٣٥ ساڵی خەباتی بەردەوام لەپێناوی ئازادی دا بێگومان نووسینەوەی مێژووی حزبێكی ڕەسەن یان باسكردن و پێداچوونەوە بەقۆناغە جۆربەجۆرەكانی دەورانی سیاسی و موبارەزەی كارێكی هەروا سانا نییە و پێویستی بەلێكدانەوەو لێكۆڵینەوەی ورد و زانستی و سیاسیانە هەیە. هەر بۆیە بەوردەكاری زۆرەوە ناچمە ناخی مێژووی سازمانی خەباتەوە، بەڵام بەكورتیش بێت پێویستە ئاوڕێك لەو مێژووە بدەینەوەو ئاماژە بەچەند قۆناغی گرینگ بكەین. 

سازمانی خەبات وەك قەوارەیەكی سیاسی و جەماوەری لە٥ی خەرمانانی ساڵی ١٣٥٩دامەزرا و زووش گەشەی كر‌د. لەهەموو شار و شارۆچكەو گوندەكانی كوردستانی ئێرانەوە لاوانی بەباوەڕ و شۆڕشگێڕی كورد پۆل پۆل ڕوویان لەڕیزەكانی سازمانی خەبات كرد و لەهەموو ناوچە و شارەكان سازمان چالاكیەكانی دەسپێكرد و بنكەو بارەگای لە زۆرێك لە ناوچەكانی كوردستان دامەزراند. داستانی ئازایەتی و چاونەترسی و بەباوەڕی پێشمەرگەكانی سازمانی خەبات وێردی سەر زمانی گەورەو بچوك بوو و هەر بۆیە بە داخەوە زۆر زوو كەوتە ناو گەمەی ركابەری ناسالمی لایەنە سیاسیەكان و هەوڵی ئەوە درا كە لەمپەر لەبەردەم گەشەكردنی سازمانی خەبات دا دروست بكرێ‌. هەوڵی ئاشكرای ئەوان بۆ لاوازكردنی سازمان سەری نەگرت، بەڵام بەشێوەی نهێنی و بەردەوام لەهەوڵ دابوون بۆ لەناوبردن و بڵاوكردنەوەی پڕوپاگەندەی ناڕەوا دژ بەسازمانی خەبات. ژیری سەركردایەتی سازمان لەسەروی هەمووشیانەوە مامۆستا سەید جەلال حسینی وای كرد كە نەهێڵی سازمان تێكەڵ بە شەڕی شوومی ناوخۆیی ببێ. سیاسەتی سازمان هەر لەسەرەتای دامەزرانیەوە تاكوو ئێستاش ئەوە بووە كە لولەی چەكی پێشمەرگەی سازمان ڕووبەڕووی دوژمن بێ و بەس، ئەویش نەك تەنیا دژمنی پارچەیێكی كوردستان بەڵكو بە درێژایی مێژوو سەلماندویەتی كە لە پێناو قازانجی هەموو كوردان تێكۆشاوە و رووبەرووی دژمنانی جۆراوجۆری نەتەوە و نیشتمان بۆتەوە و نرخی گەورەشی داوە. 

بەداخەوە كێشەكان لەسەرەتاوە تەنیا لە لایەن دژمنی سەرەكی و لایەنەكانی تری كوردستان رووبەرووی سازمانی خەبات نەبوویەوە بەڵكو لەناوخۆی سازمانیش كێشە و لەمپەری جیددی دروست بوون كە ناچمە سەر هۆكارەكانی سەرهەڵدان و دەرئەنجامەكانی ئەو كێشانە. جێگەی خۆشحاڵی و شانازییە كە كۆی بەربەست و لەمپەرەكان نەیانتوانی سازمانی خەبات لە رەوتی پێش كەوتن و گەشەی زیاتر پەك بخەن و بوونی زۆرینەی وەفادار و دڵسۆز بەسازمان  و پشتیوانی كۆمەڵانی خەڵكی كوردستان لەو رێكخراوە ئەمرۆی سازمانی خەباتیان مسۆگەر كرد.

سازمانی خەبات لەگەڵ هەموو قۆناغەكانی شۆڕش و بەربەرەكانی لەگەڵ رژیمی ئاخوندی دا شان بەشانی حیزب و لایەنە سیاسیەكانی تری كوردستان تێكۆشانی خۆی درێژە پێدا كە بێگومان گەلێك قۆناغی سەخت و دژواری خەباتی تێپەڕاند و ئێستاش ئەوە یادی ٣٥ ساڵەی خەباتی بەردەوامی خۆی دەگرێ .

هێزێكی سیاسیە كە كەمترین هەڵەی سیاسی هەبووە. مێژوویەكی شۆڕشگێڕانەو سادقانەو وەفادارانەی بۆ گەلەكەی تۆمار كردوە. چەندان ڕۆڵەی قارەمان و تێكۆشەر و بەباوەڕ لەژێر سایەو سێبەری سازمان دا گیانی پاكیان فیدایی گەل و نیشتمانیان كرد. چەندان ڕۆڵەی ئەم گەلە ڕاپێچی زیندانەكانی ڕێژیم كران و لەزیندان دا لەسێدارەدران. 

سازمانی خەباتی كوردستانی ئێران هیچ كات لەمپەر نەبووە بۆ كاری هاوبەش  لەنێوان هیچ هێزو لایەنێكی سیاسی دا، بەڵام سیاسەتی خۆسەپاندنی لەهیچ هێز و لایەنێكیش قبوڵ نەكردوە و نایكا و پێی وایەكەكاری هاوبەش بەڕواێژ و لێك تێگەیشتن دەبێ ئەنجام بدرێ. نابێ سیاسەتی حیزبی هیچ هێز و لایەنێك لەمپەر و ڕێگر بێ لە‌پێناو خەبات و كاری هاوبەش دا لەنێوان حیزب و هێز و لایەنەكانی ڕۆژهەڵاتی كوردستان دا. 

سازمانی خەبات هێزێكی ڕەسەن و ڕیشەداری ناو كۆمەڵانی خەڵكی كوردستانە. خاوەنی مێژوویەكی پاك و شۆڕشگێڕانەیە، هەر بۆیەش خەباتكردن و تێكۆشان لەناو ڕیزەكانی سازمان دا شانازیەكی زۆر گەورەو پیرۆزە بۆ هەموو كەسێكی تێكۆشەر و نیشتمان پەروەر. 

پیرۆزبێ ٣٥ ساڵ خەباتی بەردەوام لەپێناوی ئازادی دا، نەمری و سەربەرزی بۆ شەهیدانی سازمانی خەبات. سەرشۆڕی و نەمان بۆ دوژمنانی كورد.

 
ڕێکه‌و 2015-08-30 09:52:35
به‌شی ( وتاری سیاسی )







سیاسی