هەواڵەكانی كوردستان، ئێران و جیهان 16ی گەلاوێژی 1394  

خوسوتاندنی دوو ژن لەشارەکانی مەریوان و شنۆ

لەشارەکانی مەریوان و شنۆ دوو ژن بە هۆی کێشەی کۆمەڵایەتی و خێزانییەوە ئاگرییان لەجەستەی خۆیان بەرداوە و کۆتایی بە ژیانیان هاتووە. بەپێی هەواڵی هەواڵدەریی کوردپا، چەند رۆژ لەمەوبەر ژنێکی خەڵکی شاری مەریوان خۆی سووتاندووە و بە هۆی زۆری رێژەی سووتانەکەی کۆتایی بە ژیانی هاتووە. ئەو ژنە ناوی فاتمە و کچی ئەحمەد و دانیشتووی گەڕەکی "مووسک ٢" بووە. دەگوترێت کە ئەو ژنە دەستگیراندار بووە و بە هۆی دەسکورتی و هەژارییەوە دەستی داوەتە خۆکوژی. لەلایەکی دیکەوە ژنێکی دیکەی کوردی خەڵکی ئاوایی کانی سپی شنۆ کۆتایی بە ژیانی خۆی هێناوە.ئەو ژنە تەمەنی ٢٥ ساڵ و خەڵکی ئاوایی کانی سپی ناوچەی دەشتەبێڵی شنۆ بووە. دەوترێت کە ئەو ژنە کوردە بە هۆی کێشەی کۆمەڵایەتییەوە ئاگری لەجەستەی خۆی بەرداوە و دوای چەند رۆژ مانەوەی لەنەخۆشخانەی شاری ورمێ گیانی لەدەست داوە.

 

 

 

 

 

 

 

 

ناروونی چارەنووسی چوار مامۆستای ئایینی دوای 17 رۆژ دەستبەسەری

پاش تێپەربوونی١٧رۆژ لەدەستبەسەر کردنی چوار مامۆستای ئاینیی خەڵکی شاری بۆکان لە لایەن هێزە ئەمنیەتییەکانی ئەو شارەوە، هەتا ئێستا هیچ زانیارییەک لە سەر چارەنووسیان لەبەر دەستدا نیە. بەپێی راپۆرتی هەواڵدەرییەكان، پاش تێپەڕینی چەند رۆژ لەجێژنی رەمەزان، چوار مامۆستای ئاینیی کوردی خەڵکی شاری بۆکان کە یەکێکیان پێشنوێژی گوندی " تیشمە" بووە، لەلایەن هێزەکانی سەر بە ئیتلاعاتەوە دەستبەرسەر کراون. دەوترێت  هێزە ئەمنیەتییەکان بە تۆمەتی راگەیاندنی پێشوەختەی جێژنی رەمەزان، ئەو چوار مامۆستایەیان دەستبەسەر کردووە سەرەڕای بەدواداچوونی بنەماڵە و نزیکانی ئەو چوار مامۆستا کوردە بۆ ناوەندە ئەمنیەتییەکانی شارەکانی بوکان، مەهاباد، میاندواو و ورمێ، هەتا ئێستا لە شوێنی راگرتنی ئەو هاووڵاتیانە هیچ زانیارییەک لەبەردەستدا نیە. هەتا کاتی بڵاکردنەوەی ئەو هەواڵە شوناسی ئەو چوار مامۆستا کوردە روون نەبووەتەوە.

 

 

 

 

 

 

 

 

زه‌ڕگڵی بنکه‌ی په‌که‌که‌ نییه‌؛ شوێنی ژیانی خه‌ڵکی مەدەنییه 

هەیئەتی پارتی دیموکراتیکی گه‌لان که‌ بۆ تاوتوێ کردنی هه‌واڵه‌ بڵاوکراوه‌کان له‌باره‌ی کوژرانی خه‌ڵکی مەدەنی به‌هۆی بۆردومانی ئاسمانی فڕۆکه‌ شه‌ڕکه‌ره‌کانی تورکیاوە بۆ سه‌ر بنکه‌ و باره‌گای په‌که‌که‌ له‌ هه‌رێمی کوردستان، سه‌ردانی گوندی "زه‌ڕگڵی"یان کردبوو له‌ یه‌که‌مین ڕاپۆرتی خۆیاندا ڕایانگه‌یاند: زه‌ڕگڵی بنکه‌ی په‌که‌که‌ نییه‌ و شوێنی ژیانی خه‌ڵکی مەدەنییە و سوپای تورکیا ده‌ستی داوه‌ته‌ کوشتنی خه‌ڵکی سڤیل له‌و ناوچه‌یه‌دا. به‌پێی راپۆرتی هەواڵدەرییەكان، هەیئەتی پارتی دیموکراتیکی گه‌لان پێکهاتووه‌ له؛ عوسمان بایده‌میر نوێنه‌ری شاری شانلی ئۆرفا له‌ په‌رله‌مانی تورکیا، قادر ییڵدیریم نوێنه‌ری شاری سێرت و هودا کایا نوێنه‌ری شاری ئه‌سته‌نبۆڵ له‌ په‌رله‌مانی تورکیا سه‌ردانی ئه‌و ناوچه‌یه‌یان کردبوو. عوسمان بایده‌میر به‌ نوێنه‌رایه‌تی له‌ وه‌فدی HDP و له‌ یه‌که‌مین ڕاپۆرتی خۆیدا ئاشکرای کرد: کوشتوبڕێک که‌ لێره‌دا ئه‌نجام دراوه‌ دایکانی خه‌مبار کردووه‌. وه‌کوو نوێنه‌رێکی کوردستانی تورکیا سه‌ره‌خۆشی ده‌که‌م له‌ سه‌رجه‌م ئه‌و بنه‌ماڵانه‌ که‌ ڕۆڵه‌کانیان له‌ ده‌ست داوه‌.

