له‌سه‌رهێل 64
چوارشه‌مه‌ 25 پووشپه‌ڕ 2720
سازمانی خه‌باتی کوردستانی ئێران
راگەێندراوی كومیتەی ناوەندی سازمانی خەباتی كوردستانی ئێران، بە بۆنەی ٣٥ ساڵەی دامەزراندنی سازمانی خەباتی كوردستانی ئیرانەوە

هاو نیشتمانیانی تێكۆشەر، خەلكی خەباتگێڕی كوردستان!                 

كەس و كار و بنەمالەی سەربەرزی شەهیدان!

ئەندام و لایەنگران و پێشمەرگە قارەمانەكانی سازمانی خەباتی كوردستانی ئێران!.

ئەوا دیسان ئەستێرەی پڕ تیرێژی ٥ی خەرمانان،لە ئاسۆی بڵندی چیای تێكۆشان و خۆراگری خەباتی رزگاریخوازانەی گەلی كورد لە كوردستانی ئێران، خۆی دەرخستەوە. سەر لە نوێ شنەی شەماڵی دل لاوێنی خەرمانان، فێنكی خستەوە دڵ و هەناوان. تەتەری خۆش خەبەری شۆڕش و خەبات، كارنامەی ساڵێكی تری لە خۆڕاگری وهەوڵ و تێكۆشانی رۆلەكانی گەلی كوردی لە ریزەكانی سازمانی خەباتی كوردستانی ئێران دا، كردە  دیاری و جێژنانەی جێژنی ٥ی خەرمانان و زۆر رۆح سووك و خوێن شیرین، گەیاندیە تێكڕای چین و توێژەكانی كوردستان.                                              

جەماوەری تێكۆشەری كوردستان!

 خەباتكارانی رێگای راستی خەباتی نەتەوایەتی و ئازادیخوازانی بە بڕیار و خاوەن وەرە و باوەڕ!     

       پێنجی خەرمانانی ئەمساڵ بیرەوەری ٣٥ساڵەی دامەزراندنی سازمانێكی خەباتگێڕ و فیداكاری كوردیە لە كوردستانی بن دەستی دەسەڵاتی رەشی رژیمی ئاخوندی دا  كە وەك پێویستێكی سەردەم و بۆ وڵامدانەوەی ویست و داخوازیەكانی چین و توێژێكی بەرین و بەرچاوی كۆمەڵگای كوردەواری و وەك بەرهەڵستكارێكی جێی متمانەی خاوەن باوەڕانی مافی نەتەوایەتی لە رۆژهەڵاتی كورستان ،لە دژی سەرەڕۆیی و بێ دەربەستی و خۆ پەرەستی و دیكتاتۆریی دەسەڵاتدارانی سەردەم لە ئێران دا هاتە ئاراوە. سازمانێك  كە دوای تاوتوێكردنێكی وردی زانستیانە و هەڵسەنگاندنێكی مەنتیقیانەی هەل و مەرج و قۆناغ، لە بیرو هزری مرۆڤی زانا و خەباتگێڕ و دەربەست بە مافەكانی مرۆڤ و لەسەروویانەوە جەنابی مامۆستا سەیید جەلال حوسێنی و  بۆ دابین كردنی ئازادی و سەربەستی نەتەوە و نیشتمان و نەهێشتنی دواكەوتوویی و ژێر دەستیەوە گەڵاڵەكرا و لە چوارچێوەی دامەزراوە و سازیێكی سەربەخۆی بڕیاردەر و خۆراگر و بە دەربەست و خاوەن هەڵوێست و پرینسیبی سیاسی دیموكراتخواز و فیداكاردا ،خۆی نواند . هەر دوابەدوای خۆناساندن و بڵاوكردنەوەی یەكەم راگەێندراوی ئەم سازمانە، جەماوەری كوردەواری بە هەموو چین و توێژەكانیەوە لە دەوری كۆبونەوە و لە ماوەێكی كورتدا بووە یەكێك لە لایەنە بەرچاوەكانی كوردستانی و لە سەنگەری پێشەوەی خەبات بۆ وەدی هێنانی مافە زەوتكراوەكانی كورد دا لە هیچ چەشنە فیداكاری و دڵسۆزێك بۆ نەتەوە و نیشتمان كۆتایی نەكرد.                                                                          سازمانی خەباتی كوردستانی ئێران لە رەوتی بەرەوپیش چوون و هەڵدان و پیگەیشتنی خویدا، گەلیك قۆناغ و هەل و مەرجی دژوار و زۆر هەوراز و نشێوی بڕیون و بە سەر زۆر كەند و كۆسپ دا زاڵ و سەركەوتوو بووە كە ئەگەر رەسەنایەتی  بیر و باوەڕ و هەڵبژاردنی گونجاوترین خەت و رێبازی سیاسی و خوێندنەوەێكی سەردەمیانەی رووداوەكان و راستگۆیی و خۆ گونجاندن لەگەڵ ویست و داخوازییەكانی گەل و شۆڕش و فیداكاریی پێویستی رۆڵە بە شەرەفەكانی ئەم رێبازە و ژیری و وردبینی سەركردایەتی و گۆڕانكاری بەردەوام لە شێوەی كار و چاڵاكی سیاسەت و رەوتی كاری ئەم سازمانەدا نەبووایە، سازمانی خەباتیش وەك زۆر لایەن و جەریانی تر،چ كوردی و چ غەیرە كوردی كە نەك هەر نەیان توانی خۆ راگرن و بوونی خۆیان بپارێزن، بەڵكو هەر ئاسەواریشیان نەما و لە بیر جەماوەر و تەنانەت دامەزرێنەر و پەیڕەوانیشیان چوونەوە، ئاسەواری نەدەما و خوێن و رەنجی شەهیدان و دڵسۆزانی بە فیڕۆ دەچوو، بەڵام كاتێك كە داوا و رێباز و بیر و باوەڕ رەسەن و بەڕێوەبەری دڵسۆز و ژیر و  كادر و بەدەنەی فیداكار و تێگەیشتوو بوون ، بەردەوامی و بەرەو پێشچوون و هەڵدان و پێشكەوتن و پێگەیشتن و هاو تەریب بوون لەگەڵ رەوتی بەرەو پێشچوونی رووداوەكان و هاوئاهەنگی و سەرئەنجام یەك دەنگی و هاوهەڵوێستی لەگەڵ لایەنی تری هاوبەش و هاو ئامانج دا، مسۆگەر دەبێ و كەس ناتوانێ بەر لە راستی و رەوایی و هەوڵ و تێكۆشانی وەها سازمان و لایەنێك بگرێ. 

