هەواڵەكانی كوردستان، ئێران و جیهان 27ی گەلاوێژی 1394  

بەرهەمی "بوستان سعدی" وەرگێڕدرایە سەر زمانی کوردی

نووسەر و شاعیرێکی خەڵکی شاری سەقز کتێبی ئەدەبیی ـ شێعریی بووستانی سەعدی لەفارسیەوە وەرگێڕاوەتە سەر زمانی کوردی. بەپێی هەواڵی هەواڵدەریی کوردپا، مامۆستا عومەر ساڵحی ساحێب ئەرکی وەرگێڕانی کتێبی کۆمەڵە شێعری بووستانی سەعدی لەژێر ناوی " میر گولانی ژین" گرتووەتە ئەستۆ.مامۆستا عومەر ساڵحی ساحێب ناسراو بە( کۆلیل) ئەو کتێبەی لە ١٠ بەشدا وەرگێڕان کردووە و ماوەی سێ ساڵێشی بۆ ئەو بەرهەمە تەرخان کردووە. کتێبی میر گوڵانی ژین لەلایەن چاپەمەنی زانکۆی کوردستانەوە لە ٣٠ هەزار تیراژدا لەچاپ دراوە. مامۆستا عومەر ساڵحی ساحیب (كۆلیل) ساڵی ١٣٢٤ی هەتاوی لەگوندی "دایە سلێمان"ی سەر بە بەخشی زێویەی شاری سەقز لەدایك بووە. هەتا ئێستا سێ بەرهەمی دیكەی بەناوەكانی " تاڤگەی ئەڤین، لە هەر چیمەنێ‌دیمەنێ‌و دوو بەیتییە كوردییەكان" لە بواری شێعردا چاپ و بڵاو كردووەتەوە.

 

 

 

 

 

 

 

 

گەڵاڵەی ناوەندە حکوومەتییەکان کەڵەکێوی زەرد بەرەو فەوتان دەبات

گەڵاڵەی راگواستنی کەڵەکێوی زەرد لەکوردستانەوە بۆ ناوچەکانی دیکەی ئێران نیگەرانی چالاکان و داکۆکیکارانی "ژینگەی ئاژەڵان (حیات وحش)"ی لێکەوتووەتەوە. بەپێی راپۆرتی هەواڵدەریی کوردپا، رێکەوتی ٢٥ی گەڵاوێژ، ژمارەیەک کەڵەکێوی زەرد لەناوچە پارێزراوەکانی " مانێشت و قەڵارەنگ"ی ئیلامەوە بۆ ئوستانی یەزد گوازرانەوە. گواستنەوەی ئەو کەڵەکێویانە لەسەر بڕیاری رێکخراوی ژینگەپارێزی لەسەرەتای ئەمساڵدا دەرکراوەو کە سەرجەم ١٢کەڵەکێوی لەخۆ دەگرێت. بەرپرسێکی حکوومەتی لەوتووێژ لەگەڵ ماڵپەڕی مانێشت و قەڵارەنگ هۆکاری ئەو راگوێزرانەی گەڕاندووەتەوە بۆ زیادکردنی رێژەی "زاوزێ" و لەهەمان کاتیشدا باسی لەنەبوونی شوێنی پێویست بۆ راگرتنی ئەو کەڵەکێوییانە کردووە. بە باوەڕی کارناسان، گواستنەوەی ئەو کەڵەکێوییانە لەکاتێک دایە کە دارستان و لێڕەوارەکانی زاگرۆس و دارستانەکانی باشووری کوردستانی ئێران باشترین شوێن بۆ ئەو ئاژەڵانەیە و ئەو پرسە نیگەرانی چالاکان و داکۆکیکارانی ژینگەپارێزی و ژینگەی ئاژەڵانی لێکەوتووەتەوە. لەچەند مانگی رابردوو راوکردنی لەرادەبەدەر و ئاگرکەتنەوە لەناوچە دارستانییەکانی ئوستانی ئیلام بە تایبەتی مانێشت و قەڵارەنگ کەشوێنی ژیانی ئاژەڵ و گیانلەبەرانە رووی لەزیادبوون کردووە و ناوەندە پەیوەندییدارەکانی حکوومەتی لەو بارەیەوە هیچ هەنگاوێکیان بۆ چارەسەریی هەڵنەگرتووە.

