راگەێندراوی سازمانی خەبات ی كوردستانی ئێران لە پێنجەمین ساڵیادی كۆچی دوایی جەنابی مامۆستا سەیید جەلال حسێنی خەڵكی شۆڕشگێری كوردستان!

ئەندامان و لایەنگرانی سازمانی خەبات ی كوردستانی ئێران!

پێنج ساڵ لەمەوبەر دڵە گەورەكەی مامۆستای رێبەر و رێنیشاندەری نەتەوەكەمان مامۆستا سەیید جەلال حسێنی لە لێدان كەوت و بۆ هەمیشە ماڵئاوایی لێكردین. كۆچی دوایی ئەو رێبەرە بیرمەند و تێكۆشەرەی گەلەكەمان لە سەر جوڵانەوەی رزگاریخوازانەی نەتەوەكەمان شوێنەواری خەراپی بە جێهێشت و بێگومان زیانی نەبوونی كەسایەتی وەك جەنابی مامۆستا بۆ خەباتی حەقخوازانەی نەتەوەییمان زۆر زەحمەتە قەرەبوو بكرێتەوە.

مامۆستا سەیید جەلال حسێنی لەو رێبەرە دەگمەنانەی كوردستان بوو كە زۆر سادقانە و فیداكارانە تاوی دایە شۆڕش و خەبات لە دژی ستەم و چەوسانەوەی دەسەڵاتە چەوسێنەرەكانی زاڵ بەسەر كوردستان و لەو پێناوەدا خاوەنی پڕ سەروەری ترین كارنامە و زۆرترین نرخ و فیداكاریی و خۆنەویستیە.

 مامۆستا سەیید جەلالی حسێنی لەهەرەتی لاویەتیەوە و بە خواردنی سوێندی دڵسۆزی بۆ كۆمەڵەی ژیانەوەی كورد خەباتی سیاسی و نەتەوەیی خۆی دەست پێكرد و خەبات و تێكۆشانی لەبەرانبەر دوو نیزامی دیكتاتۆری پاشایەتی و ئاخوندی و بۆ گەیشتنی گەلەكەمان بە ملف و ویست رەواكانی بەرێوە برد. مامۆستا سەیید جەلالی حوسێنی لەسەرەتای شۆڕشی گەلانی ئێران دژی رژیمی شا گەورەترین دەوری گیرا لە هاندان و سازدانی تەزاهورات و خۆپیشاندانە جەماوەرییەكان و سەرەتای ئەركی رێبەرایەتی جەماوەری لەو ساڵانە دا پێ بەخشرا. لەپاش سەركەوتنی شۆڕشی گەلانی ئێرانیش بۆ دوو ساڵ لە دەفتەری مامۆستا شێخ عیزەدین درێژەی بە خەباتی نەپساوەی نەتەوەییانە دا و دواجاریش بە دامەزراندنی سازمانی خەبات ی كوردستانی ئێران شكل و قەوارەیێكی تەشكیلاتی و رێكخراوەیی بە ئەركە نەتەوەیی و نیشتمانیەكانی بەخشی و  هەتا دواهەمین هەناسەی لە خزمەت بە دۆزی رەوای نەتەوەیی ووچانی نەدا. 

