هەواڵەكانی كوردستان و ئێران و جیهان (11ی خەرمانانی 1394)  

 

 

لە كامیاران كوڕێك بە دەستی باوكی كوژرا

لە شاری كامیارانی سەر بە ئوستانی كوردستان پیاوێك بە چەكی تاپڕ تەقەی لە كوڕە تەمەن ٢٢ ساڵەكەی كردووە و كوشتوویەتی.بەپێی هەواڵی هەواڵدەریی كوردپا، شەوی سێ شەممە رێكەوتی ١٠ی خەرمانان لاوێكی تەمەن ٢٢ ساڵ بە ناوی " سامان پەرویزی" بە دەستی باوكی كوژراوە.سەرچاوەیەك باسی لەوە كردووە، بكووژەكە كە ناوی " ئەحمەد پەرویزی" تەمەن ٥٤ ساڵ بووە بە چەكی تاپڕ ئەو تاوانەی ئەنجام داوە.ئەوەش خراوەتەڕوو، ئەحمەد پاش كوشتنی كوڕەكەی هەڵاتووە و هەتا بڵاو بوونەوەی ئەو هەواڵە خۆی رادەستی پۆلیس نەكردووە.دەوترێت ئەو بنەماڵەیە دانیشتووی ئاوای " ئەڵك"ی سەر بە كامیاران بوون.لەوڵاتی ئێران خەسارە كۆمەڵایەتییەكان و توندوتیژییەكان هەتا دێت روو لە زیاد بوون دەكات، لەو پێوەندییەدا دامەزراوەی "گالۆپ" لە راپۆرتێكدا بڵاوی كردبوویەوە كە خەڵكی ئێران و عێراق توندوتیژترین كەسان لە جیهان دان.ئەو دامەزراوە ئاشكراشی كردبوو، خەڵكی ئێران و عێراق زۆر زوو تووشی هەڵچوون و توندوتیژی دەبن.

 

 

 

لەشنۆ كەسێك پاش كوشتن و برینداركردنی بنەماڵەیەك كۆتایی بە ژیانی خۆشی هێناوە

لەشاری شنۆ پیاوێك بە چەك هێرشی كردووەتە سەر بنەماڵەیەك و پاش كوشتن و بریندار كردنی چوار كەس، كۆتایی بە ژیانی خۆشی هێناوە.ئێوارەی سێ شەممە ریكەوتی ١٠ی خەرمانان كەسێك بە ناوی " س.ی" چووەتە سەر بنەماڵەی سابیری و دەستڕیژی لە ئەندامانی بنەماڵەكە كردووە و دەستبەجێ ژنێك بە ناوی مونیرە سابیری گیانی لەدەست داوە.لەئەنجامی تەقە كردنەكەكەدا دوو ژنی دیكە كە تەمەنی یەكیان ٥٠ ساڵ بووە، هەروەها منداڵێكی چوار ساڵانیش بەر دەستڕێژییەكە كەوتوون.ژنە تەمەن ٥٠ ساڵ و منداڵەكە بە هۆی قورسی برینەكەیان لەرێگەی نەخۆشخانەی ورمێ گیانیان لەدەست داوە."س.ی"پاش ئەنجامدانی تاوانەكە لە حەوشەی ماڵی " جەعفەر سابیری" خۆشی كوشتووە.باس لەوەش كراوە كە ژنەكەی دیكەش رەوانەی نەخۆشخانەی شاری نەغەدە كراوە.

 

 

 

 

مامۆستایەكی كورد لە لایەن وەزارەتی ئیتلاعاتەوە دەستگیر كرا

 