بە خۆشیەوە سازمانی خەباتی كوردستانی ئێران ، خاوەنی هەموو ئەو پرێنسیب و خاڵە ئەرێنیانەیە كە دەبێ لایەن و دامەزراوەێكی كوردی رەسەن و خەباتگێڕ بۆ رزگاری گەل و ئاوەدانی و پێشكەوتنی نیشتمان هەیبێ.  سازمانی خەبات لە هەل و مەرجێكی وادا هاتە ئاراوە كە لە لایەكەوە رژیمی رەگەزپەرســت و خورافاتی  ئاخوندی، بە رێبەرایەتی دڵڕەش و خوین مژترین دیكتاتۆر (خومەینی) لە ژیر درشــــــــــــــم   و ئاڵای ئێسلام دا ، وڵامی داخوازیە رەواكانی گەلی كوردی موسڵمانی بە لەشكر كێشی و فتـــــــــوای جیهاد و لە ناوبردنی گەلی كورد و سڕینەوەی ناوی نیشتمانمان ،، كوردستان ،، لە سەر نەخــــشــــــــــــەی جوغڕافیا دایەوە و لە لایەكی تریشەوە خاوەن باوەرانی رێبازی چەپ لە چوار چێوەی حــیــــــــــــزب    و رێكخراوی كوردی و غەیرە كوردی دا ، كوردستانیان كردبووە سەنگەری دژی رژیمی بەناو ئێسلامی ئاخونـــدی . لە وەها هەل ومەرجێك دا بۆ وڵامی بەهانەی لەشكركێشی رژیم و خەبات بۆ رزگاری و رێـــز گـــرتن لـــــــە هەست و بیر و باوەری كۆمەڵانی موسڵمانی كورد  ، لە سەنگەری خەباتی رەوای دژی داگیر كەرانی كوردستان دا، سازمانی خەبات ی كوردستان بوونی خۆی راگەیاند .

