بابەشێخ حسێنی: هەڵبژاردن لە ئێران جگە لە هۆیەكی تەبلیغاتی و ساختەكاریەك بە مەبەستی درێژ كردنەوەی دەسەڵات و چاوبەستی سیاسی، ناكرێ ناوێكی دیكەی لێ بندرێ  

بە مەبەستی ئاگادار بوون لە دوایین رەوشی سیاسی  جیهان و ناوچەكە و هەوەرها هەڵبژاردنەكانی پارلەمان و مەجلیسی خوبرەگانی رژیم و دۆخی ئێران و كوردستان و بزووتنەوەی رزگاریخوازانەی گەلی كورد لە كوردستانی ئێران بەرێز كاك بابەشێخ حسێنی بەرێوەبەری گشتی سازمانی خەبات ی كوردستانی ئێرانمان دواند و كۆمەلێك پرسیارمان رووبەروو كردەوە كە ئەوەی خوارەوە دەقی وەلامەكانی بەرێزیانە:

 

1ـ یەكەم پرسیارمان لەوە دەست پێدەكەین بە گشتی خوێندنەوەتان لە دوایین پێشهات و رووداكانی جیهان و ناوچەكە چییە؟

 لە دوای سەرهەڵدانی رێكخراوی ترۆریستی داعش و داگیر كردنی بەشێكی بەرچاو لە خاكی ووڵاتانی سوریە، عێراق ،لیبی و یەمەن و سەرهەڵدانی جەنگێكی بەربڵاو ماڵوێرانكەر لە ناوچەی خۆرهەڵاتی ناوەراست لە ڵایەك و كردەوە ترۆریستیەكان بۆ سەر ووڵاتی فەرانسە و هەڕەشەی ترۆریستی بۆ سەر زۆربەی ووڵاتانی ئوروپایی و تێك چوونی ئارامی لە ئوروپا، جیهانی بێ ئۆقرەیی و ئاڵۆزییەكی گەورە بۆتەوە. ئەو هەلومەرجە نوێیە سیاسی و ئەمنیەتی نێونەتەوەییە بۆتە هۆی رەخساندنی دەرفەت بۆ دەخالەت و دەست تێوەردانی ووڵاتانی خاوەن هێزی جیهان. بە شێوەیەك كە روسیە راستەوخۆ هاتۆتە مەیدانی ململانێكە و بە ناردنی هێزی سەربازی بۆ سوریەو پشتیوانی لە رژیمی بەشار ئەسەد و دروست كردنی جۆرێك لە هاوپەیمانی لەگەڵ رژیمی سەرەرۆی ئاخوندی و رژیمی سوریەو حیزبوڵلای لوبنان هاوسەنگی سیاسی لە ناوچەكە تێكداوە.

بێگومان ماوەی چەند ساڵ بوو روسیە لە دەرفەت دەگەڕا تا وەك گەورە هێزێكی جیهانی بێتەوە مەیدانی ململانێكان. وەك ئاشكرایە ئەمریكا وەك گەورەترین هێزی جیهانی نەیتوانی پێگەی خۆی لە خۆرهەڵاتی ناوەراست بپارێزێ و لە حاست كێشە سیاسیە جیهانیەكان و بە تایبەت لە روبەروبوونەوەی حكومەتی سوریە و جیددی نەبوون لە هەوڵەكان بۆ رووخانی حكوومەتی بەشار ئەسەد و ئیمتیازدان بە رژیمی ئاخوندی و كەمتەرخەمی لە بەرانبەر حكومەت و دەسەڵاتە دۆستەكانی و گۆرینی رەوت و نەقشەی سیاسی جیهانی بە دروشمی دیموكراسی و عەداڵەتی جیهانی، بە باوەری من دەوری ئەمریكای كەم رەنگ و لاواز كردوە.