مێژووی خەباتی زیاتر لە 6 دەیەی مامۆستا سەیید جەلالی حوسێنی پڕە لە لاپەرەی زێرین و پڕ سەروەری كە سەرانسەر تەژییە لە راستگۆیی و دانایی و لێوەشاوەیی و فیداكاریی ئەو زاتە گەورەیە. مامۆستا خاوەن كەسایەتیەكی مرۆڤانەی هاوتەریب لەگەڵ موراڵ و بایەخە ئەمرۆییەكانی جیهان بوو و نەك تەنیا كەسایەتی هاوچەشنی مامۆستا زەرور و گرینگی یەكجار گەورەی بۆ كۆمەڵگای كوردستان هەبوو بەڵكو جیهانی پڕ لە بشێویی و ئاڵۆزكاویی دەستی مرۆڤە حەق نەبیست و خوێنمژ و جاهیلەكان زیاتر گرینگی و گەورەریی كەسایەتی مامۆستا سەیید جەلالی حوسێنینمان بۆ دەردەخات. ئەمرۆ گروپ گەلی جۆراوجۆری بە رواڵەت هەڵگری پەیامی ئاسمان دەستیان داوەتە رووخاندنی پایەكانی ژیانی مرۆڤایەتی و لە هەمانكاتیشدا زۆرترین زیانیان لە پەیامی راستەقینەی ئاسمان داوە. مامۆستا سەیید جەلالی حوسێنی ئەو رێبەرە دیموكراسیخوازە بوو كە پێی وابوو ژیانی ئازاد مافی هەموو تاكێكی ئەو جیهانەیە و هیچ كەس و لایەنێك نابێ بەر بە ژیانی ئاشتیانە و پێكەوە لەمرۆڤەكان بەسەربەستی و ئازادی بگرێ‌ و لە دوایین وتاریشی لە كۆنگرەی چوارەمی سازمانی خەبات ی كوردستان بە پێداگرییەكی زۆرە باس لەوە دەكات كە ((ئەم كوردستانە هی هەموومانە و هەمومانی لێ دەژین، دەبێ هەوڵ بۆ رزگاری كوردستان بدەین، لە دوایی دا ئینتخابات دەكرێ و نوێنەری هەموو بەشەكانیش لە پاڕڵماندا دەبێ، و هەموو كەس شەریكە لە حكومەت و لە پاڕڵمانیش دا، ئەوە رێیەتی و ئەوە داوای منە.)) مامۆستا رووناكبیر و رێبەرێكی دیموكراتخواز بوو كە باوەری بە پێكەوژیانی هەموو بیرو ئەندێشە و باوەر و عەقیدەكان هەبوو . 

جەماوەریی خۆراگری كوردستان!

ئەندامان و پێشمەرگەكانی سازمانی خەبات!

هەر چەند كۆچی دوایی رێبەر و دامەزرێنەری سازمانی خەبات زیانێكی گەورە بوو بۆ جوڵانەوەی كورد لە كوردستانی ئێران، بەڵام نابێ فەرامۆشی بكەین كە ژیان و خەباتی مامۆستای نەمر چۆڵەچرا و دەسمایەیێكی گرانباهایە بۆ هەموو خەڵكی كوردستان و پێویستە لە رێگەی ئەزموون وەرگرتن و كارپێكردن بە باوەر و ئەندێشەكانی مامۆستا فكری مامۆستا بە زیندوویی بهێلیننەوە و زۆرترین تاكی لەسەر گۆش بكرێ‌ و لە رێگەی هێشتنەوەی ناو و یادی مامۆستا بە زیندوویی خزمەت بە دۆزی رەوای نەتەوەیی و بە گشتی مرۆڤایەتی بكەین. ئەمرۆ قوتابیانی قوتابخانەی مامۆستا سەیید جەلالی حسێنی لەسەر  رێنوینی و  بناغە فكرییەكانی مەكتەبی مامۆستا لە دژی دوو پێكهاتەی تا ئێسقان دژی مرۆڤایەتی  واتە دەسەڵاتی جینایەتكاری ئاخوندی و خوێنمژانی ترۆریستی داعش لە جەنگ و رووبەرووبوونەوە دان و جەنگ لەگەڵ ئەو فكر و پێكهاتە دواكەوتووانە بە ئەرك و هاوتەریب لەگەڵ وانەكانی مەكتەبی مامۆستای هەمیشە زیندوو دەزانن.  

لە پێنجەمین ساڵیادی كۆچی جەنابی مامۆستا سەیید جەلالی حوسێنی دامەزرێنەری سازمانی خەبات ی كوردستانی  ئێران و رێبەری بیرمەندی نەتەوەكەمان سڵاو و درود دەنێرین بۆ روحی پاكی مامۆستا و بەڵین دووپات دەكەینەوە كە لە خزمەت بە نەتەوە و نیشتمان لە رێبازیی پاك و بێگەردی لا نەدەین و تا دواهەناسە لە دژی ستەمی چەوسێنەران و وەرگرتنی مافە رەواكانی نەتەوەكەمان هەدا نەدەین. 

 

سازمانی خەبات ی كوردستانی ئێران

كومیتەی ناوەندی

30ی پووشپەری 1394 

 
ڕێکه‌و 2015-07-21 10:32:55
به‌شی ( به‌یاننامه‌کان )







سیاسی