  بە لە بەر چاوگرتنی ئەو راستیانەی باسكراون ، دامەزراندنی سازمانی خەبات  لەو قۆناغەی خەباتی كورد لە كوردستانی بن دەستی ئێراندا ، پێویستێكــــــــــــــــی حاشا هەڵنەگر بوو. هەر بۆیە مامۆستا سەید جەلال حوسەینی و كۆمەڵێك مامۆستای ئایینی شۆڕشگێڕ و روناكـــــــبیر و كەسانــــــــــــــی خاوەن رابردووی پاكی كوردایەتی، گەڵالەی وەها سازمانێكیان داڕشت و پاش تاوتوێ كردن و هەڵ سەنگاندنـــــــی هەل و مەرجەكە ، لە ژێر ناوی رێكخراوی خەباتی نەتەوایەتی و ئیسلامی كوردستانی ئێران دا ، بوونـــــــی خۆی وەك رێكخراوێكی سیاسی شۆڕشگێڕ  راگەیانــد.  ئەمە لە لایەكەوە باشترین وڵام و چـــــــەك بــــــوو بۆ بەربەرەكانی رژیمی دژی گەلی بەناو ئیسلامی ئاخوندی و لە لایەكی تریشەوە سەنگەریكی تری قایمـی خەباتی رزگاریخوازانەی گەلی كورد بوو بۆ ئەو كەس و چین و توێژانەی كە باوەڕیان بە مافە رەواكانــــــی كورد و خەبات كردن بۆ وەدەست هێنانی ئەو مافانەیان هەبوو. بەڵام تا ئەو دەم رێكخراو و حیــزبێكــی لایەنێكی بـە باوەڕی خۆیان لەو گۆڕەپانەدا نەدەدی . 

   سازمانی خەبات لە رەوتی شۆڕشی رەوای گەلی كورد لە دژی دژمنی داگیر كەر لە كوردستانـــــی بن دەستی ئێران لە سەنگەری چەكداری دا، زۆر حەماسە و شانازی خوڵقاندوون كـە بۆ هەمیشە مــــــێـــــــژووی خەباتی رەوای گەلەكەمان شانازیان پێوەدەكا و بە سەرخەتی دیار و بەرچاو لە سەر لاپەڕەكانی خـــــۆی دەیان نووسێ و بە یادگار بۆ نەوە و قۆناغەكانی داهاتووی دوور و نزیكی گەلەكەمانیان هەڵدەگــــــــــــــرێ . ئەو خوێن و خەبات و رەنجەی كە سازمانی خەبات لەو پێناوە دا پێشكەشی كردوون، ئەگەر بەرچاوتر لە زحمەت و تێكۆشانێك كە لە مەودای شۆڕشی رەوای گەلی كورد بە درێژایی مێژوو پێشكەش كراون ، كەم رەنگتـــــر نەبوون و نین. هەر بۆیەشە لە داوی تێپەڕ بوونی ٣٥ ساڵ بە سەر تەمەنــــــــی ئەم سازمانە دا، خەباتیەكان و ریبـوارانی ئەم رێگا و رێبازە ، هەر وا دڵ پڕ لە هـــــیوا بە رزگاری وسەر كەوتــــــــن ، لــــــــە سەنگەری خەبات و بەرخودان دا ماون و شان بە شانی باقی حیزب و رێكخراوە ئازادیخـوازەكـــانـــی نـــــاو گۆڕەپانی خەباتی رەوای كوردستان و تێكۆشان و موبارەزەی سەرتاسەری لە ئێران دا، دیارن و خاوەن جێ پەنجــە و هەنگــاون و هەر ئێستا بە كردەوە لە سەنگەری دیفاع لە نەتەوە و نیشتمان لە دژی داعش و نەیارانی كوردو وكوردستان فیداكاری دەكەن .

ئەوەی لە مێژووی پڕسەروەری سازمانی خەبات دا جێگەی تێرامان و لێوردبوونەوەیە ئاستی كرانەوە و ئەمرۆیی بوونی ئەو تەشكیلاتەیە و ئەو ئاڵوگۆرە سیاسیانەی بەسەر خەت و رێباز و بەرنامەی سازمانی خەبات لە جەریانی كۆنگرەی سێهەمی سازمانی خەبات هاتە ئارا وەك گۆرینی ناو و ئامانجی سازمانی خەبات بۆ حیزبێكی نەتەوەیی و نیشتمانی كە لە پێناو دامەزراندنی حكوومەتێكی دیموكراتیك و پارلەمانی تێكۆشانی بەردەوام دەكات، دەرخەری ئاستی كراوەیی و ووشیاری و بە رۆژبوون و چەق نەبەستنی رێكخراوەكەمانە.

