هەواڵەكانی كوردستان، ئێران و جیهان 30ی پووشپەری 1394  

دوو کۆڵبەری کورد لەناوچەی سنوورییەکانی ئێران و تورکیە کوژران

 دوو کۆڵبەری کورد لەسنووری نێوان ئێران و تورکیە بە تەقەی راستەخۆی هێزە نیزامییەکانی رژێمی ئاخوندی ئێران کوژران. بەپێی راپۆرتی هەواڵدەریی کوردپا، چەند رۆژ لەمەوبەر، لەئەنجامی دەستڕێژی هێزە حکوومەتییەکان لەخاڵی سنووری پارێزگای ئازەربایجانی رۆژئاوا دوو کۆڵبەری کورد بە ناوەكانی، ئارام شاهیننژاد تەمەن 19 ساڵ خەڵكی گوندی پسان و سەیفەدین یوسفی بانی تەمەن 17 ساڵ، خەڵكی گوندی بانی سەر بە تەرگەوری ورمێ، گیانیان لەدەست دا.شایەتحاڵان لە بارەوە دەڵێن: تەقە کردنی هێزەکانی حکوومەتی بەبێ ئاگادار کردنەوەی کۆڵبەران روو دەدات و ئەو کارانە وای کردووە کە ژیانی هاووڵاتییانی کورد لە ناوچە سوورییەكان بكەوێتە مەترسییەوە. سەرەڕای کوشتنی رەوتی بەردەوامی کۆڵبەرانی کورد لەلایەن هێزە نیزامییەکانی رژێمی ئاخوندی ئێرانەوە مەحکووم کردنیان لەلایەن رێکخراو و ناوەندە نێونەتەوەیەکانی مافی مروڤەوە، ناوەندە پێوەندیدارەکانی حکوومەتی ئیسلامیی ئێران هیچ هەڵوێستێکیان لەو بارە لە خۆیان نیشان نادەن.

 

 

 

 

 

 

 

لەسنە بە کورتەنامە هەوڵی چاوترسێن کردنی بنەماڵەی چالاکانی سیاسی دەدرێت

 ماوەیەکە لەشاری سنە لەپارێزگای کوردستان و بەتایبەتی لەیەک حەفتەی رابردوودا ئیدارەی ئیتلاعات کورتەنامەی بۆ بەشێکی بەرچاو لەبنەماڵەی چالاکانی سیاسی کورد بەرێ کردووە. بەپێی راپۆرتی هەواڵدەریی کوردپا، لەماوەی رابردوودا کۆمەڵێک کورتەنامە لەلایەن ئیدارەی ئیتلاعاتی سنەوە بە ناوەڕۆکی "هەڕەشە ئامێز"ـەوە بۆ ئەو بنەماڵانەی کە کەسێکی نزیکیان لەدەرەوەی ئێرانە بەرێ کراوە و داوایان لێکردوون کە رۆڵەکانیان بگەڕێننەوە.لەو بارەیەوە یەکێک لەو بنەماڵانەی کە کورتەنامەی بۆ نێردراوە رایگەیاندووە كە،" ئێمە زیاتر لە ٢٠ ساڵە کە کوڕەکەمان لەناو حیزبە سیاسییەکاندا نەماوە و لە ئورووپا ژیان بەسەر دەبات". کەسێکی نزیکی ئەو بنەماڵەیە ئەوەشی خستەڕوو، ئێمە بە ناوەندە ئەمنیەتییەکانمان وتووە کە کوڕەکەمان لەناو هیچ حیزبێکی سیاسی و چەکداردا نیە و بەرپرسانی ئەو ناوەندانە بێ ئاگایی خۆیان لەو بارەیەوە دەربڕیوە. هەر لەو پیوەندییەدا سەرچاوەیەکی دیکە بە ئاژانسی کوردپای وت: ناوەندە ئەمنیەتییەکانی شاری سنە ئاگاداری مانەوە و یان روێشتنی خەڵکی لەناو حیزبە سیاسییەکاندا نین و لەو ماوەیەدا چەندین کوردتە نامە بۆ خەڵک ڕەوانە کراوە و تێدا باسیان لەوە کردووە کە نابێ رێگە بدەن کورەکانتان لە ناو ئە حیزبانەدا بێت. ئەو سەرچاوەیە ئاشکراسی کرد. ئیدارەی ئیتلاعات لەچەندین حاڵەتدا بە کورتەنامەش نەوەستاوە و راستەوخۆ تەلەفوونی بۆ بنەماڵەکان کردووە.

