پەیامی بەرێز بەرێوەبەری گشتی سازمانی خەبات ی كوردستان لە پێنجەمین ساڵیادی كۆچی دوایی مامۆستا سەیید جەلالی حوسێنی  

جەماوەری تێكۆشەری كوردستان!

 هۆگرانی رێگەی ئازادی!

 ئەندامان و لایەنگرانی سازمانی خەبات ی كوردستانی ئێران!

 لە 30 پووشپەری سالی 1389 كۆچی خۆری بەرانبەر 21 ی ژوئەنی سالی 2010 مامۆستا سەید جەلال حوسەینی رێبەری زانا و فیداكار و ناوداری كورد و دامەزرێنەری سازمانی خەبات ی كوردستانی ئێران لە تەمەنی 82 سالیدا و لە دوای زیاتر لە 62 ساڵ كار و تێكۆشان لە پێناو ئازادی كوردستان كۆچی دوایی كرد. كۆچی دوایی مامۆستا زیان و خەسارەتێكی قەرەبوونەكراوی بە جولانەوەی كورد و بزووتنەوەی ئازادیخوازانەی ئێران بە گشتی و سازمانی خەبات ی كوردستانی ئێران و كورد لە كوردستانی ئێران بە تایبەتی گەیاند. مامۆستا سەید جەلال حوسەینی سیاسەتمەدارێكی راستگۆ و خۆراگر، شۆرشگێرێكی كارامە و یەكێك لە رێبەرە كاریگەر و كەسایەتییە دیارەكانی ناو جولانەوەی كوردستان و جولانەوەی سەرانسەری ئێران بوو كە لە بەر جێگەو پێگەی گرینگی، بە دوای كۆچی دواییدا زۆربەی رێبەرانی هێزو لایەنە سیاسیەكانی چوار پارچەی كوردستان و هەروەها بەرێز مسعود رەجەوی و خاتو مریەم رەجەوی پەیامی هاوخەمیان بۆ سازمانی خەبات نارد و باسیان لە دەوری كارێگەری مامۆستای نەمر، لە سەر جولانەوەی ئازادیخوازی كوردستان و ئێران كردوە. مامۆستا سەید جەلال حوسەینی لە گەڵ ئەوەی دەوری سەرەكی لە دامەزراندنی سازمانی خەبات ی كوردستانی ئێران گێرا، لە ماوەی دەسەلاتی شاهەنشایی و دەسەلاتی رژیمی خومەینی، رێبەرێكی كاریگەر بوو كە دەوری بەرچاوی هەبوو لە دارشتنی سیاسەت و هەڵوێستی لێبراوانە لە بەرانبەر حاكمیەتی ئێران و بە تەواوی پێكهاتەی حاكمیەتی ئاخوندانی رەد دەكردەوە پێ‌ وابوو تا ئەو رژیمە لە ئێران حاكم بێ‌ جەماوەری ئێران و كوردستان بە سەرەتایی ترین مافەكانیان ناگەن. 

خەڵكی ستەملێكراوی كوردستان! 

مامۆستا شێخ جەلال حوسەینی لەگەڵ باوەری بە ئایینی ئیسلامی پیرۆز، هەمیشە هەڵسەنگاندن و لێكدانەوەی لە سەر پێكەوە كاركردنی تێكرای بیروبۆچونەكانی كوردستان لە پێناو گەیشتن بە دیموكراسی بەو شێوە بوو كە كوردستان موڵكی تێكرایی هەموو دانیشتوانیەتی و پێویستە بە گشتی لە غەمی داهاتوو و چارەنووسیدا بین. مامۆستا باوەری قووڵی بە ئوسووڵ و بنەماكانی دیموكراسی بوو و هەر لەو چوارچێوەدا بە بەردەوامی داوای یەك دەنگی و یەك هەڵویستی تێكرای لایەنە سیاسیەكانی گۆرەپانی كوردایەتی دەكرد. هەڵوێست و سیاسەتەكانی مامۆستا چ لە پێوەند بە رژیمی دەسەلاتداری ئێران و چ لە پێوەند بە بنەما نەتەویی و ماف و داواكانی گەلی كورد بۆتە هەوێن و چۆڵەچرای رێبازو باوەری رێبوارانی سازمانی خەباتی كوردستانی ئێران. 