 ئەوەی كەدەبێ بە بێ لە خۆبایی بوون پەیڕەوان و هاوباوەڕانی رێبازی سازمانی خەباتی كوردستانی ئێران شانازی پێوە بكەن ، ئەو بیر و باوەڕە بێخەوشە كوردایەتیە خۆماڵیانە و خەباتی نەتەوایەتی و ئاشتیخوازانەیە كە داوی ٣٥ ساڵ بە بێ دوودڵی و ماندوو بوون، پەرەی پێ دەدرێ و قۆناغ لە دوای قۆناغ بە پێی پێداویستی سەردەم و هاوتەریب لەگەڵ ئاڵ و گۆڕە نێونەتەوەیی و ناوچەییەكان ، پەرەی پێدراوە و رەنگ و بۆی سڵ كردن و نامۆیی لێ كەم و كاڵ كراوەتەوە و لە چوارچێوەی تەسكی ئیدئۆلۆژی دا هێندراوەتە دەر و شان بە شانی لا‌یەنە جێ باوەڕ و متمانەكانی تری سەر گۆڕەپانی سیاسی و خەباتی رەوای كوردایەتی بۆ رزگاری نەتەوە و نیشتمان دەوری بەر چاوی هەیە. بە جۆرێك كە لە باس و خواس و رووداوەكان دا خاوەن دەنگ و ناوە و بە ئیقراری بەشیكی زۆر لە وانەی كە لە سەرەتای دروست بوونی دا نەیاریان دەكرد و رێگەیان لە پەرەگرتنی دەگرت ، یەكێك لە لایەنە خاوەن هەڵوێست و دەنگەكانە و ناكرێ لە پەراوێز خرێ و لە معادەلاتە سیاسیەكانی ئەم سەردەمەی شۆڕشی رەوای كورد لە  رۆژهەڵاتی كوردستان دا دەر هاوێژرێ.

ئەندامان و لایەنگرانی سازمانی خەبات ی كوردستانی ئێران!

   لێرەدا وێڕای دەستخۆشی لە هەموو دڵسۆزانی سازمانی خەباتی كوردستانی ئێران ، رۆژی پێنجی خەرمانان، ٣٥ هەمین ساڵرۆژی دامەزراندنی سازمانی خەبات بە هەموو  ئەندام و لایەنگران و دۆستانی، پیرۆزبایی دەلێن و سڵاو دەنێرین بۆ گیانی بەرز و پیرۆزی مامۆستا سەیید جەلال حسێنی دامەزرێنەر و رێبەری هەرگیز نەمر و سەرجەم شەهیدانی سازمانی خەبات و رێگەی رزگاریی كوردستان و سەری رێز بۆ بنەماڵە و كەس و كاریان دادەنوێنین. سڵاو دەنێرین بۆ زیندانیانی سیاسی و قەڵافەتی مێرانەی چالاكانی سیاسی و شۆڕشگێڕانی رێگای رزگاری نێشتمان و خاوەن هەڵوێستانی بە باوەڕ لە ئامێزی خۆشەویستی دەگرین . وەك رێبوارانی رێگای شەهیدان ، روو دەكەینە‌ هەموو ئەوانەی كە خۆیان بە دڵسۆزی شۆڕش و هەڵگری بیرو باوەڕی خەباتی رەوای گەلی كورد دەزانن و لە روانگەی سازمانی خەباتی كوردستانی ئێرانەوە دەڕواننە ئاسۆی رزگاری نەتەوەكەمان، دەڵێن: وەرن با بیرەووری 5ی خەرمانان بكەینە وزەو تین بۆ هەوڵ و تێكۆشانمان لە پێناو خەباتی رەوای گەلەكەماندا. وەرن با بە بێ دوودڵی، چاكی دڵسۆزی لێ بەلادا كەین و هەر كام لە بەر خۆمانەوە بە پێی گەڵاڵە و بەرنامەی دیاری كراو لە بەر رووناكی رێ و شوێن و بڕیارەكانی سازمان دا، دەست بدەینە دەستی یەك و چی لەم پێناوەدا لەدەستمان دێ كۆتایی نەكەین. دڵنیا بن هەموومان بە هاوكاری و هاو فكری یەكتری دەتوانین بە باشترین شێوە خزمەت بكەین و رووحی شەهیدەكانمان شاد و شانازی بۆ خــۆمان دەستەبەر بكەین! 

  بەرز و پیرۆز بێ یادی ٣٥ ساڵەی پێنجی خەرمانان،ئەستێرەی پێنج پەڕی ئاسمانی خەباتی نەتەوایەتی كورد لە كوردستانی ئێران.

 بژی كورد، ئازاد و ئاوەدان بێ كوردستان.! 

سازمانی خەباتی كوردستانی ئێران

كومیتەی ناوەندی

27ی ئۆگۆستی ٢٠١٥ی زایینی بەرانبەر بە 5ی خەرمانانی ١٣٩٤ كۆجی خۆری.

 
ڕێکه‌وت: 2015-08-27 18:26:29
به‌شی ( به‌یاننامه‌کان )





دیمانه

سیاسی