هەواڵەكانی كوردستان، ئێران و جیهان 6ی گەلاوێژی 1394 دارستانەكانی كێوی میراجی مەریوان لە ئاگردا سووتان

دارستان و لەوەرگاكانی كێوی میراجی سەر بە شاری مەریوان ئاوریان تێ بەردرا و زۆربەی ئەو دارستانانە لە ئاوردا سووتان. بە پێی راپۆرتی هەواڵدەرییەكان، رۆژی دووشەممە 5ی گەلاوێژی 1394، دارستانەكانی كێوی میراجی سەر بە شاری مەریوان ئاوریان گرت. بە پێی ئەم راپۆرتە، ئاورگرتنەكە بە شێوەێكی بەربڵاو بووە و ئاور بەرو لێرەوار و دارستانەكانی گوندی سەردۆش و سیاناو تەشەنەی سەندووە. لەم ئاورگرتنەدا بەشێكی بەرچاو لە دار بەرووەكانی ئەو ناوچەیە لە ئاوردا سووتان و دانیشتووانی ئەو ناوچەیەش بە هۆی نەبوونی ئیمكاناتی ئاوركوژێنەوە نەیانتوانیوە تا كاتی بڵاوكردنەوەی ئەم هەواڵە ئاورەكە كۆنترۆل بكەن. جێگەی باسە كە تاكوو ئێستا هۆكاری ئاورگرتنەكەی كێوی میراجی روون نەبووەتەوە و دانیشتوانی ناوچەكە دەست و پەیوەندەكانی رژێم بەو ئاورتێبەردانانە تاوانبار دەكەن. سەرۆكی سازمانی جەنگەڵبانی رژێمی ئاخوندی رایگەیاندووە كە ئاورگرتنی دارستانەكان لە ئەم ساڵدا 20 لەسەد بەرزبوونەوەی بە خۆیەوە دیوە.

 

 

 

 

 

 

 

 

دارستان و لەوەڕگەکانی چیای بەمۆ لەئاگردا سووتان

 رووبەرێکی زۆر لەلەوەڕگە و دارستانەکانی چیای بەمۆ لەئوستانی کرماشان لەئاگردا سووتان. بەپێی هەواڵی هەواڵدەریی کوردپا، رێکەوتی ٥ی گەلاوێژ، دارستان و لەوەڕگەکانی چیای بەمۆ لەناوچەی سەلاسی باوەجانی سەر بە ئوستانی کرماشان ئاگریان گرت و خەسارێکی بەرچاو بە ژینگەی ئەو ناوچەیە گەیشتووە. ئەو ئاگرکەوتنەوەیە بە هاوکاری خەڵکی ناوچەکە، چالاکانی مەدەنی و ژینگە پارێزیی دوای چەند کاتژمێر کونتڕۆڵ کراوە. لەماوەی یەک مانگی رابردوودا ئەوە چەندەمین جارە کە چیای بەمۆ ئاگر دەگرێت و لایەنە پێوەندیدارەکان هیچ هەوڵێکیان لەو بارەیەوە نەداوە. چیای بەمۆ بەشێکە لەزەنجیرە چیای زاگرۆس و بەرزاییەکەی هەزار و ٨٤٢ میترە. هەر لەو پەیوەندییەدا رێکەوتی ١ی گەلاوێژیش، دارستانەکانی گوندی "کوپانە"ی سەر بە بەخشی "باینگان"ی جوانڕۆ ئاگریان گرتبوو.

 

 

 

 

 

 

 

 

