له‌سه‌رهێل 68
سێ‌شه‌مه 17 پووشپه‌ڕ 2720
سازمانی خه‌باتی کوردستانی ئێران
کۆڕۆنا و دەسەڵاتی ئاخوندی  هاوپەیمانی دوژمن بە خەڵك

 سیامەند



كەم كەس هەیە نەزانی كە دەسەڵاتی ئاخوندەكان لە ئێران هەر لە ڕۆژانی سەرەتاوە تا ئێستا، بۆ خۆ دەربازكردن و گوێ‌ نەدان بە ویست و داواكانی خەڵكی ئێران و هەروەها لە پێناو مانەوەی حكومەتی نامەشروعیان، هەمیشە قەیران سازیان كردوە و هەوڵیانداوە خەڵك لە سەر باس و كێشە سەرەكیەكانی ووڵات، وەك گرانی، بێكاری، نەبوونی سەرەتایی ترین بنەماكانی دیموكراسی، سەركوت وچەوسانەوە، ئیعدامی هاونیشتمانیانی بێتاوان و بە تاڵان بردنی داهات و سەرمایەی ئێران و .....هتد بەلاڕێدا بەرن.

هەر لە مانگەكانی سەرەتای دەسەڵاتیان بە پەیڕەو كردنی سیاسەتی قەیران سازی و ئاڵۆزی دروست كردنی وەك، ئیسلام و حكومەتی بە ناو عەدلی ئیلاهی لە مەترسیدایە، هێرشیان كردە سەر نەتەوەكان لە ئێران و رێكخراوە سیاسی و كەسایەتیە سیاسیەكان كە تەنانەت زۆربەیان موسڵمانیش بوون، وە وەك ئەوەی ڕژیم پروپاگەندەی دەكرد نەك دژی ئیسلام نەبوون بەڵكو تەنیا داوای ماف و ویستە رەواكانیان دەكردو هەوڵیان بۆ دابین كردنی دیموكراسی و ئازادی بوو، بە پێچەوانەی ئەو پڕوپاگەندانە، خودی دەسەڵات لەگەڵ لایەن و ڕێكخراوە چەپەكانی وەك، حیزبی تودەو چریكە فیداییەكانی(ئەكسەریەت) دوو تەشكیلاتی چەپ، هاوپەیمان بوو، بە مەبەستی سەركوتی تێكۆشەرانی ئازادیخواز.

 دەست پێكردنی جەنگی ئێران/عێراق  قەیرانێكی دیكەبوو كە دەسەلاتداران لە ئێران ماوەی ٨ ساڵ لە سەر روباری خوێنی لاوەكانی ئێران و درێژەدان بە جەنگ و پروپاگەندەی فریوكارانەی وەك، ڕزگار كردنی قودس لە ڕێگەی كەربەلاوە، توانیان سەرنجی بەشێكی زۆر لە جەماوەر لە پێوەند بە روداوە ناوخۆییەكان بە لاڕێدا بەرن و هەر ویستێكی ڕەواو هەر ناڕازیەتێك، بە بیانوی ناوی خەیانەت بە ئێران سەركوت بكەن.

تەنانەت خومەینی بە دەركردنی فەرمانی جیهاد بۆ سەر خەڵكی زۆرینە موسڵمانی كوردستانی ئێران، قەیرانێكی دیكەی  بۆ دەرباز بوون لەو ڕاستیە تاڵانەی كە لە كوردستان و ئێراندا هەیە، لە ژێر ناوی جیهاد لە دژی خەڵكی كورد دروست كردو توانی ژمارەیه‌ک كەسانی بیر ووشكی مەزهەبی لە دژی خەڵكی كورد هان بداو بەكاریان بێنێ‌. دیارە لە ماوەی دەسەڵاتی ئاخوندەكان لە ئێراندا قەیرانی سازی زۆرن كە پێویست نیە هەموویان باس بكرێن.

