له‌سه‌رهێل 28
شه‌ممه‌ 25 گه‌لاوێژ 2720
سازمانی خه‌باتی کوردستانی ئێران
رەهەندە جیاجیاكانی خەبات و تێكۆشانی مامۆستا سەید جەلال حسەینی

 

شەخسیەتە هەڵكەوتوو رێبەرە دیارەكان، هەر كامە و بە كار و چالاكیەكانیانەوە پێناسە دەكرێن. بە یەكیان دەگوترێ سیاسیەكی سەركەوتوو، بە یەكیتر دیپلۆمات یان شۆرشگێر و پارتیزانێكی سەركەوتوو. كە وایە هەر سەركردە و كەسایەتێكی هەڵكەوتووی كۆمەڵگە بە یەك یان دوو كار و چالاكی و تێكۆشانی پێناسە دەكرێ.

بزوتنەوەی رزگاریخوازانە كوردستانیش خاوەن چەندین سەركردەی و كەسایەتی هەڵكەوتە و كەم وێنەیە، كە هەر كامەو لە بارێك و چەند رەهەندێکی تایبەت چالاكانە كاری كردوە لە پێناو ناساندن، بردنەپێش و سەرخستنی دۆزەكەی هەوڵی داوە. ئەو سەرکردە و رێبەرەی دەمەوێ لێرەدا تیشک بخەمە سەر رەهەندەکانی ژیانی سیاسی و شۆڕشگێڕی، مامۆستا سەید جەلال حوسەینیە.رق و بێزاری لە داگیركەر و حەز و خولیای رزگاری خاك و نەتەوەی كورد لە ژێر دەستی، لە پێناسە هەرە ناسراوەكانی ئەو رێبەر و پێشەنگەی خەبات و خۆراگریی خەڵکی کوردستانە. مامۆستای نەمر لە مەیدانی چالاكی سەربازی و سەركردایەتی كردنی هێزی پێشمەرگە دا، دیفاعی لە گەل و نیشتمان كردوەو ولەبەرامبەر رژیمی داگیركەری ئاخونداندا وێستاوەتەوە. هێزی پێشمەرگەی دەفتەری مامۆستا و دواییش سازمانی خەبات بە سەركردایەتی و رێبەریی مامۆستا سەید جەلال، زۆر قارەمانانە و خۆنەویستانە بە دژی داگیركەراندا چۆتەوەو خاكی كوردستانیان لێ كردونە دۆزەخ. بۆ وێنە شەڕی ١٠ی خەزەڵوەر، شەڕی ئێرانشای سەقز، شەڕ و بەرخۆدانی ناوشاری سەقز، ناوچەی بۆكان، سەردەشت و بانە، كە هێزی پێشمەرگە داستانی كەم وێنەی قارەمانەتیان خولقاندووە. ئه‌م نموونانه‌ دەتوانین لە كارنامە و كاروسەرکردایەتی مامۆستای نەمردا بخوێنینەوە.

مامۆستای نەمر بە چالاكی سیاسی و تەبلیغ و هاندانی جەماوەر كاریگەری بەرچاوی هەبوو لەسەر ئامادەكردنی زیاتری جەماوەر بۆ هاتنە مەیدان. لە دوای ئەوەی خومەینی، لە هەستی مەزهەبی خەڵكی ئێران بۆ قۆرغ كردنی دەسەڵات كەڵكی وەرگرت و کەوتە پیلە کردن بە خەڵکی مافخوازی کوردستان، مامۆستای نەمر دەستی كرد بە گەران بە شار و ناوچە جیاجیاكانی كوردستان و كەوتە روونكردنەوەی جەماوەر و هاندانیان بۆ یەکیەتی و هاتنە مەیدان و دیفاع لە نیشتمان.

لە دوای ئاوارەیی و تاراوگەنشینی بە دیپلۆماسیەت و پێوەندی لەگەڵ وەڵاتان و حیزب و پارت و كەسایەتیە سیاسیە ئوروپایی و ناوچەییەكان هەوڵی كۆكردنەوەی پشتیوانی بۆ سازمانی خەبات و دۆزی رەوای نەتەوەكەمان لە كوردستانی ئێرانی دا. مامۆستای نەمر، نووسەرێكی خامە رەنگین بوو كە بەنووسین و شیكاری لەسەر زۆرداری داگیركەران و مافە رەواكانی خەڵكی كوردستان و زەروورەتی خەبات و خۆراگری، هەوڵی ئەوەبوو كە هوشیاری سیاسی و نەتەوەیی لە نێو خەڵكدا بڵاو بكاتەوە و نەتەوەكەمان لە ماف و ئازادیەكانی خۆی و رێگەكانی گەیشتن بەو مافانە ئاشنا بكات. هەروەها بەنووسین و هۆنینەوه‌ی شیعر، پەخشان و نوسینی ئەدەبی حەماسی هەوڵی نێڵدانی زیاتری كورەی خەبات و شۆرشی كوردستانی دەدا.

مامۆستای نەمر لە شێعرەكانی دا پێشمەرگەی وەك شۆرەسواری مەیدانی خەبات و تەنیا رزگاریدەری گەل هێما دەكرد. هەروەها بە پێدا هەڵدان لە سروشتی كوردستان و دەست نیشان كردنی زامەكانی خەڵكی رەنجەرۆی كوردەواری و داگیركراویی وەڵاتی، لە چوارچێوەی شیعر و دەقی ئەدەبیدا دەهۆنیەوە و تاكی كوردی هاندەدا بۆ ئەوەی دژكردەوەی بەرامبەر داگیركەران هەبێ و خۆ لە بەندی دیلی و ژێردەستەیی رزگار بكەن.

هەروەها مامۆستا سەید جەلال بە پێی ئەو شارەزاییەی لە دینی ئیسلامی هەبوو لە دەقە دینیەكان و بەتایبەت سەرچاوەكانی دینی ئیسلام وەكوو قورئان و حەدیس بۆ رەت كردنەوەی ژێردەستی و سەلماندنی ناڕەوایی دەسەڵاتی ئاخوندان بە نووسین بۆ مانگنامەی تێكۆشان و بەرنامەی تایبەتی لە رادیۆ دەنگی خەباتی كوردستان بەڵگەی لەسەر رەوایی زیاتری خەباتی نەتەوەی کورد و ناڕەوایی و نامەشروعەیەتی دەسەڵاتدارانی ئێران، دێنایەوە.

بەڵێ‌ مامۆستاو پێشەوای خەباتی مافخوازانەی کورد لە هەر رێگە و ئەوەی لە توانایداو بۆی دەكرا، بۆ دژایەتی داگیركەران و رزگاری كوردستان لە ژێردەستەیی و وەدیهاتنی مافە رەواكانی كورد لە كوردستانی ئێران تەرخان کرد کە بریتی بوون لە چالاکی سیاسی، پێشمەرگەیی، تەبلیغاتی، بڵاوکردنەوەی هوشیاری نەتەوەیی و سیاسی لە نێو کۆمەڵگەی کوردستان، لە باری ئەدەبی و ئایینی بەبێ ماندوبوون تێدەکۆشا.
ڕێکه‌وت: 2020-07-18 09:14:07
به‌شی ( سیاسی )





دیمانه

سیاسی