لەماوەی شەش مانگدا نزیک بە ٧٠٠ کەس لەئێران لەسێدارە دراون

رێکخراوی لێبوردنی نێودەوڵەتی لەتازەترین راپۆرتی خۆیدا رایگەیاندووە، لەماوەی شەش مانگی یەکەمی ساڵی٢٠١٥دا، ٦٩٤ کەس لەلایەن رێکخراوی زیندانەکان و دەزگا قەزاییەکانەوە حوکمی سێدارەکەیان بەڕێوە چووە.بەپێی راپۆرتی هەواڵدەرییەكان، لەتازەترین راپۆرتی رێکخراوی لێبوردنی نێودەوڵەتیدا ئاماژە بە لەسێدارەدانی ٦٩٤ کەس (بەفرانباری ١٣٩٣ ـ پووشپەڕی ١٣٩٤) کراوە و هاوکاتیش ئەو رێکخراوەیە نیگەرانی جیدی خۆی لەچوونە سەری رێژەی ئێعدامەکان دەربڕیوە. بەپێی ئەو ئامارە رۆژانە بەشێوەی نێوەنجی سێ کەس لەئێران حوکمی سێدارەیان جێبەجێ کراوە. جێگەی باسە كە، لەماوەی شەش مانگی یەکەمی ساڵی ٢٠١٥(بەفرانباری ١٣٩٣ ـ پووشپەڕی ١٣٩٤) ٣٩ هاووڵاتی کوردیش لە زیندانەکانی ئێران بە تاوانی جۆراوجۆر لەسێدارە دراون. هەر لەو ماوە زەمەنییەدا بێجگە لەو ٣٩ حاڵەتە، چوار زیندانی سیاسیش بە ناوەکانی سابیر موخەلید ماوانە، عەلی و حەبیب ئەفشاری و مەنسوور ئاروەند لەلایەن دەزگاقەزایی و رێکخراوی زیندانەکانەوە حوکمی سێدارەدانیان بەڕێوە چووە. لەو بارەیەوە "سەعید بوومەدووحە" جێگری بەرنامەرێژی رۆژهەڵاتی ناڤین لەرێکخراوی لێبوردنی نێودەوڵەتی وتوویەتی:" ماشێنی کوشتاری قەزایی ـ حکوومەتیی لەئێران رەکابەری نیە". لەراپۆرتەکەی ئەو رێکخراوە جیهانییەدا هاتووە، ئەگەری ئەوە هەیە، هەتا کۆتایی ساڵی ٢٠١٥، رێژەی لەسێدارەدانەکان هەزاران حاڵەت تێپەڕێنێت. ئەو رێکخراوە مافی مرۆڤییە باسی لەوەش کردووە، حوکمی لەسێدارەدان لەمانگی رەمەزاندا لەئێران ناشەرعی و قەدەغەیە، بەڵام هەر لەو مانگەدا ٤ کەس لە سێدارە دراون.

 

 

 

 

 

 

 

 

 سوپای تورکیە هێرشی كردەسه‌ر بنکه‌ی هێزه‌ کوردییه‌کانی سووریا 

یه‌کینه‌کانی پاراستنی گه‌ل سه‌ر به‌ پارتی یه‌کێتی دیموکراتیکی کوردی سووریا ئه‌مڕۆ ڕایگه‌یاند: سوپای تورکیە یه‌کێک له‌ گونده‌کانی باکووری سووریا له‌ نێزیکی تورکیای گوله‌باران کردووه‌ و ته‌قه‌ی کردووه‌ له‌ ئۆتۆمبێلێکی ئه‌م گرووپه‌دا. به‌پێی راپۆرتی هەواڵدەرییەكان، سوپای توركیە گوله‌بارانی گوندی سنووری زۆرمقاری كرد و ته‌قه‌یان لە ئۆتۆمبێلێکی YPG كرد. YPG بۆچوونی خۆی له‌باره‌ی خه‌ساری ئه‌م هێرشه‌ ڕانه‌گه‌یاندووه‌ به‌ڵام ڕێکخراوی چاودێری مافی مرۆڤی سووریا به‌ پشتڕاست کردنه‌وه‌ی هێرشی تورکیە ڕایگه‌یاندووه‌: 4 که‌س به‌هۆی ئه‌م ڕووداوه‌وه‌ بریندار بوونه‌. یه‌کینه‌کانی پاراستنی گه‌ل داوای له‌ تورکیا کردووه‌ توندوتیژی ڕابگرێت و یاسا و ڕێسا نێوده‌وڵه‌تییه‌کان ڕچاو بکات. تورکیە له‌ دوو ڕۆژی ڕابردوودا هاوکات له‌گه‌ڵ هێرشی ئاسمانی بۆ سه‌ر مۆڵگه‌کانی داعش له‌ سووریا، ده‌ستی داوه‌ته‌ هێرشی ئاسمانی و زه‌وینی بۆ سه‌ر بنکه‌ و باره‌گه‌ی په‌که‌که‌ له‌ باکووری هه‌رێمی کوردستان.