 پێناسەی كورت و پڕ بە پێست بۆ پێكهاتەی دەسەڵاتی ئاخوندەكان، بریتیە لە دەسەلاتێك كە لە ژێر سایەی قەیرانەكان درێژە بە حوكمی ناڕەوای دەدا و قەیران دروست كردن و هەوڵدان بۆ شاردنەوەی ڕاستیەكان و سەركوت و چەوسانەوە لە ژێر سێبەری قەیرانە دروستكراوەكاندا ئاوێتەی حوكمی ناڕەوای دەسەڵاتی ئێرانە. لە ئێستادا ڤایرۆسی كوبید 19 (كۆڕۆنا) لە ئێراندا، بەڵاێكی گەورەیە بۆ خەڵك و هاوتەریبی بەڵای دەسەڵاتداریی ئاخوندەكانە، كۆڕۆنا ئەو بەڵایەیە كە دەسەلاتداران لە پەرەسەندن و بڵاو بوونەوەی، بەو ڕێژە بەرچاوە لە ئێراندا لێ‌ بەرپرسن.

 ئاخوندەكان بە مەبەست ڕێگریان نەكرد لە بڵاو بوونەوەی كۆڕۆنا، هەر بە ئەنقەست ڕێگەیان بە هاتوو چۆی فڕۆكە نەفەرهەڵگرەكانیان بۆ ووڵاتی چین دەدا تا بە ئاسانی نەخۆشیەكە بگوازنەوە بۆ ئێران. شانۆی هەڵبژاردن و ڕێ و ڕسمی ٢٢ی ڕێبەندان ساڵڕۆژی سەركەوتنی ئینقلاب و دەیان كۆبوونەوەی دیكەیان هەر بە مەبەست درێژە پێدا، تا بە تەواوی كۆڕۆنا هەموو ئێران بگرێتەوە، تەنانەت ئەگەر شارو ناوچەێكدا خەڵك تووش نەخۆشی كۆڕۆنا نەبوون، ئاخوندەكان لە ڕێگەی ناردنی كەسانی نەخۆش و بە ناوی زیارەت و سەفەری نەورۆزی و بەهاری بە كردەوە كاریان كرد بۆ بڵاو بوونەوەی كۆڕۆنا.

 لە ماوەی چەند مانگی بڵاو بوونەوەی كۆڕۆنا و مردنی هەزاران كەس لە ئێراندا، دەسەڵاتداران نەك هیچ هەوڵیكیان بۆ كەم كردنەوەی زیانەكان نەداوە، بەڵكو بە كردەوە هەلومەرجیان خۆش كردوە تا كۆڕۆنا ژمارەێكی زیاتر لە خەڵك بكاتە قوربانی و تەنانەت بە قسەو لێدوانی دژ بە یەك و دوور لە مەنیقەكانی خامنەیی ڕێبەری ڕژیم و ئاخوند ڕۆحانی سەرۆك كۆمار، ئەوەندەی دیكە باری گرانی بەڵای كۆڕۆنایان لە سەر خەڵكی ئێران قورستر كرد. خامەنەیی لە رۆژی ٢١ ی خاكەلێوە بە دەركەوتنی لە تلویزیزۆنی ڕژیم بە بێ‌ ئەوی ئاماژە بە ژمارەی قوربانیانی كۆڕۆناو زیانەكانی بۆ خەڵكی ئێران بكات، ووتی كێشەی كۆڕۆنا لە چاو كێشەكانی دیكە گەلێك بچوكترەو لە دوو جەنگی جیهانیدا ١٠ ملیۆن كەس كوژراون بەڵام بە هۆی كۆڕۆنا ١ملیۆن كەس دەمرن، هەروەها ووتی دەبێ‌ بەردەوام بین لە كاری ئابووری و بەهەم هێنان و ئاگاداری پیلانی دوژمنان بین ودەبێ‌ پارێزگاری لە دەسەڵات و نیزام پێشینەی ئەركەكانمان بێ‌.