بە بەراوردی زۆربەی شارەزایانی سیاسی، یەك بەرەیی و یە قوتبی جیهان گۆڕاوە بە چەند بەرەیی و چەند قوتبی، كە جیاواز لە ئەمریكا، روسیە وەك جەمسەرێكی جیهانی بە شوێن قازانج و بەرژەوەندیەكانیەوەیەو هەروەها چین و هیندوستان چ وەك حكومەتی خاوەن بۆمبی ئەتۆمی و چ وەك دوو ووڵاتی خاوەن زۆرترین جەماەر دەیان هەوێ لە كێشە سیاسیەكانی جیهان و بەرژەوندییە ئابووری و سیاسیەكان دەوریان هەبێ.

بەو بەراوردە كورت و خێرایە، دەتوانین ئەوە بخەینە بەرچاو كە هێمنایەتی ناوچەی خۆرهەڵاتی ناوەراست بە تایبەت و هێمنایەتی جیهانی بە گشتی لە بەردەم هەڕەشەییكی جیددی و حاشاهەڵنەگرەو مەترسی سەرهەڵدانی قەیرانی زیاترو جەنگی ماڵوێرانكەرتر چاوەروان دەكرێ.  

 

2.  بەرێز كاك بابەشیخ حسینی پێتان وایە بابەتی داعش و سەرهەلدانی ئەو گرووپە ترۆریستیە تا چ رادەییك كاریگەری هەبووە لەسەرئالوگۆرە خێراكانی جیهان و ناوچەكە و ئایا دەكری بلێین پارادایمی داعش بە تەنیا، تەوەری وەرچەرخانەكانە یان خود ئەو ئالوگۆرانە درێژەی هەمان سیاسەت و پرۆژەكانی رابردووی زلهێزەكانی جیهانە و داعش بۆتە هۆی ئەوەی ئالوگۆرەكان خیراتر بن؟

پێم وایە ئاڵوگۆرە سیاسیەكان لە ناوچەكە و روخانی حكومەتە دیكتاتۆرەكان لە ووڵاتانی عەرەبی كە بووە هۆی چۆڵ بوونی مەیدان بۆ فكرە بناژۆخوازەكان تا بە ئازادانە پروپاگەندە بۆ فكری توندرەوانەیان بكەن و جیهاد بكەنە بنەمای كارەكانیان ،  توانیان ژمارەیەكی بەرچاو لە كەسانی ئیحساسی لە ژێر ناوی جیهاد و بە ناوی ئیسلام  فریوبدەن و توانیان پانتاییكی بەرچاو لە خاكی وڵاتانی سوریە،عێراق و لیبی بە هێزی خۆیان داگیر بكەن و هەڕەشە بن بۆ سەر سەقامگیری ووڵاتانی ناوچەكە.

بە باوەری من ئەگەر ووڵاتانی خاوەن هێزی جیهانی بە هاتنی داعش توانیان بە شوێن ئامانجەكانیانەوە بن و لە جیات هەوڵ بۆ چارەسەری ریشەیی كێشەكان، لە هەوڵدان لە ئاوی ڵێڵ زۆرترین ماسی بگرن و بە دوای قازانج و بەرژوەندیەكانییانەوە بن.

رەنگە ووڵاتە زلهێزەكان بەرنامەی داڕێژراویان نەبووبێ بۆ سەرهەڵدانی داعش بەڵام  رێگەیان لە سەرهەڵدانی داعش نەگرت و بە بێ دەنگی سەرەتایان و كەمتەرخەمیەكانیان لە حاست ئەو پرسە حەستەم و مەترسیدارە ناراستەوخۆ رێگەیان خۆش كرد بۆ داعش و مەیدان چۆَلكردنی مەعناداریان لە خۆ نیشاندا. بۆ نمونە كاتێك ئەمریكا هێزە سەربازیەكانی لە عێراق بردە دەرەوە، هەم  مەیدانی بۆ دەست تێوەردانەكانی رژیمی ئێران چۆڵ كرد و هەروەها مەیدانی بۆ گەشە كردنی  هێزە ترۆریستیەكان چۆڵ كرد.