 

 

 

 

 

 

 

 

زیاتر لە 9 ملیۆن نەخوێندەوار لە ئێران بوونی هە یە

لە نوێترین راپۆرتی بانكی ناوەندی رژێمی ئاخوندی پشتراست كراوەتەوە كە زیاتر لە 9 ملیۆن نەخوێندەوار لە ئێران بوونیان هەیە. بە پێی راپۆرتی هەواڵدەرییەكان، بانكی ناوەندی رژێمی ئاخوندی رۆژی دووشەممە 5ی گەلاوێژ بە بڵاوكردنەوەی راپۆرتێك رایگەیاند كە، 11.2، لەسەد لە كەسانی شەش ساڵ بۆ سەرەوە لە ئێران نەخوێندەوارن كە هیچ سەوادێكیانه نهییە. یەك نیو لەسەد تەنیا دەتوانن بخوێنن و بنووسن، 21 لەسەد مەدرەكی سەرەتاییان هەیە و نزیك بە 43 لەسەد خاوەنی مەدرەكی ناوەندین و 22 لەسەد خوێندنی زانكۆیان هەیە. هەر بە پێی ئەم راپۆرتە، عەلی باقرزادە بەرێوەبەری نێهزەتی سەوادئامووزی، رێژەی ئەو كەسانەی كە هیچ سەوادێكیان نییە 9 ملیۆن و 456 هەزار كەس راگەیاندووە و وتی، منداڵانی كرێكار، منداڵانی كەمئەندام و بێ سەرپەرستان ئەو كەسانەن كە ناتوانن لە ئێران بخوێنن.

 

 

 

 

 

 

 

 

كۆبوونەوەی نارەزایەتی لە بەحرەین دژ بە رژێمی ئاخوندی

خوێندكارانی زانكۆكانی بەحرەین و پەنابەرانی دانیشتووی ئەو وڵاتە لەمەر دەستێوەردانەكانی رژێمی ئاخوندی لە كاروباری ولاتانی عەرەبی نارەزایەتی توندیان نیشان دا. بە پێی راپۆرتی هەواڵدەرییەكان، رۆژی دووشەممە 5ی گەلاوێژی 1394، خوێندكاران و پەنابەرانی دانیشتووی بەحرەین دەستێوەردانەكانی رژێمی ئاخوندییان لە كاروباری ناخۆیی وڵاتانی عەرەبی و بە تایبەت وڵاتی بەحرەینیان بە توندی مەحكوم كرد. بە پێی ئەم راپۆرتە، بەشداربووانی خۆپیشاندانەكە پشتیوانی خۆیان لە كردەوەكانی دەوڵەتی بەحرەینیان لە راستای پاراستنی ئەمنییەت و ئاسایشی گشتی نیشان دا. جێگەی باسە كە یەكێك لە بەشداربووانی نارەزایەتییەكە رایگەیاند، رژێمی ئاخوندی بە جێگای دەستێوەردان لە كاروباری ناوخۆیی بەحرەین بروات ژیانی خەڵكەكەی باش بكات، ئەو خەڵكەی كە لە هەژاری و بێسەوادی زەجر دەكێشن.

 

 

 

 

 

 

 

 

وەزارەتی دەرەوەی ئەمریكا: رژێمی ئاخوندی لە لیستی رەشی قاچاخی مرۆڤدایە

وەزارەتی دەرەوەی ئەمریكا لە راپۆرتی ساڵانەی قاچاخی مرۆڤ كە رۆژی دووشەممە 5ی گەلاوێژ بڵاوی كردەوە، جارێكیتر رژێمی ئاخوندی خستە ناو لیستی رەشی قاچاخی مرۆڤەوە. بە پێی راپۆرتی هەواڵدەرییەكان، رژێمەكانی، كوریای باكوور، سووریە و روسیە لەگەڵ رژێمی ئاخوندی لە لیستی رەشی قاچاخی مرۆڤدان. بە پێی ئەم راپۆرتە، جان كێری وەزیری دەرەوەی ئەمریكا وتی، ئامانجی ئەم راپۆرتە هاوئاهەنگی جیهانییە بە مەبەستی بەرەو روو بوونەوە لەگەڵ قاچاخی مرۆڤ. جێگەی باسە كە سازمانی نەتەوەیەكگرتووەكان بەراوەردی كردووە كە، قازانجی قاچاخی مرۆڤ لە ساڵێكدا 150 میلیارد دۆلار دەبێت.
ڕێکه‌و 2015-07-28 16:02:02
به‌شی ( هه‌واڵی کوردستان )







سیاسی