 

 

 

 

 

 

 

 

کێری: ئێران بە چەندین ساڵیش ناتوانێ چەکی ئەتۆمی بشارێتەوە

لە رێککەوتنی ئەتۆمیی نێوان ئێران و رۆژئاوادا، ماوەی ٢٤ رۆژ دەرفەت دراوە بە ئێران، کە پێش چوونی چاودێران و کارناسانی ئاژانسی ئەتۆمی بۆ پشکنینی دامەزراوە ئەتۆمییەکانی ئەو وڵاتە خۆی ئامادە بکات.  بقە پێی راپۆرتی هەواڵدەرییەكان، ئەمە یەکێک لە خاڵانەی رێککەوتنە ئەتۆمییەکەی نێوان ئێران و رۆژئاوایە، کە بنیامین نەتانیاهۆ بە توندی دژایەتیی دەکات و بڕوای وایە کە ئێران لەو دەرفەتە ٢٤ رۆژیەدا دەتوانێ هەموو نهێنیەکانی پەوەندیدار بە تاقیکاری و بەرنامە ئەتۆمییە قەدەغەکراوەکان بشارێتەوە. بەڵام جان کیری ئەو نیگەرانییە بە نەگونجاو دەزانێت و دەڵێت "چەک و تاقیکارییەکانی پەیوەندیدار بە چەکی ئەتۆمی شتێک نییە، کە بە ٢٤ رۆژ و بگرە بە چەندان ساڵیش بشاردرێتەوە. تەنانەت ئەگەر ئەو شتانە بنخاکیش بکرێن و سەریان کۆنکرێت بکرێت، هێشتا هەر شیاوی دۆزرانەوە و ئاشکرا بوونن".وەزیری دەرەوەی ئەمریکا باسی ئەوەشی کرد، کە شێوازێکی نوێ بۆ چاودێریکردن جێگای کارناسانی رێکخراوی نەتەوە یەکگرتووەکان دەگرێتەوە و ئەمریکا و هاوپەیمانانی چاودێرییەکی زیاتر دەخەنە سەر چالاکیی ئەتۆمیی ئێران. 

 

 

 

 

 

 

 

 

وەزیری راگەیاندنی سووریا: تورکیا شەڕی کورد دەکات نەک داعش

وەزیری راگەیاندنی سووریا رایدەگەیێنێ " تورکیا نایەوێت شەڕی داعش بکات، بەڵکو ئامانجی شەڕکردنە لەگەڵ کورد". جەختیشدەكاتەوە كە سووریا پاڵپشتی لە هەرلایەنێک دەکات رووبەڕووی داعش ببێتەوە.بە پێی راپۆرتی هەواڵدەرییەكان، عیمران زوعبی، وەزیری راگەیاندنی سووریا رایگەیاند" رەجەب تەییب ئەردۆغانی سەرۆکی تورکیا نایەوێت شەڕ لەگەڵ داعش بکات، بەڵکو ئامانجی شەڕکردن و رووبەڕووبوونەوەیە لەگەڵ کوردانی سووریا و عێراق و تورکیا". زوعبی وتیشی" حکومەتی سووریا لەگەڵ بژاردەی دانوستاندنە لەگەڵ ئۆپۆزیسیۆنی میانڕەوی سووریا". داواشی لە لایەنە ئۆپۆزیسیۆنەکانی سووریا کرد، بەمەبەستی دانوستاندن و گفتوگۆکردن ریزەکانیان یەکبخەن. زیاتر لە 4 ساڵە شەڕی نێوخۆ لە سووریا بەردەوامە، تاوەکو ئێستاش چەندین هەزار کەس لە دانیشتووانی سووریا کوژراون و ئاوارەبوونە، ئەگەرچی هەوڵە نێودەوڵەتییەکان بۆ چارەسەرکردنی قەیرانی سووریا بەردەوامن، بەڵام تاوەکو ئێستا نەیانتوانیوە رێگەچارەیەک بۆ ئەو قەیرانە بدۆزنەوە.