بێگومان سیاسەتی حكومەتە خاوەن هێزەكانی جیهانی لە سەر دروست بوونی قەیرانەكان لە خۆرهەڵاتی ناوەراست، لە لایەك وای كرد داعش گەشەیێكی خێرا بكات لە ناوچەكەدا، كە گەشە كردنەی داعش لە درێژماوەدا بوو بە مەترسی بۆ سەر هێمنایەتی ووڵاتانی خۆیان، بە شێوەیەك كە لە لە ئێستادا داعش و كێشەكانی ئەو رێكخراوە ترۆریستیەو هەروەها مەعامەلەو سات و سەودا لە گەڵ رژیمی ئاخوندی بۆتە خاڵی هاوبەش و بە یەك گەیشتنی هێزە جیهانیەكان و لە هەمانكاتیشدا سەرچاوەییكی ناكۆكی و بەر یەككەوتنە سیاسیەكانیانە.

3. كاك بابەشێخ پێتان وایە بوونی ئەو ئالوگۆرانە تا چ رادەیێك دەتوانێ‌ بە قازانجی گەلی كورد بشكێتەوە و كورد پێویستە لەم هەل و مەرجدا چی بكات؟ 

بە باوەری من ئەگەر گەلی كوردو هێزە سیاسیەكانی كوردستان یەكگرتوانە روبەروی هەلومەرجە نالەبارەكان و قەیرانەكان ببنەوە و دوور كەونەوە لە ناكۆكی و لە بەرانبەردا تەبایی و هاوكاری و هاوفكری بكەنە بەردی بناغەی كارەكانیان و لە هەمانكاتدا وریای پیلانەكان و سیاسەتی دوژمنكارانەی رژیمی ئاخوندی بن لەگەڵ بوونی كێشە ئابووریی و كۆمەڵایەتی و سیاسیەكان گومان لەوەدا نیە كە ئەم هەلومەرجە دەتوانێ بە قازانجی گەلی كورد تەواو بێ.

4.  ئەگەر بێینە سەر باسی ئێران خوێندنەوەتان بۆ دوایین پێشهاتەكانی پێوەندیدار بە وەڵاتی ئێران و رژیمی ئاخوندیی چییە؟

لە دوای رێكەوتنی ووڵاتانی 5+1 لە گەڵ رژیمی ئێران و هەڵگیرانی بەشی سەرەكی ئابڵوقەكان لە حكومەتی ئاخوندەكان، دەسەڵاتدارانی لە ئێران لە خۆبایی كردوە بە شێوەیەك كە مەودای دەستێوەردانەكانی رژێم لە كاروباری ناوخۆی ووڵاتانی ناوچەكە پەرەی سەندوە و هەروەها لە ناوخۆی ئێرانیشدا سەركوت و چەوسانەوەی خەڵك بە تێكراو ئازادیخوازان بە تایبەت پەرەی سەندوە.

لە ڵایەكی دیكەوە رێكەوتنی رژیم لە گەڵ ووڵاتانی رۆژئاوایی كە دەبوو ببێتە هۆی تەبایی ناوخویی لە حاكمیەتی ئاخوندەكان بە پێچەوانەوە بۆتە هۆی كێشەو ناكۆكی قوڵی نێوان باڵەكانی رژیم و كێشەكانی نێوان سەرانی رژیم و مۆرە سەرەكیەكانی دەسەڵات بە شێوەیەكی بەرچاو پەرەی سەندوە بە شێوەیەك ژمارەیەك لە دەست و پێوەندەكانی دەسەڵات چ لە ناوخۆی ئێرانداو چ لە دەرەوی ئێران ئەو ناكۆكیانە بە مەترسیدار بۆ سەرداهاتوی دەسەڵات دەزانن.

بەپێ ئەو شی كردنەوەی كە باسم كردو هەروەها بە پێ بەراوردی زۆربەی شارەزایانی سیاسی هەلومەرج لە ئێستاو لە داهاتودا بە قازانج و لە چوارچێوەی بەرژەوەندیەكانی دەسەڵاتی ئاخوندی نابێ.