 خامنەیی لە جێگەی غەمخۆاردنی بۆ خەڵكی ئێران، تەنیا لە بیری ئەوەدا بوو چۆن لە قەیرانی كۆڕۆنا بە قازانجی دەسەڵات قسەبكات و ڕاستیەكان لە چاوی خەڵك وون بكات. هەروەها ئاخوند رۆحانی لە كۆبونەوەی حكومەتەكەی لە ٢٠ ی خاكەلێوە، ووتی هەلومەرج بەرەو ئاسایی بوون دەچێ‌ و پێویست نیە قەرەنتینە لە ئێران پەیڕەو بكەین و تەنانەت هەر لەو كۆبونەوەدا ناڕاستەوخۆ ئاماژەی بە مەترسی كۆڕۆنا كرد بەلام ووتی هیچ چارەێكمان نیەو تەنانەت بەو درۆیەی كە كۆڕۆنامان تێ‌ پەڕاندوەو زاڵ بووین بە سەریدا هەوەهاووتی لەگەڵ كرێكارانی كارخانەكان پێوەندیان گرتوەو ئەوان ووتویانە هیچ كێشەێكمان نیەو نەخۆشی لە ناو كرێكاراندا بوونی نیەو درێژە بە كار دەدەین.

 زۆر لە لێدوان و قسەی كاربەدەستانی ڕژیم ئەو ڕاستیە دەسەلمێنن كە دەسەڵات لە ئێران، كۆڕۆنای وەك ئامرازو قەیرانێكی نۆی بۆ سەرگەرم كردن و بە لاڕیدا بردنی خەڵك بە كار هێناوە. ڕژیم كۆرۆنای كردە چەكێكی كوشندە بۆ ڕوبەڕوبونەوەی خەڵك و هەوڵیدا پێوەندیە كۆمەڵایەتی و پێوەندیە فكری وسیاسیەكانی نێوان پێكهاتەكانی خەڵكی ئێران كز بكات. ئاخوندەكان پەرەیان بە كۆڕۆنا دا بەو مەبەستەی تاكەكانی كۆمەڵگە تەنیا لە بیری ڕزگار كردنی گیانی خۆیان بن و بیریان لە چارەنووسی نالەباری سیاسی و كۆمەلایەتی ئێران و ئەو گشتە بەڵاو ئازارانەی كە دەسەڵات تووشی كردوون نەكەنەوە.

 لەو بارەوە دەبێ‌ ئەو ڕاستیە بسەلمێنین كە بە حەق خەڵكی وەزاڵەهاتووی ئێران ئەو ڕیسەی ئاخوندانیان كردەوە بە خوری و نەیان هێشت هەموو ئامانج و مەبەستەكانی دەسەلات بێتە دیی، ئەگەر چی ئەو سیاسەتی فێڵ و قەیرانسازی لە ژێر ناوی كۆڕۆنا ژمارەێكی كەمی خەڵك لە ڕاستیەكان دوور بخاتەوە، بەڵام هیممەتی چالاكانی مەدەنی و كەسایەتیەكان لە كوردستان و ئێران و لە قاودانی سیاسەتی فریوكاریی ئاخوندانی هاوپەیمانی كوبید ١٩، وای كرد خەسارەكان كەم بن و ڕژیم بە هەموو ئامانجەكانی كۆڕۆنای، پەرە پێدراوی دەستی خۆیان لە ئێراندانەگەن.

 بەڵێ‌ كۆڕۆنا هاوپەیمان و دەستە خۆشكی ڕژیمی دیكتاتۆری ئێرانە، چونكە ئامانجی كۆڕۆنا كوشتنی مرۆڤەكان و بێ‌ دەسەڵات كردیان و كپ كردنی دەنگیانە، هەر وەك ئامانجی ئاخوندەكانی دەسەڵاتدارا لە ئێران كوشتنی خەڵك و كپ كردنی دەنگی وەزاڵە هاتووی خەڵكی ئێرانە.
ڕێکه‌وت: 2020-05-08 01:05:39
به‌شی ( سیاسی )





دیمانه

سیاسی