستمی پاشایەتی لەسەر كار لابرێ‌ و بەستێن خۆشكرا بۆ هاتنە سەركاری نیزامێكی نوێ كە دواتر بەداخەوە بارودۆخەكە لەلایەن خومەینی و دەست و پێوەندەكانیەوە كۆنترۆڵ كرا و رژیمی ئاخوندی دەسەڵاتی گرتە دەست. خومەینی بە سواربوونی شەپۆلی هەستی جەماوەر و بە دروشمی بریقەدار و بەڵێنی درۆ بەخەڵك توانی دەسەڵات بگرێتە دەست و دەسكەوتەكانی ئەو ڕاپەڕینە مەزنە بە تاڵات ببات.خومەینی لە یەكەم قۆناغەكانی هاتنە سەركاری و گرتنە دەستی دەسەڵات لەو وڵاتەدا، كەوتە وێزەی خەڵك و ئەو نەتەوانەی كە لەو وڵاتەدا بوونیان هەبوو، وە بە پلەی یەكەم نەتەوەی كورد و بەتاوان و بیانوی جۆراوجۆر، هەوڵی بەژێردەستە هێشتنەوەی كوردی دا و سەرەتا بە درۆ و چاوبەستی دانووستان و شاندی وتووێژكەر ویستی كورد بە چەند درۆی زریقەدار كۆنترۆڵ بكات و كۆتایی بە خەباتەكەی بێنێ‌، بەڵام كە زانی كورد پاروێك نیە وا بەئاسانی بتوانێ‌ قووتی بدا ئینجا هەوڵی بە ئاشكرا لەناوبردنی ئەو نەتەوەی دا و بەكافر لەقەڵەم دانی كورد و بە دەركردنی فەرمانی جیهاد كەوتە قەتڵ و عام و كوشتن و لەداردانی هەزاران گەنج و پیرو شۆڕشگێر و تێكۆشەری كورد. گەلی كورد لەو كاتەوە وەك گەلێكی ژێردەستە و بێ هیچ جۆرە مافێك و لە ژێر سێبەری قورسی روانگەی ئەمنیەتی تەعاموڵی لەگەڵ دەكرێ‌ و رۆژانە ستەم و زوڵمی لەراست پەیرەو دەكرێ‌. لەماوەی چل ساڵی دەسەڵاتی ئاخوندی زاڵ بەسەر ئێراندا، كوردی ئەو پارچەیە بە بەردەوامی لە خەبات و تێكۆشاندا بووە، و ئەحزابی كوردی خەباتێكی بەرفراوانی فرەرەهەندیان بەرەو پێش بردووە. لە ماوەی ئەو خەباتە دوورودرێژەدا رێگەی ئاشتی و هەوڵ دان بۆ دانووستان لە لایەن ئەحزابێكەوە هەمیشە تاقی كراوەتەوە و بەداخەوە هەموو جارێك‌ لەگەڵ شكست و زەربەی قورس روبەروو بوونە. هەوڵی بەردەوامی ئەحزاب بۆ دانوستان و ئاشتی لەگەڵ رژیمی ئاخوندی، بە كوشتنی رێبەران و كەسانی دانوستان كار وەڵام دراوەتەوە. رژیمی ئاخوندی هەر لە سەرەتاكانی هاتنەسەر کاری، سیاسەت و بەرنامەی ئاشتی بەرامبەر بە كورد درۆیەك زیاتر نەبوو تا ئێستاش جاروبار لەو فریو و درۆیە بۆ هەڵخەڵەتاندنی بیرورای گشتی جیهانی و ناوخۆیی بە كار دەهێنێ‌.  وەگەڕخستنی ماشێنی ترۆر و ترۆركردنی سەركردە و ڕێبەرانی كورد، موشەكبارانكردنی بارەگای حیزبی، گرتن و ئێعدامكردنی ڕۆڵەكانی كورد بەتاوانی كورد بوون، گێرەشێوێنی و دەیان سیاسەتی جینایەتكارانەی تر لەو كاتانە دا بەرێوەچوونە كە دەنگۆی دانووستان و وتوێژ لە ئارادا بووە. ئەوەی جێگەی باسە هەمان سیاسەت لەسەر ئاستی جیهانیش لە لایەن ئاخوندانەوە پەیرەو كراوە و ساڵیانێكی زۆر جیهان بە درۆكانی رژیم هەڵخەڵەتاون و ئەو دەسەڵاتە لەو ڕێگەوە كاتی بۆ بردنە پێشەوەی بەرنامە مەترسیدارەكانی كڕیوە. بەڵام ئەوەی جێگەی خۆشیە لە ئاستی نێونەتەوەیی رژیم ماهیەتی دەركەوتووە و بەتەواوی پەراوێز خراوە، كۆدەنگی و یەكگرتوویی جیهانی لەسەر ئاستی نێونەتەوەیی لەدژی ئەو دەسەڵاتە خوێنڕێژە پێك هێنراوە، و گەیشتۆتە قۆناغێك كە لە هەر وتە و كردارێكی رژیم بە چاوی گومانەوە دەرواندرێ‌. بۆیە بە لەبەرچاوگرتنی ئەو ڕاستیانە و وەبیرهێنانەوەی مێژووی چوار دەیەی پڕاوپڕ لە سەركوت و قڕكردنی ئەو نیزامە، ئێستا كاتی ئەوە هاتووە كە ئەحزابی كوردی ڕێگەكاری گونجاوتر و شیاوتر بۆ خەباتكردن دژی ئەو دەسەڵاتە بگرنە بەر و میكانیزم و ستراتیژی نوێ داڕێژنەوە، ئەمەش بە چەندین هۆكار و پێویستی گرنگ و حەیاتی بۆ خزمەتكردن بە خەباتی ڕەوا و بەرحەق و پیرۆزی گەلی كورد و پاراستنی پیرۆزی و گەورەیی ئەو خەبات و تێكۆشانە نەپساوەیە. لەم قۆناغەی ئێستادا خەڵكی ئێران و كوردستان بەگشتی پێیان ناوەتە قۆناغێكی نوێ‌ لە خەبات و تێكۆشان و وێستانەوە لەبەرانبەر دەسەڵاتی نگریسی ئاخوندانی زاڵ بەسەر ئەو وڵاتەدا، ئەمەش بەچەندین هۆكار وەك؛ ئاگا بوون و هۆشیاربوونەوەی زیاتری خەڵكی ئەو وڵاتە و هەڵوێست گرتنی بەردەوام لەبەرامبەر ئەو سیستمە و زوڵم و زۆر و سەركوتەكانی شاهێدین، بە بەردەوامی سەرهەڵدان و نارەزایەتی روودەدا و دروستبوونی قەیران و كارەسات و نەهامەتیە یەك لەدوی یەكەكان دۆخی دەسەڵاتی زیاتر خراپ كردووە و دوورە دیمەنێكی ڵێڵی بۆ دەسەڵات بەرهەم هێناوە. خەبات و تێكۆشان لەبەرانبەر هەر دەسەڵاتێكی دیكتاتۆردا پێویستی بە هاوكاری و تەبایی نێوان خەڵك و ئەحزاب هەیە، هەر یەكەیان بەجۆرێك و لەلای خۆیەوە دەبێتە هۆكار بۆ سەركەوتن و بەگژداچوونەوەی دەسەڵات و سیستم، واتا خەڵك و ئەحزاب تەواوكەری یەكترن لە بە ئامانج گەیاندنی هەدەف و ویست. نە حیزب دەتوانێ‌ بەبێ‌ پشتیوانی و بەدەست هێنانی خۆشەویستی خەڵكەكەی بە ئامانجی بگات، و نە خەڵكیش دەتوانن بەبێ‌ پشتیوانی و ڕێنیشاندەری حیزب و تێكۆشەران بەسەر زوڵم و زۆردا زاڵ ببن. هەربۆیە هەرچی ئەحزابی كوردی هەیە بەرپرسە لەبەرامبەر خەڵكەكەیدا لەپێوەند بە هەر هەڵوێست و ستراتیژی ومیكانیزمێكی كاری كە دەیگرێتە بەر و پێویستە و دەبێ‌ بە وریاییەوە هەنگاو هەڵگرێ‌ لەبەرانبەر بارودۆخ و ڕووداوەكاندا. پێویستە و دەبێ‌ لەپێناو بەئامانج گەیاندنی هەدەفەكانی بزوتنەوەی گەلی كورد، بە دوور لە ئینتمای حیزبی و لەبەرچاوگرتنی قازانج و بەرژەوەندیە شەخسیەكان كاربكرێت بۆ عەمەلی كردنی هەرچی زووتری دروشمی ڕووخان و لەناوچوونی دەسەڵاتی دیكتاتۆری ئاخوندی ئێران و سەركەوتنی خەباتی كورد.
ڕێکه‌وت: 2020-04-28 14:26:09
به‌شی ( سیاسی )





دیمانه

سیاسی