مەترسی كۆمەڵگەی خوێندكاری! یەكێك لەو باسانەی لەمرۆدا لە زانستگاكاندا دەبێ سەرنجی بدرێتێ و دژمنیش خەریكی پەرەپێدانیەتی مەترسی  "لیبرالیسم"ی كۆمەڵگەی خوێندكاریە و كەسانێكیش پێداگری لەسەر ئەوە دەكەن كە ئەو بیرۆكانە لە زانستگاكان و كۆمەڵگەدا پەرەپێبدەن.

ئەوە نیگەرانی ئاخوندێكە كە لە زانستگاكاندا دانراوە بەناوی عەباسی دەشتی كە رۆژی 24ی خەزەڵوەر گوتی. مەبەستی ئەو ئاخوندەش لە مەترسی لیبرالیسم لە كۆمەڵگەی خوێندكاری، پەرەسەندنی دۆخێ‌كی پڕ لە نەفرەت و رق و ناڕەزایەتی لە زانستگاكان دژ بە رژێمە، كە هەر چیەك لەگەڵ بیركردنەوەی دواكەوتووانەی ئەواندا یەكنەگرێتەوە بەو وشانە پێناسەی دەكەن.

نمونەیەك لەو بابەتانەی بۆتە هۆی نیگەرانی و دڵەڕاوێی ئاخوندان، رۆژی 25ی خەزەڵوەر لەلایەن خوێندكارانی زانستگای بجنوردەوە رووی دا.

لەوێ دا 300 كەس لە خوێندكاران بە ناڕەزایەتی لە دزی و گەندەڵی دەسەڵاتدارانی رژێم و رەوشی خراپی خزمەتگوزاری، رێگەی چوونە ژوورەی زانستگایان داخست. ئەوە لە كاتێكدا بوو كە گوێ لەمستانی ئاخوندان بە هەموو شێوەیەك هەوڵیان دەدا كە خوێندكارانی ئەو زانستگایە واز لە ناڕەزایەتیەكەیان بێنن، بەڵام بڕیاری خوێندكاران لەوە بەرزتر بوو كە فێڵ و فتووری كرێگرتەكان كاریان تێ بكات.

بەڵێ، مەبەستی ئاخوندەكان لە مەترسی لیبرالیسم لە زانستگاكان ئەو بزوتنەوە ناڕەزایەتیانەیە كە هەر چەند لە هەنگاوی یەكەمدا بەشێوەیی ئاشتیانەو مەدەنی داواكانیان دەخەنەروو، بەڵام رژێم بە باشی دەزانێ‌ كە هەر زوو باری سیاسیی بە خۆوە دەگرێ. رێك وەكوو ناڕەزایەتی چەند هەزار كەسی چین و توێژەكانی جەماوەر لە رۆژی 25ی خەزەڵوەری بەر دەركی مەجلیسی رژێم كە لە دوای ماوەیەك دروشمە سینفیەكان بە دروشمی "زیندانی سیاسی دەبێ ئازاد بكرێ" گۆڕا.

جێی بیرهێنانەوەیە كە رۆژی 21ی خەزەڵوەر خوێندكارانی زانستگای رازی كرمان وتاردانی پاسدار سەعید جەلیلی مۆرەی باندی خامنەییان تێكدا. ئەو خوێندكارانە بە بەرزكردنەوەی دروشم گەلێك خوازیاری ئازادی یاشار سوڵتانی بەرێوەبەری بڵاوكراوەی مێعماری بوون كە دزی و زەوی خواردنی پاسدار قاڵیبافی لە شارەداری تاراندا ئاشكرا كردبوو. ناڕەزایەتیەكان بە جۆرێك بوو كە پاسدار جەلیلی مەجبور بوو وتارەكەی نیوەو ناچڵ وازلێبێنێ و زانستگا بەجێ بێڵێ.

هەروەها خوێندكارانی زانستگای سەنعەتی شەریف بە ناڕەزایەتی چەند رۆژەی خۆیان كە لە رۆژی 3ی ڕەزبەرەوە دەستیان پێ كردبوو، توانیان پاشەكشە بە دەسەڵاتدارانی رژێم بكەن لەبابەت وەرگرتنی پووڵی ساڵانە لە خوێندكاران. ئەوان بەتایبەت شیعاریان دەدا: خوێندكاری رۆژانە خوێندنی بە خۆراییە.

رۆژی 10ی ڕەزبەریش خوێندكارانی خواجەنسیری تاران لە ناڕەزایەتیەكی هاوشێوەدا هاواریان دەكرد:

"من بە زۆر پووڵ نادەن، من بە زۆر پووڵ نادەم"

راستی ئەوەیە كە رق و بێزاری خوێندكاران و سیاسی بوونی ناڕەزایەتیەكانیان هاوشێوەی باقی چینەكانی كۆمەڵگە، مۆرەكانی رژێمی تووشی ترس و دڵەڕاوكێ كردوە. ترسێك كە بۆتە هۆی ئەوەی بە دێڕگەلێكی وەك "مەترسی لیبرالیسم لە كۆمەڵگەی خوێندكاری" دەریبڕن.
ڕێکه‌و 2016-11-20 10:35:58
به‌شی ( وتاری کۆمه‌ڵایه‌تی )







سیاسی