له‌سه‌رهێل 32
شه‌ممه‌ 25 گه‌لاوێژ 2720
سازمانی خه‌باتی کوردستانی ئێران
مەكتەبێك بۆ لێوە فێربوون

شیلان محەممەدی
‎بزوتنەوەی كورد بە درێژایی مێژووی بەرخودان و تێكۆشانی نەتەوەیی، لەڕەوتی خەباتی خۆی دا بە دەیان سەركردە و ڕێبەری مەزن وزانای تێدا هەڵکەوتوون کە بەدرێژایی ژیانی خۆیان و بە دەریایەك لە ئەزموون و مەكتەبێك لە وانە و رێنوێنیان ئێمەیان گۆش داو پەروەردەیان کردین. هەر بەرهەمی ژیری و زانایی ئەوانە کە ڕێگای تێکۆشانمان بەردەوامە. ئەوانیش بۆ ئێمە بوونە پێشەوا و ڕابەر و سەرکردەمان و یادو ناویان هەمیشە بەزیندوویی دەمێنێتەوە لامان و بێگومان بە لێوەفێربوون و زیندوو هێشتنەوە و كردنە هێمای رێبەرانمان، خەبات و تێكۆشانی ئەمڕۆمان بەر ئەگرێ و سەركەوتن مسۆگەر ئەبێ.
گەلی كورد، ماوەی چەندین سەدەیە لەخەبات و تێكۆشان نەوێستاوەتەوە و خەباتێكی هەمەلایەنەی لەهەموو بەشەكانی كوردستان پێش خستووە بەحوكمی بوونی سیستمی دەسەڵاتە دیكتاتۆرەكان و سیاسەتی پاكتاوكردن و ئاسمیلای كورد، و زوڵم و زۆر و چەوساندنەوە بەردەوامەكان لەلایەن دەسەڵات و ڕژیمە دژە كوردەكانەوە، سەردەمانێكی سەخت بەسەر كورد دا تێپەریوە و بێگومان ئەگەر خەبات و تێكۆشانی گەلی كورد و رێبەرانی پێشەنگمان نەبوایە، ئاسەوارێك بەناوی نەتەوەی كورد و كێشەی كورد بوونی نەدەما.
‎یەكێك لەو ڕێبەرە بلیمەت و دەگمەنانەی نەتەوەكەمان كە بە پێشەنگایەتی وفیداكاریی خۆی توانی لەسەر ڕەوتی ڕوداوەكان و خەباتی میللەتەكەمان شوێندانەری بە جێ بێڵێ، جەنابی ماموستا سەیید جەلال حوسێنیە، كە بە سوێندی یاسایی لە كۆمەڵەی ژێكاف، مێژووی كاری سیاسی خۆی دەست پێكرد و لە سەرخستنی خەبات بۆ ڕووخانی ڕژیمی پاشایەتی، گەورەترین دەوری گێڕاو و لەپاشانیش بە دامەزراندنی ڕێكخراوی نەتەوەیی و نیشتمانی بەرەنگاریی ستەمی ئاخوندان بوویەوە.
‎مامۆستا سەیید جەلالەدین حوسێنی، ڕێبەری لێهاتوو و هەڵكەوتووی گەلی كورد و دامەزرێنەری سازمانی خەبات، هەر لەسەرەتاوە بەهۆی خۆشەویستی لەناو خەڵكدا، توانی دەسەڵاتی دیكتاتوری ئێران وەزاڵە بێنێت و خەباتی نەتەوەیی بۆ بەدەست هێنانی مافەكانی بەرەو پێشەوە ببات.
‎مامۆستا بەهەست كردن بە بۆشایی سیاسی ناو جوڵانەوەی رزگاریخوازیی كوردستان لەو سەردەمەدا، قوتابخانە و ڕێبازێكی دامەزراند كە بوو بە مەكۆی پەروەردەی تێكۆشەرانی ڕاستەقینەی نەتەوەكەمان و قارەمانترین ڕۆڵەكانی كوردستانی لەئامێز گرت و بە پەروەردەی رێبازیی كوردایەتی پەروەردەی کردن.