 

 

 

 

 

 

 

 

كۆبوونەوەی بنەماڵەی زیندانیانی سیاسی لە بەردەم دیوانی عەداڵەتی رژێم

بنەماڵەی بەشێك لە زیندانیانی سیاسی لە بەردەم دیوانی بە ناو عەداڵەتی رژێمی ئاخوندی كۆبوونەوە. بە پێی راپۆرتی هەواڵدەرییەكان، كاتژمێر 10ی ئەمرۆ سێشەممە 27ی گەلاوێژی 1394، كۆمەڵێك لە بنەماڵەی زیندانیانی سیاسی كە حۆكمی هەتاهەتایی و درێژماوەیان بەسەردا سەپاوە، لە بەردەم دیوانی بە ناو عەداڵەتی رژێمی ئاخوندی لە شەقامی بەهەشتی تاران بە نیشانەی نارەزایەتی بەو حۆكمانەی كە بە رۆڵەكانیان دراوە كۆبوونەوە و خوازیاری پێداچوونەوە بە پەروەندەكانیان بوون.

 

 

 

 

 

 

 

 

 

مەرگی 352 كرێكار لە سێ مانگی یەكەمی ئەمساڵ

سازمانی پزشكی قانوونی رژێمی ئاخوندی رایگەیاند كە لە سێ مانگی سەرەتایی ئەمساڵدا 352 كرێكار بە هۆی رووداوی كارەوە گیانیان لە دەست داوە. بە پێی راپۆرتی هەواڵدەرییەكان، بە پێی ئەم ئامارەی پزشكی قانوونی رژێم، لەو رێژەیە شاری تاران بە 70 كەس و خۆراسانی رەزەوی بە 28 كەس زۆرترین ئاماری كوژراوانی رووداوی كاریان تۆمار كردووە. بە پێی ئەم راپۆرتە، هەر لەو ماوەیەدا زیاتر لە 3 هەزار كرێكار بە هۆی رووداوی كارەوە بریندار بوون. جێگەی باسە كە نەبوونی پێداویستی ئیمەنی كار یەكێكە لەو پێشێلكارییانەی كە دەرحەق بە مافی كرێكاران لە ئێران روو دەدات و ساڵانە سەدان كەس دەبنە قۆربانی.

 

 

 

 

 

 

 

 

داود ئۆغلۆ: پێكهێنانی‌ حكومه‌ت شكستیهێنا

ئه‌حمه‌د داود ئۆغڵۆ سه‌رۆكی‌ پارتی‌ داد و گه‌شه‌پێدان رایگه‌یاند، ده‌وڵه‌ت باخچه‌لی‌ سه‌رۆكی‌ پارتی‌ ناسیونالیستی‌ توركیا، ره‌تیكرده‌وه‌ حكومه‌تی‌ كاتی‌ له‌گه‌ڵ پارته‌كه‌یدا پێكبهێنێت.  بە پێی راپۆرتی هەواڵدەرییەكان، داود ئۆغڵۆ، ئاماژه‌ی‌ به‌ كۆتایهاتنی‌ هه‌موو ئه‌و گفتوگۆیانه‌ كرد كه‌ له‌گه‌ڵ پارته‌ سیاسییه‌كاندا بۆ گه‌یشتن به‌ ده‌ره‌نجامی‌ پێكهێنانی‌ حكومه‌تێكی‌ ئیئتیلافی‌، ئه‌نجامیدابوون.    بە پێی ئەم راپۆرتە، پێشتر ئاماژه‌ی‌ بۆ ئه‌گه‌ری‌ ئه‌نجامدانی‌ هه‌ڵبژاردنی‌ پێشوه‌خت كرابوو له‌ پایزی‌ داهاتوو. جێگەی باسە كە، مۆڵه‌تی‌ راسپاردنی‌ داود ئۆغڵۆ بۆ پێكهێنانی‌ حكومه‌ت له‌گه‌ڵ كۆتایهاتنی‌ ئه‌و 45 رۆژه‌دا ته‌واو ده‌بێت كه‌ 23ی‌ ئه‌م مانگه‌ ده‌كات. 
ڕێکه‌و 2015-08-18 16:59:47
به‌شی ( هه‌واڵی کوردستان )







سیاسی