مامۆستایەكی كورد بە 8 ساڵ پێشینەی كار لە ئیدارەی پەروەردە رۆژی رابردوو 9ی مانگی خەرمانان لە لیەن مەئمورانی وەزارەتی ئیتلاعاتەوە دەستگیر كرا.بە پێی راپۆرتی ناوەندی بەرگری لە مافی مرۆڤی كوردستان، “عەلی حسێن پەناهی” مامۆستای كورد لە شاری سنە، دوێنێ دووشەممە 9ی مانگی خەرمانان لە لایەن هێزەكانی وەزارەتی ئیتعاتەوە لە ماڵەكەی خۆیان لەئاوایی قروچای سەر بە شاری دێگولن دەستگیر و راپێچی شوێنێكی نادیار كرا.سەرچاوەیەك لەوبارەیەوە بە “ناوەندی مافی مرۆڤی كوردستان”ی راگەیاندوە، ناوبراو رۆژی هەینی لە مزگەوتی ئەو ئاواییە دژی حكومەت قسەی كردووە و داوای لە خەڵك كردووە كە لە بەرامبەر هەڵاواردنەكانی كاربەدەستانی كۆماری ئیسلامی لە ناوچە كوردستانیەكان بێ دەنگ مەبن و بەمبۆنەوە 2 رۆژ دواتر لە لایەن هێزە لیباس شەخسیەكانی وەزارەتی ئیتلاعاتەوە دەستگیر كرا.شایانی باسە، عەلی حسێن پەناهی پێشتر بە ماوەی 4 ساڵ دێهیاری ئاوایی قروچاای بوو و ئێستاش ناوبراو لە یەكێك لە قوتابخانەكانی شاری سنە سەرقاڵی وانە وتنەوەیە.

 

 

 

 

 

زیندانیەكی كورد لە شاری سنە لەسێدارە درا

 

بەرەبەیانی رۆژی سێ شەممە  لە زیندانی ناوەندیی سنە لەلایەن دامودەزگەی دادوەری و بەرپرسانی زیندانەوە بەندكراوێكی دیكەی كورد لەسێدارە درا.بەپێی هەواڵی ناوەندی بەرگری لە مافی مرۆڤی كوردستان، بەرەبەیانی سێشەممە 10ی مانگی خەرمانان سزای سێدارەی “سەید زاهید حوسێنی” بەندكراوی كوردی خەڵكی شاری سەقز لە زیندانی ناوەندیی سنە بەڕێوە چووە.ئەو سەرچاوەیە ئاماژەی بەوەش داوە ئەو بەندكراوە كوردە بە تۆمەتی كوشتنی كەسێك سزای سێدارەدانی بۆ بڕاوەتەوە و ماوەی 13 ساڵیش زیندانی كراوە.سەرچاوەكانی مافی مرۆڤ بڵاویان كردووەتەوە كە لە رۆژانی رابردوودا بەندكراوێكی دیكەی كوردی خەڵكی شاری شنۆ لە زیندانی خوڕەم ئاوا لە پارێزگای لوڕستان لەسێدارە دراوە و پێنجشەممەی هەفتەی بەرێش بەندكراوێكی دیكەی كورد بەناوی “جەمال جەعفەری” لە زیندانی سنە لەسێدارە درا.شایانی باسە، لە ماوەی كەمتر لە یەك حەفتەدا سێ‌ بەندكراوی كورد لەلایەن ناوەندە دادوەرییەكانی ئێرانەوە لەسێدارە دراون.

 

 

 

 

 

 

 

سێناتور و دادستانی ئوكلاهومای ئەمریكا خوازیاری گەمارۆی زیاتر بۆ سەر ئێرانن

 