 

5. بەرێز حسینی لە مانگی رەشەممەی داهاتوو دەیەمین خولی هەڵبژاردنەكانی پەرلەمان و پێنجەمین خولی مەجلیس خوبرەگانی رێبەری بەرێوە دەچێ؟ خوێندنەوەتان بۆ ئەو هەڵبژاردنە چییە و بە گشتیش دیاردەی هەڵبژاردن لە رژیمی ئاخوندیدا بە چ واتایێك دێ؟ ئایا هەڵویستی سازمانی خەبات بەلای تەحریمدا دەبێ یان خود بەشداری كردن؟

كاتێك باس لە پرۆسەی هەڵبژاردن لە ووڵاتێكدا دەكرێ دەبَی میكانیزمی هەڵبژاردن و بنەماكانی دیموكراسی بخەینە بەرچاو. ئایا لە ئێران حكومەتێكی دیموكراسی لە سەر كارە؟ وەڵامەكەی بێگومان نەخێرە. وەك ئاشكرایە لە ئێراندا حكومەتێك كار دەكات كە هیچ بنەمایەكی ئازادی و دیموكراسی تێدا بەدی ناكرێ. حكومەتی ئێران یەكێك لە سەرەرۆترین و دیكتاتۆرترین دەسەلاتەكانە لە جیهان و ناوچەكەدا. 37 ساڵە ئاخوندەكان بە بێ سڵەمینەوە سەرەتایی ترین بنەماكانی ئازادی پێشێل دەكەن. لە ئێراندا تەنیا یەك بەش لە سێ بەشەكانی حكومەت دەسەڵاتی هەیە كە ئەویش رێبەری رژیم و دەست و پێوەندەكانین. لە مێژووی ئەو حكومەتەدا بینیومانە مەجلیسی شورای ئیسلامی لە خزمەت ویستەكان و فەرمانەكانی خامنەییدا بوەو ئەگەر هەر یەك لە ئەندامانی مەجلیس بە سەرەتایی ترین شێوە دژایەتی خامنەیی و فەرمانەكانیان كردبێ كەوتۆتە بەر غەزەب و تورەیی رێبەری رژیم و بەیتی رێبەری.

لە هەڵبژاردنی مانگی رەشەممەدا هەلومەرج گەلێك جیاوازترە لە چاو شانۆی هەڵبژاردنەكانی رابردوو. لەشانۆی ئەمجارەدا كە لە یەك كاتدا نوێنەرانی مەجلیس و خوبرەگانی رێبەری هەڵدەبژێردرێن، باڵی خامنەیی زۆر توندتر كەوتۆتەپەلاماری نەیارانیان و هێرش بۆسەر لایەنگرانی هاشمی رەفسەنجانی و حەسەن روحانی. شورای نێگەهبان متمانەی نەداوە بە ژمارەیەكی زۆری ئەو كەسانەی كە گومانیان لە سەرە كە دژایەتی دەسەڵات و باڵی فەرمانرەوا دەكەن. جێگری وەزیری ناوخۆی رژیم رایگەیاندوە كە 6 هەزارو 180 كەس لە لایەن شورای نیگەهبان موتمانەیان پێ نەدراوە كە لە ناو ریزی ئەو كەسانەی متمانەیان پێ نەدراوە ناوی نەوەی خومەینی دەبیندرێ.

بەو پێ یە هەڵبژاردن لە چوارچێوەی سیستمی فەرمانرەوایی حكومەتی ئاخوندی بێجگە لە هۆیەكی تەبلیغاتی و ساختەكاریەك بە مەبەستی درێژ كردنەوەی دەسەڵات و چاوبەستی سیاسی، ناكرێ ناوێكی دیكەی لێ بندرێ. ئاشكرایە بەشداری كردن لە هەڵبژاردن و گەرمدا هێنانی ئەو شانۆگەریە تەنیا ئاخوندان و سیستمی فەرمانرەوایی دواكەوتوانەیان قازانجی لێ دەبینن. سازمانی خەباتی كوردستانی ئێران لە سەر بنەمای ئەو راستیانەی كە لە سەر دەسەڵاتی دواكەوتوانەی رژیمی ویلایەتی فقیە هەیەتی هەر جۆرە هەڵبژاردنێك لە ئێران اد بە غەیرە دیموكراتیك دەزانێ و داوا لە جەماری كوردستان دەكات تا ئەو جێگەی بۆیان دەكرێ و زیان بە گیان و ژیانیان ناگەێنێ بەشداری لەو شانۆگەرییە نەكەن و بە تەواوی تەحریمی بكەن.  

