5ی خەرمانان دەسپێكی خەباتێكی پڕسەروەری  

 جووڵانەوەی مافخوازانەی خەڵكی كوردستان جووڵانەوەیێكی بەرینی سیاسی ورۆشنبیری وكۆمەڵایەتی وئابووری یە كە ڕیشەی دەگەرێتەوە بۆ قوڵایی مێژوو. لە ماوەی ئەم خەباتە شۆڕشگێرانەیەدا گەلێك شۆڕش وبەرخودانی جۆراوجۆر سەری هەڵداوە و لەسەر رێچكەی خەباتی نەتەوەیی و نیشتمانی وچینایەتی ئەم كاروانەیان بردۆتە پێش. لە ڕەوتی خەباتی خەڵكی كوردستان كە ماوەی زیاتر لە سەدەیێكە خۆی لە موبارزەیێكی مودێڕندا بینیوەتەوە و ئەم شۆڕشە خۆی داماڵیوە لە جووڵانی خێڵەكی و لەسەر رێگەی ئازادی ودیموكراسی وپرۆسەی بە دەوڵەت بوون جێگەی گرتوە، بەرگێكی دیكەی بە هەوڵدان بۆ خواستە ڕەواكانمان پۆشیوە. سازمانی خەباتی كوردستانی ئێران كە هێزێكی مۆدێڕنی نیشتمانیە،بیرو ئەندیشەی بۆ ڕزگار بوون لە ژێر دەستی،بیرێكی ئازادیخوازانەیە كە لەگەڵ هەوڵدان بۆ ڕزگاری نەتەوەیی ونیشتمانی،هەوڵی بەرجەستە كردنی خەباتی سەربەستانەی ژنان وتێكرای كۆمەڵگەی مرۆڤایەتیەتیە و پێی وایە بە بێ ئاورنەِدانەوە لە مافی مرۆڤ ولێك هەڵتەكاندنی كوت وبەندەكان كە تا ئیستاش وەك زنجیر لە دەست وپێی مرۆڤی كورد ئاڵاوە،شۆڕش مانای راستەقینەی خۆی نابەخشێ. بەم پیێە سازمانی خەبات لە بۆشایێكی لەم چەشنەدا دامەزراوە و كاری بەدەوامی بۆ گەیشتن بەم ئارمانجانەیە كە بنچینەو خواست وئامانجی بەشەریەت وكۆمەڵگەی كوردەواریە .

لە بردنە پێشی ئەم رەوتە لە شۆرش ،سازمان دەورو ڕۆلی گرینگی بینیوە و جێگە پەنجەی لە پیشخستنی بیری سەردەمیانە و هوشیاری كۆمەڵگا دیارو فەرامۆش نەكراوە،بۆیە جێگەی خۆیەتی لە یادی 35 ساڵەی ئەم خەباتەدا ،پیرۆزبایی لە خەڵكی كوردستان بكەین وچواردەوری مۆمی هەرگیز نەكوژاوەی تەمەنی پڕسەروەری سازمانی خەبات بە گوڵی ئاڵ و واڵا بڕازێنینەوە وسەری ڕێزو نەوازش بۆ رۆحی پاكی شەهێدان دا بنەوێنین ودەستەگوڵی هیوا لە بەرۆكی رێبوارانی ئەم رێگەیە بدەین.سازمانی خەباتی كوردستانی ئێران كە لەسەر باوەڕ بە ئازادی خەباتی نەتەوەیی ونیشتمانی دەست پێكردوە،پێی وایە بۆ گەیشتن بە ئارمانجە بەرزەكانی نەتەوەكەمان لە هەموو ڕەهەندەكانی خەبات كەڵك وەربگیردرێت. لەماوەی 35 ساڵ خەباتی نەبڕاوەو بێوچانی،قۆناخ گەلێكی جیاوازی بڕیوە كە جێگەی هەڵویستە وتێڕامانن وپێویستە لێكۆڵینەوەیێكی وورد وبابەتیانە لە جۆری كارو تێكۆشانی ئەم تەشكیلاتە بكرێت . بە باوەڕی من سازمانی خەبات لەگەڵ ئەوەی هێزێكی ڕەسەن وشۆڕشگیرە ولە پێناو ڕزگاری نەتەوەیی ونیشتمانی دەریایێك خوێنی لێ رۆیشتووە ودەیان كەس لەم پێناوەدا كەم ئەندام بوون ورێبوارانی ئەم رێگەیە تا ئیستاش خوێن وعارەق دەڕێژن،بەڵام چۆنیەتی كاركرد ورەوتی بەرەوپێش چوونەكەی،بارتەقای قۆربانیدانەكانی نیە ولەم پێوەندیەدا رەخنەی لەسەرە.

