له‌سه‌رهێل 100
شه‌ممه‌ 21 پووشپه‌ڕ 2720
سازمانی خه‌باتی کوردستانی ئێران
چاو ساغی بیرو هزر تاریك

كاروان كرماشانی
دۆستێك گێڕایەوە لە گەڵ خەلیفەێك چووین بۆ سەیران و گەشت كردن و لە گەشتەكەدا خواردنەوە، واتە مەشروباتی ئەلكولیمان پێ‌ بوو، ووتی خەلیفە سەری گەرم و مەست ببوو، هەر ئەوەندەم زانی شوێنكەوتوانی هاتنە لای و كەوتنە دەست و قاچ ماچ كردنی. دۆستەكەم ووتی، لەگەڵ ئەوەی لەگەڵ خەلیفە نێوانم زۆر خۆش بوو، بەڵام پێم ناخۆش بوو شۆینكەوتوانی ئەوەندە بیر تاریك و تێ‌ نەگەیشتوو بوون، هەر بۆیە پیم ووتن خەلیفەكەتان مەشروب دەخواتەوەو ئەوەی لە بەردەمیدا دەیبینن عەرەق و مەشروبە، لە وەڵامدا ووتیان خەلیفەی ئێمە مەشروب ناخواتەوە، چەند جار لێم دووبارە كردنەوە كە خەلیفەكەتان مەشروب دەخواتەوە، كاتێك قەناعەتیان هێنا كە خەلیفەكەیان مەشروب دەخواتەوە ئەمجار ووتیان ئەگەر خەلیفەكەمان مەشروبیش بخواتەوە ئەوە بۆ ئەو( شەرابا گهورا)یە شەرابەن تەهورایە.
ئەو بەسەرهاتە بۆ سەرەتای ئەم بابەتەم بە پێویست زانی، بە تایبەت بۆ هەڵسەنگاندن و بەراوردكردنی نێوان شوێن كەوتوانی خەلیفەی مەشروب خۆرو،و ڕوناكبیران و لایەنگری ژمارەێك لە حیزبە سیاسیەكان، بە تایبەت ئەو ئەندام و ڕۆشنبیرانەی كە خۆیان بە پێشڕەو دەزانن و پێ یان وایە لە زانین و تێگەیشتندا نمونەیان كەمە.
ئەو جۆرە كەسانە حیزبەكەیان و ڕێبەركانیان بە هەموو هەڵەو خراپەێكەوە بە دروست و ڕەوا دەبینن، هەڵەی ڕێبەرەكانیان نابینین و ئەگەریش بیزانن و تەنانەت بەڵگە لە سەر تاوان و هەڵەی ڕێبەرو حیزبەكەیان هەبێ‌ پاساوی سەیروسەمەرەی بۆ دێننەوەو تەنانەت ناوی گەورەی هاوشێوەی ناوی پێغەمبەران لە ڕێبەركەیان دەنێن.
بە داخەوە ئەو جۆرە بە ناو ڕوناكبیرە نادڵسۆزانە، لە بەلاڕێدابردنی ڕای گشتی جەماوەرو قەتیس مانەوەی جوڵانەوەی مافخوازانەی خەڵكی كوردستانی ئێران لە بازنەێكداو پێش نەكەوتنی دەوری خراپیان گێڕاوە. ئەوانیش هەڵەی لایەنەكەیان و بەرپرسەكانیان دەشارنەوەو هەر هەڵەێكی لایەن و بەرپرسەكەیان بە خواردنەوەی بە شەرابەن تەهورا دەبینن و چاویان لە حاست ڕاستیەكان دەقونجێنن، ئەو كەسانە تەنیاو تەنیا خوێندەوارن و هیچی دیكە، ئەو خوێندەواری و ڕۆشنبیرانەی كە كردەوەو هەڵوێستە نامەسئولانەكانیان دەیان جار زیانبارترە لە بیرو ڕوانگەی شوێنكەوتوانی خەلیفەكە، ئەویش بەو جیاوزیەی كە شوێنكەوتوانی خەلیفە، پێ یان وایە بە دواكەوتنی خەلیفەو تەعریف و پێداهەڵگوتنی، بەهەشت بۆ خۆیان بەدەست دێنن لە كاتێكدا ڕۆشنبیران و خوێندەوارەكانی لایەنگری ئەحزاب كەمترباوەڕیان بە بەهەشت و قیامەت هەیەو ئەو كارەیان تەنیا بۆ ئافەریم و پێداهەڵگوتنی بێ‌ دەستكەوتە لە ئێستا و لە درێژماوەدا.
كەسانی بە ناو ڕۆشنبیرو بە ناو خوێندەوار،چاو لە هەرچی نالەباری، درۆ، گەندەڵی و تاوانە دەقونجێنن و بە شێوەێكی سەرسوڕهێنەر بە ڕاستی و چاكی و شیاویی بە خەڵكی دەناسێنن. دەڵێن تلوێزیونەكەمان، ڕادوێ ، راگەیاندن و ڕۆژنامەكەمان، ڕاست بێژەو هیچی درۆ ناڵێ‌، تەنانەت بۆ سەلماندنی ئەو ناڕاستیانە، بەڵگەی بێ‌ بنەما بە لێدوانی دروستكراو لە دوژمنانیش دێننەوە.
ئاشكرایە گەلێك زۆرن دەردو ئازارەكانی گەل، كە بە داخەوە تا ئێستا دەرمانیان نیە، یا باشترە بڵەین لە بەر ڕۆشنبیرو كادری (ئەشهەدو بیلا بێژ) دەرمانەكانیش ناگەنە جێگە، تا بتوانێ‌ دەردی كوردی دەردەدارو جوڵانەوەی مافخوزانەی چارەسەر بكا.
داوایە بیرێك بكەنەوە لە ڕابردوو لە ئێستا، بیرێك بكەنەوە لە گەلی چارەرەشی كورد لە كوردستانی ڕۆژهەڵات،بێگومان بە ووتنی ڕاستیەكان و دەست نیشان كردنی هەڵەكان،نە تەنیا خزمەت بە میللەت دەكەن بەڵكو خزمەت بە حیزب و لایەنەكان و ڕێبەرەكانیش دەكەن.
داوایە با تەنیا،بە چاو تماشای ڕوداوەكان نەكەین و بە ئیحساساتی ناڕاست مەبنە هۆی دوور كەوتنەوە لە كاروانی ڕزگاری، بەڵكو بە بیرو هزری سەردەمیانەو ڕاست فریا كەون با گەلی كورد لە كاروانی ڕاست و دروستی مافخوازی و ئازادیخوازی بە جێ‌ نەمێنێ‌.
ڕێکه‌وت: 2020-06-27 10:09:40
به‌شی ( سیاسی )





دیمانه

سیاسی