  6. پێتان وا نییە بوونی رەوتی رووحانی لە باقی رەوتەكان باشترە و دەكرێ‌ ئومێد بە چارەسەری بە دەستی ئەو رەوتە هەبێ؟

كێشەی سیستمی دەسەلاتداری تەنیا لە گەندەڵی و ستەمگەری كەسەكاندا نیە، كۆسپی گەورەو بەربەستی سەرەكی لە خودی سیستمی حكومەت و قانونی بنەرەتی حكومەتدایە. رۆحانی و هەر كەسێكی دیكەو بە هەر دروشمێكی جوان و زریقەو بریقەدار بێتە سەر دەسەڵات، كاری سەرەكی خزمەت بەو دەسەڵاتەیە كە دەسەڵاتی ویلایەتی فەقیهه، لە ئێراندا كەسێك لە سەرەوەی دەسەڵاتە كە خۆی وەك نوێنەری خودا لە سەر زەوی دەناسێنی بە حەزی خۆی بریار دەدا. كاتێك لە قانونی بنەرەتی ئێراندا ئافرەت ناتوانی خۆی بۆ سەرۆك كۆمار بپاڵێوێ كاتێك تەنیا رێگە بەو كەسانە دەدرێ خۆیان بپاڵێون بۆ بەرپرسایەتیە حكومەتیەكان كە پێ بەندی دواكەوتوانەترین قانونی بنەرەتی بن چ واتایێك بۆ هەڵبژاردن دەمێنیتەوە. بەو پێ یە نە رۆحانی دەتوانێ و نە گەرەكیەتی هیچ ئاڵوگۆرێك بە قازانجی خەڵك لە ئێراندا دروست بكات.

خەڵكی ئێران كاتێك دەتوانن هومێدوار بن بە ئاڵوگۆرەكان كە لە ئێران دا سیستمی بنەرەتی حكومەتداری لە ئێراندا گۆرانی بەسەردا بێت و قانونی ئەساسیەك لە ئێران پەسەند بكرێ كە لە سەر بنەمای دیموكراسی و پێكەوە ژیان بێ و دوور بێ لە حكومەتی دەستەیەكی تایبەت و مەزهەبێكی دیاری كراو لە ئێراندا و تێكرای چین و توێژەكان خاوەن بەش بن لە خێرو بێری ووڵات.

7.كاك باباشێخ ئایا پێتان وایە لەو دۆخە پڕ قەیرانەی ئێستای ئێران دۆخی حیزب و لایەنە سیاسیەكانی كوردستان ئێران و بە گشتی بەرەی ئازادیخوازان لە هەل و مەرجێكی شیاو و گونجاو دابێ؟

بە باوەری من دروست نیە كە دۆخی سیاسی ئێران لە گەڵ دۆخی سیاسی دەسەڵات پێكەوە ببەستینەوە. ئەو سەرەتایەی كە لە پێشدا باسم كردلە پێوەند بە هەلومەرجی دەسەڵات بەرچاورونیێكە بۆ پێناسە كردنی هەلومەرجی سیاسی لە ئێراندا. هەر چەندە لە ئێراندا قەیرانەكان زەق و بەرچاو و چارەسەر نەكراو بن، ئەگەر هێزو لایەنە سیاسیەكان چالاك و كارامە نەبن ناتوانن هەلومەرجەكە بە قازانجی جەماوەر و خۆیان بقۆزنەوەو دەستەبەری بكەن.