 

 

 

 

 

 

 

 

هە دە پە: داعش به‌رپرسی ته‌قینه‌وه‌ی په‌رسووسه‌ 

هە دە پە، له‌ به‌یاننامه‌یه‌کدا که‌ ڕۆژی ڕابردوو هاوپه‌یوه‌ند به‌ ته‌قینه‌وه‌ی تیرۆریستی شاری په‌رسووس بڵاویکردبووه‌وه‌، وێڕای ئیدانه‌کردنی ئه‌م هێرشه‌ داعشی به‌ به‌رپرسی بۆمب نانه‌وه‌ی ئه‌و شاره‌ زانی و بانگهێشتی سه‌رجه‌م خه‌ڵکی تورکیای کرد ته‌ڤلی به‌ره‌ی ئاشتی بن و له‌ به‌رانبه‌ر داعش یه‌کده‌نگ بن. به‌پێی راپۆرتی هەواڵدەرییەكان، پارتی دیموکراتیکی گه‌لان (HDP)، ڕایگه‌یاند: ته‌قینه‌وه‌ی خۆکوژی ڕۆژی ڕابردوو له‌ په‌رسووس که‌ لانیکه‌م 30 کوژراو و زیاتر له‌ 100 برینداری لێکه‌وته‌وه‌، له‌لایه‌ن گرووپی ده‌وڵه‌تی ئیسلامی عێراق و شام (داعش)ه‌وه‌ ئه‌نجام دراوه‌. هە دە پە له‌ به‌یاننامه‌یه‌کدا که‌ ڕۆژی ڕابردوو بڵاوی کرده‌وه‌ و له‌لایه‌ن هاوسه‌رۆکانی پارتی دیموکراتیکی گه‌لان، سه‌لاحه‌ددین ده‌میرتاش و فیگن یۆکسکداغ واژۆ کراوه‌، هه‌موو تورکیای بانگهێشت کردووه‌ بۆ یه‌کده‌نگی و یه‌کگرتوویی له‌ به‌ره‌ی ئاشتی و به‌ره‌نگاربوونه‌وه‌ له‌گه‌ڵ چه‌کدارانی داعش. له‌م به‌یاننامه‌یه‌دا هاتووه‌: "ئێمه‌ ئه‌م هێرشه‌ دڕندانه‌ و نامرۆڤانه‌ له‌ په‌رسووس ئیدانه‌ ده‌که‌ین" و له‌ درێژه‌ی ئه‌و به‌یاننامه‌یه‌دا هاتووه‌ که‌ ئێمه‌ ده‌بینین که‌ "چه‌کدارانی دڕنده‌ و ده‌ستدرێژکار و ئه‌وانه‌ی که عیزه‌ت و‌ شه‌رافه‌تیان نییه‌، ده‌توانن چ کرده‌وه‌یه‌ک ئه‌نجام بده‌ن." ئه‌م به‌یاننامه‌یه‌ هه‌روه‌ها حکوومه‌تی تورکیای تۆمه‌تبار کردووه‌ که‌ به‌ مه‌به‌ستی پێشگیری له‌ سه‌رهه‌ڵدانی ئه‌م هێرشانه‌، کارێکی خۆپارێزانه‌ی پێویستی ئه‌نجام نه‌داوه‌  له‌ درێژه‌شدا هاتووه‌: حکوومه‌تێک که‌ بۆ به‌ره‌نگاربوونه‌وه‌ له‌گه‌ڵ پارتی یه‌کێتی دیموکراتیکی سووریا (PYD) سوپا و هه‌زاران سه‌ربازی تورکیای له‌ سنووره‌کانی ئه‌م وڵاته‌ کۆکردووه‌ته‌وه،‌ ده‌بێ وڵامی که‌مته‌رخه‌مییه‌ ئه‌نجامدراوه‌کان له‌ په‌رسووس و ته‌قینه‌وه‌ی بۆمب له‌و ناوچه‌یه‌ بداته‌وه‌. سه‌رجه‌م ڕێکخراوه‌ هه‌واڵگری و ئه‌منییه‌کانی تورکیا له‌مباره‌وه‌ به‌رپرسن.