‎مامۆستا، لەو ڕێبازەدا كە دیاری كردبوو قوربانیەكی زۆری پێشكەش كرد بەخوێنی ڕۆڵەكانی و هەروەها توانایی و لێهاتوی و بیرو ئەندێشە مەزن و نەتەوەییەكان توانی سازمانی خەبات، لەڕۆژە سەخت و دژوارەکان ڕزگاربکا. ڕێبەرایەتی و ژیری وای کرد کە سازمانی خەبات و پێشمەرگەکانی سازمانی خەبات ببنە نموونەی شۆڕِشگێڕی و نیشتمان پەروەری .
‎نەمانی مامۆستای ڕێبەر بەجەستە، لەوانەیە خەسارەتێكی قەرەبوو نەكراوە بێ و ئەوەی دەتوانێ بەشێك لەو خەسارەتە كەم بكاتەوە، هەوڵ دان بۆ زیندوو هێشتنەوە و بەردەوامی دان و لێوەفێربوون لە ڕێباز و قوتابخانەی ئەو ڕێبەرە مەزنەیە كە پڕاوپرە لە وانەی كوردایەتی و موقاومەت و خۆنەویستی و فیداكاری.
‎رێباز و قوتابخانەی جەنابی مامۆستا شانازیەكی گەورەیە بۆ هەر كەسێك كە ڕێگای شۆڕش بگرێتە بەرو بیهەوێ لەپێناو ڕزگاری گەلی كورد دا، تێبكۆشێت، چونكە ڕێباز و قوتابخانەی مامۆستا، بەجۆرێكە كە قوتابی و درێژەپێدەرانی بەشێوازێكی وا پەروەردە دەكرێن كە خۆشی ژیانیان لە ئازادی و ڕزگاری گەلەكەیان و خەبات كردن لەو پێناوەدا بدۆزنەوە.
‎ئەوە دروشم و خەتی مامۆستا بوو كە بە بەردەوامی تاڵی و ئازارەكانی گەلەكەی پێش هەموو خۆشیەكانی خۆی بخات و لەپێناو حەسانەوە و خۆشی خەڵكەكەی بۆ دەقەیەكیش حەسانەوەی نەبێ.
‎ڕێبازی مامۆستا، ڕێبازێكی تایبەت و بێگەرد بوو هەر لە سەرەتای دروستبونیەوە و بێگومان تا گەیشتنی گەلی كورد و ڕزگاری كوردستانی ئێران لەبندەستی ئاخوندانی گەندەڵ، هەر بە پاكی و بێگەردی دەمێنێتەوە و بەردەوام دەبێ لەسەر بەردەوامی دان بە شانازی و دەسكەوتە پڕ بایەخەكان و تۆماركردنی سەروەری.
‎ئێمە وەك قوتابی و درێژە پێدەرانی ڕێبازی جەنابی مامۆستا سەیید جەلالی حوسێنی، پێویستە و دەبێ‌ بەردوام سەروەریەكانی ئەو ڕێبەرە مەزنە وەك ئەڵقەیەك لەگوێ بكەین و لەبیرمان نەچنەوە، و بیرو هزر و تێڕوانینەكانی ڕێبەری گەورەمان، بكەینە هەوێنی خەبات و تێكۆشانمان.
‎گەورەیی و جوامێری مامۆستا، و ئازایەتی و لەخۆبوردویی و فیداكاریەكانی، سازمانی خەباتی كوردستانی گەیاندە ئەو قۆناغەی ئێستا و كردیە یەكێك لە حیزبە سەربەرزەكانی مەیدان و خاوەن مێژوویەكی پڕ دەسكەوت و شانازی، بۆیە دەبێ‌ ئێمە قوتابیانی ئەو ڕێبازە بتوانین بە پاراستن و زیندوو هێشتنەوە و بەردەوام بوون، نەهێڵین دەسكەوت و سەروەریەكانی مامۆستای گەورەمان بەفیڕۆ بڕوات و بیگەیەنینە قۆناغی كۆتایی و بەئامانجی بگەیەنین.
‎سڵاو درود بۆ ڕۆحی ڕێبەری مەزنی گەلەكەمان، مامۆستا سەیید جەلالەدین حوسێنی
‎بەردەوام و شەكاوەبێ‌ ئاڵای بەرزی ڕێبازی پیرۆزی.
ڕێکه‌وت: 2020-07-16 09:21:51
به‌شی ( سیاسی )





دیمانه

سیاسی