بە داخەوە لە ئێستادا لێكترازان لە نێو لایەنە سیاسیەكانی كوردستان بۆتە بەربەستێكی سەرەكی و هیچ كام لە هەوڵەكان بۆ كاری هاوبەش و دارشتنی قەوارەیەك بۆ یەكێتی نەتەوەیی نەگەیشتۆتە ئەنجام. بە واتایەكی دیكە لایەنە سیاسیەكان كە بانگەوازی دیموكراسی و یەكسانی و رێزی بەرانبەر دەكەن بە بۆچونی من یا واقعی دروشمی دیموكراسی بە نادروستی تەفسیر دەكەن و لێك دەدەنەوە و یا لە دیموكراسی و رێزی بەرانبەر وەك دروشم و بە مەبەستی بردنە پێشی كارەكان كەڵك وەردەگیرێ.

ئەگەر لایەنە سیاسیەكان یەكدەنگی بكەنە بنەماو هەوڵ بۆكاری هاوبەش بدەن خۆیان دەبنە خوڵقێنەری هەلومەرجی شیاو. بە واتایەكی دیكە لە نالەبارترین هەلومەرجیشدا ئەگەر یەكێتی و تەبایی و كاری هاوبەش پەیرەو بكرێ دەتواندرێ بە سەر كەندو كۆسپەكاندا زاڵ بین. 

سازمانی خەبات وەك هێزێكی نیشتمانی و نەتەوەیی كە باوەری بە كاری هاوبەش لە گەڵ هێزو لایەنە سیاسیە كوردستانی و سەرانسەریەكان هەیە بە بەردەوامی پێشنهادی بۆ یەكریزی پێش كەش كردوەو هەر لە سەر ئەو بنەمایە و بە تێ گەیشتن لەو راستیە پێویستە لە گەڵ سازمانی موجاهیدینی خەڵقی ئێران هاوپەیمانی چەندین ساڵەی هەیە.

8.ئایا هیچ هەنگاو بۆ چارەسەری ئەو دۆخە لە ئارادایە؟

بە داخەوە لە ئێستادا هیچ بەرچاو رونیەك نیە بۆ چارەسەر كردنی ئەو دۆخە نالەبارە. ئومید دەكەین لە داهاتوووێكی نزیكدا بە هەستی بەرپرسیارەتی تێكرایی بتوانین بە سەر كۆسپەكانی بەردەم ئەو پرۆژەیە دا سەركەوین كە گومانیش لەوەدا نییە بەسەر كەندوكۆسپەكاندا زاڵ دەبین و بەرچاوڕوونیشمان خەباتی رەوای شۆڕشگێرانەو پشتیوانی جەماوەری كوردستانە.

9.سازمانی خەبات چ بەرنامە و پرۆژەیێكی عەمەلی هەیە بۆ چارەسەری ئەو كێشەیە؟

لە ساڵی 2010 پرۆژەیەكی 10 خاڵیمان بە هێزو لایەنە بەڕێزە سیاسیەكانی كوردستان پێشكەش كرد. ئەو پڕۆژەی سازمانی خەبات بە شێوەیەكە كە كەمترین دژایەتی لە گەڵ بنەماكانی كاری هاوبەش لە پێناو خزمەت بە گەل و نیشتمان تێدا نابیندرێ . هەروەها لە سەردانی نۆێنەرانی بەڕێزی لایەنە سیاسیەكان بۆ لای سازمانی خەبات و هەروەها لە سەردانی نوێنەرانی سازمان بۆ لای لایەنە سیاسیەكانی كوردستانی باسی پێویستی كاری هاوبەش و یەكدەنگی كراوەو لە تازەترین پێشنهادی سازمانی خەبات داوامان كردوە كە یەكێك لە هێزەسیاسیەكان دەستپێشخەری بكات و دەعوەتی نوێنەرانی هێزو لایەنەكان بكات تا لە نزیكەوە قسە لە سەر میكانیزمێك بكەین بۆ ئەوەی بتواندرێ بە جۆرێك هەوڵ بۆ پێك هێنانی چوارچێوەیەك بۆ كاری هاوبەش بكرێ.

 
ڕێکه‌و 2016-02-13 17:14:43
به‌شی ( دیمانه‌ )







سیاسی