 

 

 

 

 

 

 

 

نامەی زانیار مۆرادی دوای شەش ساڵ لە زیندان

زانیار مۆرادی زیندانی سیاسی كوردی مەحكوم بە ئێعدام لە زیندانی رەجایی شار، لە سەرەتای حەوتەمین ساڵی زیندانیكردنی نامەێكی روو لە ناوەندەكانی مافی مرۆڤ و رای گشتی نووسیوە. بە پێی راپۆرتی هەواڵدەرییەكان، زانیار و لۆقمان مۆرادی لە كاتێكدا بە تۆمەتی كوشتنی كۆری ئیمام جۆمعەی مەریوان بە ئێعدام مەحوكم كراون، كە ئەم تۆمەتە چەندین جار لە لایەن ئەم دوو گیراوە كوردەوە رەد كراوەتەوە. بە پێی ئەم راپۆرتە، زانیار لە نامەكەیدا نووسیویە، لە بیرمە كە لە رۆژە سەرەتاییەكان لە گرتووخانەی ئیتلاعاتی سنە خەبەرێك لە پەتی سێدارە نەبوو تەنیا ئێش و ئازاری شكەنجە بوو كە چیتر نەمدەتوانی تەحەمۆڵی بكەم. ئاواتم ئەوە بوو كە هەرچی زووتر لەو بارودۆخە رزگارم بێت، ئێستاكە شەش ساڵ تێپەریوە. ئێستا یەك ساڵ بەسەر ئەو رۆژەدا تێپەریوە كە لە دادگا قازی وتی كە بە هۆی تەواوو نەبوونی پەروەندەوە ناتوانم حوكم بدەم، سالێكە ئێمە چاوەروانی ئەوەین كە راستییەكان روون ببنەوە. بە راستی نازانم وڵامی ئەم هەموو زۆڵم و زۆرە چ كەسێك دەیداتەوە و چ كەسێك دەردی دایكانی زامدار دەرمان دەكات. زانیار لە كۆتایی نامەكەیدا نووسیویە كە هیوادارم كە بە زوویی دادگاێكی عادڵانە بەرێوە بچێت و ئێمە لەم بارودۆخە نالەبارە رزگارمان بێت.

 

 

 

 

 

 

 

 

خراپی باری تەندرۆستی محمەد سدیق كەبوودوەند لە زیندان

لە دوای دابەزینی زۆری زەختی محمد سدیق كەبوودوەند باری تەندرۆستی لە زیندان بەرەو خراپی رۆیشتووە

. بە پێی راپۆرتی هەواڵدەرییەكان، رۆژی چوارشەممە 14ی گەلاوێژی 1394، لە دوای دابەزینی زەختی كەبودوەند كەوتە حاڵەتی نیوە بێهۆشییەوە. بە پێی ئەم راپۆرتە، پەریناز باغەبانی حەسەنی هاوسەری كەبودوەند رایگەیاندووە كە، هاوسەرەكەی سەرەرای كێشەی جەستەیی لە پێراگەیشتنی پزشكی بێبەشە و تەنیا پێراگەیشتنێكە پێی دەكرێت حەبی ئارامبەخشە كە لە دەرمانگای زیندانەوە پێی دەدەن و ناوبراوو دەتوانێت دەردەكانی تەحەمۆڵ بكات. جێگەی باسە كە ئەم چالاكەی زافی مرۆڤە لە ماوەی 9 ساڵی رابردوو تەنیا یەك جار و ئەویش دوای مانگرتنی بۆ ماوەێكی درێژ توانی بۆ ماوەێكی كۆرت بێتە دەرەوە لە زیندان.