 

 

 

 

 

 

 

 

دژكردەوەی توندی رەفسەنجانی بە قسەكانی خامنەیی

هاشمی رەفسەنجانی بە قسەكانی خامنەیی كە لە رۆژی جەژنی رەمەزاندا كردی دژكردەوەی توندی نیشان دا. بە پێی راپۆرتی هەواڵدەرییەكان، رەفسەنجانی رۆژی دووشەممە 29ی پووشپەری 1394، لە چاوپێكەوتنی لەگەڵ بەرپرسانی سازمانی تەئمینی ئجتماعی، وێرای بەرگری لە پاشەكشێی رژێمی ئاخوندی لەمەر بەرنامە ناوكەییەكەی رایگەیاند، كەسانێك لە ئێستادا وەها بوون بە خاوەن ماڵ كە كەس نەزانێت ئەڵێیت لە ئاسمانەوە هاتوون و ویلایەتیان هێناوە. بە پێی ئەم راپۆرتە، رەفسەنجانی كە لە دوای قسە ئاژاوەگیرەكانی خامنەیی لە رۆژی جەژندا قسەی دەكرد وتی، زۆر ئەستەم نییە كە كۆمەڵێك كەس چاوی خۆیان دەنووقێنن و قسە دەكەن و ئاژاوە دەنێنەوە.

 

 

 

 

 

 

 

 

بۆچی رژێمی ئاخوندی بۆ دەوڵەتی ئەمریكا كوبا نییە

وتەبێژی كۆشكی سپی لە دژكردەوە بە هەرەشەی نوێنەرانی مەجلیسی رژێمی ئاخوندی لەمەر پەسەند نەكردنی رێكەوتننامەی ناوكەیی بە هۆی ئەو بەربەستانەی كە بۆ بەرنامە مووشەكییەكەی رژێم دانراوە وتی، رێكەوتنێكە نووسراوە دەبێت بەرێوە بچێت. بە پێی راپۆرتی هەواڵدەرییەكان، وتەبێژی كۆشكی سپی كە رۆژی دووشەممە 29ی پووشپەر بۆ هەواڵنێران قسەی دەكرد وتی، ئەگەر رۆژێك رژێمی ئاخوندی بەو بەڵێنانەی كە داویە پابەند نەبێت، ئەوكات ئەمریكا و كۆمەڵكای جیهانی بۆ وڵامدانەوە بە فریوكاری ئەو رژێمە لە بارودۆخێكی باشتردا دەبن. بە پێی ئەم راپۆرتە ناوبراو لەمەر دەستپێكردنەوەی پەیوەندی سیاسی نێوان كوبا و ئەمریكا كە دوێنی بە فەرمی دەستی پێكرد و ئەگەر دەستپێكردنەوەی پەیوەندی سیاسی نێوان ئەمریكا و رژێمی ئاخوندی وتی، ئۆباما هێڵێكی روونی نێوان پەیوەندی كوبا و پەیوەندی لەگەڵ رژێمی ئاخوندی داناوە و بۆچوونی ئۆباما لەو بارەیەوە زۆر جیاوازە.