مامۆستای نەمر بە رێبەرایەتی كردنی سازمانی خەبات لە قۆناغە سەخت و چارەنووس سازەكان، ئەو قۆناغ و هەلومەرجانەی كە سەختی و قورسییان گەورەترین هێزی لە بن دەهێنا، بەلام كارامەیی و نەبەزی و خۆراگری جەنابی مامۆستا وای كرد سازمانی خەبات بە سەر كەندو كۆسپە سەخت و قورسەكاندا زاڵ بێ‌. ‌ شارەزایی و لێزانی و سەداقەتی مامۆستا لە كاری سیاسیدا و بڕشتی لە بریاردان لە كاتە حەستەمەكاندا بوونە هۆی ئەوەی كە جەنابی مامۆستا ئیعتبارێكی گەورەی سیاسی بە جولانەوەی سیاسی و ماف خوازی كوردستان ببەخشێ وسازمانی خەبات ی كوردستانی ئێران وەك هێزێكی خاوەن پرنسیپ و بە بڕشتی سیاسی دەركەوێ‌ . مامۆستای نەمر فێری دەرسی مقاومەت و خۆراگری كردین و بە شێوەیەك باری هێناین كه خەباتكارێكی واقع بین و دور لە هەر جۆرە هەستێكی رەگەز پەرەستی بین. مامۆستای رێبەرو دامەزرێنەری سازمانی خەبات لە هەلومەرجێك و ساتە وەختێكدا كۆچی دوایی كرد كە زۆر دڵخۆش بوو بەوەی گەلی كورد بە مافەكانی دەگاو باوەری تەواوی بەو راستیە هەبوو كە دەسەلاتی نگریسی ئاخوندی هەر دەبێ‌ لە سەر حوكمی وولاتی ئێران برۆن و هیچ مەودایەك بۆ مانەوەی ئەو ستەمگەرانە لەئێراندا وجودی نیە. بەڵی مامۆستای خۆنەویست و نیشتمان وگەل خۆشەویست بەو هومێد زۆرەی كە بە هاتنه دیی ئازادی هەیبوو وبە دەیان وانەی گرینگ كە فێری هاوباوەرانی كرد مالئاوایی لێ‌ كردین و بۆ همیشه ئێمە رێبوارانی رێبازی سازمانی خەبات ی كوردستانی ئێران و ژمارەیەكی بەرچاو لە هاونیشتمانیانی كوردستانی غەمباركرد.

خەڵكی ستەملێكراوی كوردستان و ئێران!