هێنانەبەرباس و تاوتوێكردنی رێكەوتننامەی ناوكیی ئێران و وڵاتانی پێنج كۆ یەك لە كۆنگرەی ئەمریكا لەگەڵ بەربەست بەرەوڕوو بووتەوە.لەبەرەبەری دەنگدان و خۆ یەكلایكردنەوە سەبارەت بە رێككەوتنە ناوكییەكەی ئێران و وڵاتانی رۆژئاوایی لەكۆنگرەی ئەمریكا، هەواڵ و زانیارییەكان دەرخەری ئەوەن كە ئەگەری ئەوە هەیە دێمۆكراتەكان پشتیوانی لەو گەڵاڵەیە نەكەن.دانیشتن و تاوتوێ كردنی رێككەوتنامەكە بڕیارە رێكەوتی ٢٦ی خەرمانان بەڕێوە بچێت. لەو بارەیەوە فاكس نیوز بڵاوی كردووەتەوە، هەتا ئێستا "كۆمیتەی میللی دێموكراتەكان" دەنگی لەسەر ئەو رێككەتنامەیە نەداوە و پشتیوانی لێ نەكردووە."دبی وێزرمەن شولتێز"نوێنەری دێموكراتەكان لەئەیالەتی فلۆریدا، پێشی بە تاوتووێكردن و دەركردنی ئەو بڕیارنامەیە گرتووە.كۆنگرەی ئەمریكا لەحاڵێكدا خۆی بۆ دەنگدان بەمەبەستی رێككەوتنامەی ناوكیی لەگەڵ ئێران ئامادە دەكات كە شایەتی ناڕازای بوونی زۆربەی نوێنەرانی كۆماریخوازەكانین.یەكێك لەسێناتورە كۆماریخوارەكان لەگەڵ دادستانی ئەیالەتی ئۆكالاهوما لە نامەیەكدا، داویان لە ئەیالەتەكانی دیكەی ئەمریكا كردووە، كە بێ گوێ دان بە رێككەوتنامەكان گەمارۆی زیاتر بخەنە سەر ئێران.لەنامە هاوبەشەكەی جێمزئینهوف و ئیسكات پروتدا هاتووە: لە كاتێكدا باراك ئۆباما سەركۆماری ئەمریكا بۆ خۆ دەربازكردن لە كۆكردنەوەی دەنگ بۆ پەسەندكردنی رێكەوتننامەكە، بەجێگای "پەیمان" ناوی "رێكەوتنی ئیجرایی" لێناوە.لە ئەمریكا ئەیالەتەكان ئەو دەسەڵاتەیان هەیە كە خۆیان سەبارەت بە گەمارۆكان بڕیار بدەن.ئەو بابەتە كە لەرۆژنامەی واڵ‌ئەسترێت ژورناڵ بڵاوكراوەتەوە، جارێكی دیكە حكوومەتی ئێرانی بە دروستكردنی چەكی ناوكیی و پێشێلكردنی مافی مرۆڤ تاوانبار كردووە.هەواڵدەریی فارس سەبارەت بە داواكاری ئەو دوو بەرپرسە ئەمریكاییە بڵاوی كرووەتەوە، هەتا ئێستا ٢٥ ئەیالەتی ئەمریكا گەمارۆیان خستووەتە سەر ئێران و بەپێی یاسایەكی ئەو وڵاتە كە بە بە سیسادا (cisada) ناسراوە، ئەگەر ئەیالەتەكان بڕیاری لەسەر گەمارۆ خستنە سەر ئێران كۆ دەنگ بن، ئەوە دەوڵەتی فێدراڵیش ناچارە پشتیوانی لەو كۆدەنگییە بكات.پێشتر، شۆرای ئەمنیەت و یەكیتی ئورووپا بۆ پشتیوانی كردن لە رێكەوتنامەی " ٢٣ی پووشپەر" ئامادەكاریی بۆ هەڵوەشانەوەی گەمارۆكانی سەر ئێران كردبوو.

 

 

 

 

 

 

كوەیت هاوڵاتییەكی ئێرانی بە تاوانی ئەمنیەتی دادگایی دەكات

 

دادستانی گشتیی كوەیت 25 هاوڵاتیی كوەیت و هاوڵاتییەكی ئێرانی بە تاوانی جیاجیا لەوانە ئەمنیەتی و گواستنەوەی زانیاریی رەوانەی دادگای تاوانەكان كرد.بە پێی راپۆرتی رۆیتێرز، دادستانی كوەیت لە راگەیەندراوێكدا كە لە ماڵپەڕی فەرمی كوەیت (كونا) بڵاو كراوەتەوە، رایگەیاندووە: تۆمەتی ئەم كەسانە “ئەنجامدانی كردەوەی دوژمنكارانە بەرامبەر بە دەوڵەتی كوەیت لە رێگای كەڵك وەرگرتن لە چەك و تەقەمەنی و دام و دەزگای گوێ گرتنی نایاسایی بە ئامانجی ئەنجامدانی كردەوەی نایاسایی” راگەیاندووە.بۆ هەموو ئەم كەسانە حوكمی دەستگیركردنی كاتیی دەركراوە بەڵام 3 كەسیان تا ئێستا دەستگیر نەكراون.