 

 

 

 

 

 

 

 

هەرەشەی ولایەتی: هەموو شارەکانی ئیسرائیل وێران دەكەین

عەلی ئەکبەر ولایەتی، راوێژکاری خامنەیی رایگەیاند، ئیسرائیل لە بەرامبەر ئێران بێ دەسەڵاتە و ئەگەر ئیسرائیل بچوکترین هەڵە بەرامبەر ئێران ئەنجامبدات، هەموو شارەکانی وێران دەکرێت. بە پێی راپۆرتی هەواڵدەرییەكان، ولایەتی وتی کە نزیکترین نەتەوەکان بە ئێرانییەکان عەرەبن و ئێستا تەنانەت ئێرانییەکیش لە یەمەن نییە و، رایگەیاند "لە بواری کەرەستەی بەرگری، ئێران مۆڵەت لە کەس وەرناگرێت". پاش رێککەوتنی ئەتۆمی ئێران لەگەڵ وڵاتانی پێنج کۆ یەک لە ویەن، بەرپرسانی سوپای پاسدارانی رژێمی ئاخوندی و فەرماندەی گشتی سوپای ئێران، هەریەک لە قسەکانیان وێرای هەرەشە لە وڵاتانیتر و بە تایبەت ئیسرائیل وتاوویانە  کە وڵاتەکەیان ئامادەی بەرگری سەربازییە لە بەرامبەر هەر هێرشێکدا. ئەمەش دوای ئەوە دێت، کە بنیامین ناتانیاهۆ، سەرۆکوەزیرانی ئیسرائیل وەک کاردانەوەیەک بەرامبەر بە دانوستاندنە ئەتۆمییەکانی ئێران، ئەو رێککەوتنەی بە رێککەوتنێکی خراپ لەقەڵەمدابوو.

 

 

 

 

 

 

 

 

لێبوردنی نێودەوڵەتی: لە ساڵی 2015 رۆژانە سێ کەس لە ئێران لەسێدارەدراون

رێکخراوی لێبوردنی نێودەوڵەتی لە بەیاننامەیەکدا رایگەیاندووە، رێژەی لەسێدارەدان لە نیوەی یەکەمی ئەمساڵدا لە ئێران بەڕێژەیەکی بەرچاو زیادیکردووە. بە پێی راپۆرتی هەواڵدەرییەكان، لە بەیاننامەکەدا هاتووە، لە 6 مانگی یەکەمی ساڵی 2015 دا 694 کەس لە ئێران لەسێدارەدراون کە ئەمەش ئەوە پیشان دەدات رۆژانە 3 کەس لەسێدارەدراون. رێکخراوەکە رایگەیاندووە، لەگەڵ بەردەوامبوونی ئەم پرسە، چاوەڕواندەکرێت ژمارەی لەسێدارەدانەکان لە ئێران تا کۆتایی ئەمساڵ هەزار کەس تێپەڕێنێت و بەمەش ژمارەی پێوانەیی دەشکێنێت. رژێمی ئاخوندی ئێران، کە لەپاش چین زۆرترین ئاماری لەسێدارەدانی هەیە بەپێی رێکخراوە لێبوردنی نێودەوڵەتی، ساڵی رابردوو 743 کەسی لەسێدارەدراوە.

 

 

 

 

 

 

 

 

له‌ سعودیه‌وه‌، هێرشی‌ وشكانی‌ بۆسه‌ر یه‌مه‌ن ده‌ستیپێكرد

سه‌رچاوه‌ سه‌ربازیی‌ و خێڵه‌كییه‌كان، ته‌ئكیدیان له‌سه‌ر ئه‌و په‌ره‌سه‌ندنه‌ سه‌ربازیانه‌ كرده‌وه‌ كه‌ له‌ سنوره‌كانی‌ نێوان یه‌مه‌ن و سعودیه‌ هاتنه‌به‌ر و به‌و وته‌ی‌ ئه‌و سه‌رچاوانه‌ش، هێرشی‌ وشكانی‌ سعودیه‌ به‌ پاڵپشتی‌ سه‌دان تانك و هێزێكی‌ زۆری‌ یه‌مه‌نی‌ بۆ رووبه‌ڕوونه‌وه‌ی‌ حوسییه‌كان و هێزه‌كانی‌ سه‌ر به‌ عه‌لی‌ عه‌بدوڵڵا ساڵح سه‌رۆكی‌ پێشوو،  سنوره‌كانیان به‌زاندووه‌ و به‌ره‌و نێو خاكی‌ یه‌مه‌ن به‌ڕێكه‌وتوون. بە پێی راپۆرتی هەواڵدەرییەكان، سه‌رچاوه‌یه‌كی‌ سه‌ربازیی‌ یه‌مه‌نی‌ رایگه‌یاند: "زیاتر له‌ 100 زریپۆش و تانك و هێزێكی‌ سه‌ربازی‌ زۆر، له‌ خاڵی‌ سنوری‌ وه‌دیعه‌ له‌ پارێزگای‌ شروده‌ی‌ سعودیه‌، به‌ره‌و نێو خاكی‌ یه‌مه‌ن په‌ڕینه‌وه‌". وتیشی‌: "ئه‌و هێزانه‌ به‌ره‌و مه‌ئره‌ب و شبوه‌ له‌ باشووره‌وه‌، بۆ پاڵپشتی‌ هێزه‌كانی‌ مقاوه‌مه‌ كه‌ دژ به‌ حوسییه‌كان شه‌ڕ ده‌كه‌ن، به‌ڕێكه‌وتوون". 
ڕێکه‌و 2015-08-07 14:31:33
به‌شی ( هه‌واڵی کوردستان )







سیاسی