 لە كاتێكدا یادی پێنجەمین ساڵرۆژی كۆچی دوایی رێبەری تێكۆشەر مامۆستاسەید جەلال حوسەینی دەكەینەوە،كە رژیمی ئاخوندی هەر وەك رابردوو درێژە بە سەركووتی خەڵكی ئێران بە تێكرا و هاونیشتمانیانی كوردستان بە تایبەتی دەداو كەم رۆژ هەیە لە ئێراندا حوكمی ئیعدامی كەسێك یا چەندین كەس جێ‌ بەجێ‌ نەكا.هەروەها تروریزمی رژیمی ئاخوندی و دەست تێوەردانی لە كاروباری ناوخۆیی وولاتانی ناوچەكە پەرەی سەندوەو لە ئێستادا ئاخوندان بە شێوەیەكی بەربلاوتر لە وولاتانی یەمەن،لوبنان،عێراق،و سوریە بە تایبەت و ژمارەیەك لە وولاتانی ناوچەكەدا بە تێكرا دەست تێوەردانی سەربازی دەكاو هێزی سپای پاسدارن بە ئاشكرا بەشداری جەنگی ناوخۆیی لەو وولاتانەدا دەكەن. هەروەها لە دوای رێكەوتنی وولاتانی 5+1 لە گەڵ رژیم جارێكی تر جامی ژهر لە لایەن رێبەری رژیم خورایەوە و لەهەمانكاتیشدا ئێمە پێمانوایە كە ئەو رێكەوتنە رێكەوتنێكی لەرزۆكەو ئەگەری هەیە رژیم پێبەندی بەشێك لە خاڵەكانی نەبێ‌. لەگەڵ ئەو راستیەی كە رێكەوتنی وولاتانی 5+1 لەگەڵ رژیم لەرزۆكە، بەلام ئاخوندان لەو هەڵە كەڵك وەردەگرن بۆ سەركووتی زیاتری خەڵكی ئێران و جینایەتی زیاتر بەرانبەر دانیشتوانی كوردستان پەرە پێ‌ دەدەن. سازمانی خەبات ی كوردستانی ئێران باوەری وایە دەسەڵاتداری ئاخوندی پێبەندی هیچ جۆرە رێكەوتنێك نابێ‌ و هەروەها دەست لە هەوڵەكانی بۆ دروست كردنی بۆمبی ئەتۆمی هەڵناگرێ‌. بێگومان رژیمی ئاخوندی رژیم و دەسەلاتێكی نامەشروعە و بە هیج جۆره رێكەوتن و سازانێك و ئیمتیازدان بە هێزو دەسەلاتە جیهانیەكان و هەرزان فرۆش كردنی سەرمایەی خەڵكی ئێران ناتوانی مەشروعیەت وەدەست بێنی.دەسەلاتی ئاخوندی هەر جۆرە فێڵ و چاوبەستێك لەگەڵ هێزو ناوەندە جیهانیەكان بەكار بێنێ‌ ناتوانێ‌ خۆی لە روخان و لە ناوچوون رزگار بكا. سەرەرای ئەوانەش سازمانی خەبات ی كوردستانی ئێران بەدرێژایی مێژووی خەباتی خوی چاوەروانی سیاسەت و ئاڵوگۆری هەڵوێستی دەرەكی نەبووە و خەباتی خۆمان گرێنەداوە بە قەدەر و پێشهاتەكانی نێودەوڵەتی و خەڵكی كوردستان دڵنیا دەكەینەوە كە لەسەر خەباتی رەوای نەتەوەیی و نیشتمانیان تا وەدەستهێنانی سەرجەم مافەكان بەردەوام دەبین و دڵنیایشن سەركەوتن بۆ خەڵكە و نەمان و رووخانیش بۆ ستەمگەران و دیكتاتورانە. 

لە پێنجەمین ساڵرۆژی كۆچی دوایی مامۆستا شێخ جەلال حوسەینی رێبەری داناو زانا، پەیمانی وەفاداری بە‌ ئامانج و رێبازی نوێ دەكەینەوە كە مامۆستا، لەسەریان پێ‌داگر بوو. رێبوارانی رێبازی سازمانی خەبات خۆیان بە ئەمەك داری رێنوێنی و كردوە نیشتمانی و ئازادیخوازیەكانی مامۆستا دەزانن . درودی بێ‌ پایان بۆ رۆحی سەربەرزی شەهیدانی سوورخەلاتی كوردستان درود بۆ گیانی پاكی مامۆستا سەید جەلال حوسەینی

سازمانی خەبات ی كوردستانی ئێران

بەرێوەبەری گشتی

بابەشیخ حوسەینی

30ی پووشپەری 1394

 
ڕێکه‌و 2015-07-25 21:37:40
به‌شی ( به‌یاننامه‌کان )







سیاسی