 

 

 

 

 

 

 

 

وردەكاریێك لە هەوڵی رژێمی ئاخوندی بۆ دەورلێدانەوەی گەمارۆكان

هەواڵدەری دیلی بێست لە راپۆرتێكدا وردەكاری هەوڵەكانی رژێمی ئاخوندی بە مەبەستی دەور لێدانەوەی گەمارۆكان و كرینی نایاسایی فرۆكەی بوئینگ لە لایەن دەڵاڵان و دەست و پەیوەندەكانی خۆی لە ئەمریكا بڵاو كردووەتەوە. بە پێی ئەم راپۆرتە، رژێمی ئاخوندی یارمەتی ماڵی بە دەست و پەیوەندەكانی خۆی لە ئەمریكا بە تایبەت دانی پووڵ بە بەكرێگیراوەكانی لە ئەنجۆمەنی ناسراو بە ناباك و كەسانێك وەك تریتا پارسی داوە. هەروەها شیركەتی فرۆكەوانی بالی كە خاوەنەكەی وەحید عەلاقەمەندە لە لەندەن و هاوكات بازرگانی گرووپی باڵی لە ئەستۆیە هەوڵیداوە فرۆكەی بوئینگ 747، سەرەرای قەدەغە بوونی فرۆشی بە ئێران بكرێت بە بێ ئاگاداری دەوڵەتی ئەمریكا. جێگەی باسە كە لەو راپۆرتەدا تیشك خراوەتە سەر هەوڵی رژێم بۆ راكیشانی بۆنیادە فیكرییەكانی ئەمریكا لە رێگای دانی پووڵەوە كە بریتین لە، ناوەندی بروكینز، و بۆنیادی پارسا كە لە هەوڵدا بوون گەمارۆكانی سەر ئەو رژێمە لابەرن.

 

 

 

 

 

 

 

 

کۆریای باکوور: رێککەوتنە ئەتۆمییەکەی ئێران بێسودە

وەزارەتی دەرەوەی کۆریای باکوور لە بەیاننامەیەکدا رایگەیاند، کە وڵاتەکەی هاوشێوەی ئێران گرنگی بە رێککەوتنی ئەتۆمی لەگەڵ ئەمریکا و وڵاتانی دیکەی 5+1 دا نادات و رێککەوتنی لەوشێوەیە بێ سودە. بە پێی راپۆرتی هەواڵدەرییەكان، لە بەیاننامەکەدا ئاماژەکراوە بەوەی کە بەرنامە ئەتۆمییەکەی کۆریای باکوور (بەربەستێکی پێویستە) دژی سیاسەتی دەرەوەی ئەمریکا لە بەرامبەر ئەو وڵاتەدا و رێککەوتنی ئەتۆمی لە ئێستادا گرنگییەکی ئەوتۆی نییە. کۆریای باکوور لە ماوەی رابردوودا هاوشێوەی ئێران بەهۆی بەرنامە ئەتۆمییەکەیەوە رووبەڕووی چەندین سزای نێودەوڵەتی بووەتەوە، کە لەلایەن ئەمریکا و یەکێتی ئەوروپا و نەتەوە یەکگرتووەکانەوە بەسەریدا سەپێندراون. لە ساڵی 2008 دا کۆریای باکوور لە دانوستانەکانی لەگەڵ ئەمریکا، کۆریای باشوور، چین، یابان و روسیا کشایەوە و ئامادە نەبوو دەست لە بەرنامە ئەتۆمییەکەی هەڵبگرێت، لەوکاتەوە وڵاتە زلهێزەکان لە هەوڵی ناچارکردنی ئەو وڵاتەدان تا بیگەڕێننەوە سەر مێزی گفتوگۆ، بەڵام تاکو ئێستا هەوڵەکان بێ ئەنجام بوون.
ڕێکه‌و 2015-07-21 14:43:31
به‌شی ( هه‌واڵی کوردستان )







سیاسی