لە یادی 35ساڵەی دامەزرانی سازمانی خەبات،پێویستە هەموو لایەنەكانی بەهێز و خاڵی لاوازی سازمان بدەینە بەر سەرنج وبە شیتەڵ كردنێكی ووردی واقعیانە ئەم لایەنانە دەست نیشان بكەین وبە بێ پێدا هەڵگوتن وموقەدەس كردن،كەم وكوڕیەكان دەست نیشان بكەین.پێویستە و زەروورەتێكی هەنوكەییە كە تێكرای ئەندامانی سازمان بە كارەكاندا بچینەوەو رێگاو رێكاریكی سەردەمیانە كە وەڵامی ئەم قۆناغەی خەبات لە كوردستانی ئێران بداتەوە بگرینە بەر. پێویستە لەم بارودۆخەی كە وەڵاتەكەمانی تێكەوتوە وكەشێكی ئاڵۆز باڵی بەسەر داكێشاوە،چارەسەرێكی بابەتیانە بۆ دۆخی خۆمان وئەحزاب بدۆزینەوە ولە زووترین كاتدا خۆ لە قەیرانی پڕش وبڵاوی دەرباز بكەین. لەم شەرایەتەدا كە بەستێنێكی لەبار بۆ چالاكی پێشمەرگانەو بە جەماوەری كردنی شۆڕش هەڵكەوتوە،ڕیزی حیزبەكان پڕش وبڵاوە و لەگەڵ جیا بوونەوەو وخۆتەرخان كردن بۆ موبارزەی دەروون حیزبی ناسالم و بیر كردنەوە لە قازانج ودەسەڵاتخوازی،ریسالەتە دیرۆكیەكەمان لە بیر چۆتەوە.زۆربەی هێزەكانمان بۆ نەیاری یەكتر كۆكردۆتەوە و نەفەسێكی تەسكی تەشكیلاتی زاڵە بەسەر بیركردنەوەماندا. ئەم جۆرە ساختارو كەشە،لە هەموو ڕەهەندەكانەوە پاشەكشێی پێكردووین وبەم جۆرە مانەوەمان،بێ هیوای زیاترمان بە كۆمەڵانی خەڵكی كوردستان بەخشیوە. من ئارەزوو دەكەم كە هەموومان بە ڕوانگەیێكی  ڕەخنە گرانە لەم دۆخە بڕوانین وبیرێك لە داهاتووی شۆرش لە رۆژهەڵات بكەینەوە. دەبێت سازمانی خەبات دەست پێشخەر بێت ولە هەنگاوێكی مەزندا،هێزەكان لە دەوری مێزێك كۆبكاتەوە. لەم بارودۆخەدا كە ئێران بە گشتی وكوردستان لە هەل ومەرجێكی هەستیارو وئاڵۆزدایە،سازمان ئەركدارو بەرپرسیارەتی مێژوویی لەسەر شانە كە هەوڵ بدا ژوورێك دروست بێت وهەموان پێكەوە بتوانین چارەسەرێكی حەكیمانە و بە دوورلە دەمارگرژی وخۆ فەرز كردن وگەورە بینین بۆ ئێستامان وداهاتوو بدۆزینەوە.

 
ڕێکه‌و 2015-08-26 16:39:15
به‌شی ( وتاری سیاسی )







سیاسی