 

 

 

 

 

 

 

سەرۆكی سوپای پاسداران باس لە سەرەتای جەنگێك دەكات

 

یەكێك لە فەرماندەكانی سوپای ئێران رایگەیاند كە رێككەوتنە ئەتۆمییەكەی نێوان تاران و وڵاتانی 5+1 سەرەتا و دەسپێكی جەنگی ئەو وڵاتەیە لەگەڵ زلهێزەكانی جیهاندا.محەمەد علی جعفری، سەرۆكی گشتی سوپای پاسدارانی ئێران رایگەیاند كە پەسەندكردنی رێككەوتنە ئەتۆمییەكەی وڵاتەكەی لەلایەن كۆنگرێسی ئەمریكاوە، سەرەتای جەنگی زلهێزەكانە لەگەڵ ئێراندا. ناوبراو لەمبارەیەوە روونكردنەوەی زیاتر دەدات و دەڵێت: "بە لەبەرچاوگرتنی لێدوانی بەرپرسانی ئەمریكا، لەبارەی بەكارهێنانی چارەسەری سەربازی دژی تاران لەكاتی پابەند نەبوون بە خاڵەكانی ناو رێككەوتنەكەوە، ئاشكرایە كە بە ئاسانی رێگە بە پێشكەوتنەكانی ئێران لەبواری وزەی ئەتۆمدا نادەن". 

ئاژانسی هەواڵی "تەسنیم"ی ئێران، لەزاری ناوبراوە بڵاویكردەوە، كە پێویستە تاران لە داهاتودا بەوردی هەنگاوبنێت و ئاگاداری پلانی دوژمنەكانی بێت، چونكە جەنگی دژ بە ئەمریكا، هێشتا كۆتایی نەهاتووە.

 

 

 

 

 

 

هاوپەیمانان ١٣ هێرشی ئاسمانیی نوێیان كردە سەر داعش

 

فڕۆكەكانی هاوپەیمانان چەكدارانی داعشیان لە عێراق و سوریا بۆردومان كرد و ١٩ هێرشی ئاسمانیی نوێیان بۆسەر پێگەكانیان ئەنجام دا.بەپێی بەیاننامەیەكی هێزی هاوپەیمانان، لە ماوەی ٢٤ كاتژمێری ڕابردوودا، فڕۆكەكانی هاوپەیمانان ١٣ هێرشی ئاسمانییان لە عێراق و شەش هێرشی تریان لە سوریا ئەنجام داوە.ئاماژەی بەوە كردووە، لە كۆی ئەو هێرشە ئاسمانییانە ١١ هێرشیان لە عێراق لەنزیك بەغدادی، بێجی، حەدیسە، كەسك، موسڵ، ڕومادی و شەنگال ئەنجام دراون.ئەوەش هاتووە، هێرشەكانی سەر سوریاش لەنزیك هول، كۆبانێ و مارع دراون.بەهۆی هێرشە ئاسمانییەكانیشەوە چەندین یەكە و شوێنی شەڕكردنی چەكدارانی داعش كراونەتە ئامانج، لەگەڵ تێكشكاندنی چەند ئۆتۆمبێلێكدا.هێزی هاوپەیمانان لە مانگی ئابی ٢٠١٤ەوە هێرشی ئاسمانییان بۆسەر چەكدارانی داعش لە عێراقدا دەستپێكرد و لە مانگی ئەیلولیشدا هێرشەكانیان بۆسەر چەكدارانی داعش لە سوریادا دەستپێكرد.

 

 

 

 

 

باشترین خۆراكە بۆ دابەزاندنی كێش

 

ئەگەر دەتەوێت كێشت داببەزێت ئەوە بێ دودڵی فاسۆلیای ڕەش هەڵبژێرە بۆ دابەزاندنی كێشت .ئەم جۆرەی فاسۆلیا بڕێكی زۆر ڕیشاڵ لەپێكهاتەیدا هەیە و هەستكردن بەتێر بوون زۆر دەكات بۆ ماوەیەكی درێژ .فاسۆلیای ڕەش بڕێكی زۆر پرۆتین لەپێكهاتەیدا هەیە كە  هاوشێوەی پرۆتینی گۆشت بۆ جەستە بەسوودە جگە لەوەش چەوری لەپێكهاتەیدا نیە .بۆ خانمانی دوگیان زۆر بەسوودە چونكە بڕی پێویست فۆلیك و كانزای ئاسن بۆ كۆرپەی ناوسكی دایك دابین دەكات كە پێویستە بۆ گەشەی مێشكی منداڵ .
ڕێکه‌و 2015-09-02 18:41:34
به‌شی ( هه‌واڵی کوردستان )







سیاسی