دەزگایەك كە كۆدەكرێتەوە! رۆژی پێنج شەممە 27ی خەزەڵوەر، مەئمورێكی سەركوتگەری رژێم لە فومەن، زلەیەكی لە ئافرەتێكی زەحمەتكێشی دەستفرۆش دا.

دوو رۆژ دوای ئەوەی مەئمورێكی دیكەی رژێم لە ورمێ لاوێكی دەستفرۆشی دایە بەر لێدان و شكەنجە. هەواڵ و گرتەی فیلمی ئەو دوو روداوە هەر زوو لە ئینترنێت و تۆڕەكۆمەلایەتیەكان بڵاوكرایەوەو كاردانەوەی خەڵكی بەدوای خۆیدا هێنا. كۆڕێكی تازەڵاوی ئەو پیرێژە فومەنیە، لە تۆڕە كۆمەڵایەتیەكاندا داوای لە خەڵك كرد كە هەواڵی ئەو دەستدرێژیە بڵاو بكرێتەوە و بۆ گەرانەوەی مافی هاوڵاتیبوونی، داوای پشتیوانی كرد.

خەڵكی ورمێیش لەسەر لێدانی ئەو لاوە دەستفرۆشە ، كاردانەوەیان هەبوو وە پاشەكشەیان بە مەئمورەكەی رژێم كرد. شێرە ژنێك كە بە ناڕەزایەتی لە هەڵسوكەوتی هێزەكانی رژێم هاواری دەكرد، باقی هاووەڵاتیانی هاندا بۆ بەرانگاری و ناڕەزایەتی بە هێزەكانی رژێم.

جۆزەردانی ئەوساڵیش نزیك بە 35 خوێندكاری كچ و كوڕی خەڵكی قەزوینیان بە تۆمەتی بەشداری ئاهەنگێك، هەر كەسەو بە 99 زەربەی قەمچی سزا دا.

هەر لە سەرتای ساڵیشەوە كرێكارانی ناڕازی كانی زێری ئاق دەڕەی تیكابیشیان بە بیانووی داواكردنی مافەكانیان دایە بەر قەمچی.

دەتوانین رۆژانە هەواڵی لەو چەشنە لە راگەیەنەكاندا بخوێنینەوە یان لە كاتی تێپەڕین لە شەقام و كۆڵانەكان ببینین.

هەر لەو سەرودەمەدا بوو كە باسێكی شەرعی مافەوانی لە نێوان ئەندامێكی هەیئەتی زانستی كۆلیژی ماف و زانستی سیاسی زانستگای تاران لەگەڵ موحسینی ئێژەیی جەلاد، لەسەر چۆنیەتی بەرێوەبردنی مادەی 102ی قانوونی جەزا رووی دا كە ئایا قەمچی لێدان بۆ وێنە لە خوێندكاران قانوونیە یان نا؟ (ماڵپەڕی حكومەتی ئافتاب 10ی جۆزەردانی 95)

هەر لە یەكەم ساڵەكانی دوای سەركەوتنی راپەرینی 57، هێزە شۆرشگێڕەكان بە تەواوی لە بەرامبەر قانوونی بنەڕەتی و قانوونی تۆڵە ی خومەینی راوەستان و  رایانگەیاند كە ئەو  قانوونانە لە ئاستی خەڵكی راپەریوی ئێراندا نین و بە قانوونێكی دواكەوتوو وە دژە مرۆییان پێناسە كرد. بۆیە خومەینی سەرشێتانە كەوتە جەستەی شۆرشگێڕان و دەستی كرد بە خوێنیاندا.

لەمرۆداو دوای تێپەڕینی زیاتر لە 3 دەیە، نزیك بە 50 ملوێن ئێرانی موبایلیان بەدەستەو لە شەقامەكاندا راوی هەر رووداوێك دەكەن كە جەلادان و مۆرە سەركوتگەرەكانی خامنەیی لە بەر چاوی جیهان ریسوا بكەن، هەر وەك چۆن لەو چەند نمونەی لە سەرەوە باس كرا، كردیان. وە جامی ریسوایی و پڕ لە شوورەیی ئاخوندانیان سەراوبن كرد و راگەیێنە جیهانیەكانیان لێ ئاگادار كرد.

بە خۆشیەوە لەم سەردەمەدا حەتا لێدان و شكەنجەی زیندانیانیش هەر زوو بە رای گشتی دەگا، هاوكات ناونیشانی جەلاد و شكەنجەگەرەكانی رژێمیش هەر زوو بڵاودەكرێتەوە. كارێكی خێر كە كەمترین بەرپرسایەتی هەر مرۆڤێكی شەریف و ئازادەیە. كارێك كە بە جۆرێك پارێزراوی كۆمەڵایەتی بۆ خەڵكی بەدوادا دێ و لە بەرامبەردا رژێم و مۆرەكانی تووشی كێشە دەكا.

هەر چەند ئەوە ئەركێكە كە خەڵك لە یەكەم هەنگاودا بۆ بەرەنگاریی لەگەڵ هەر شێوە كردەوەیەكی نامرۆڤانەی حكومەتی ئاخوندان، لە ئەستۆی دەگرن. بێگوومان جەماوەر لەو ئاستەدا ناوەستن و درەنگ یان زوو لە بەرامبەر مۆرە سەركوتگەرەكاندا هەڵدەستن. ئەو رۆژە یەكەم پەشیمان لە كردەی خۆی خامنەیی و مۆرە سەركوتگەرەكانی دەبن.

هیچ كەس كەفالەتی ئەوەی نەكردوە كە بێرێزی بە دەستفرۆشێكی سادە، لە ناكاو دەبێتە كڵپەی ئاگری راپەرینێكی كۆمەڵایەتی. هێشتا شۆرشی تونس زۆری بەسەردا نەرۆیشتووە و هەموومان ئەزمونی ئەو شۆرشەمان باش لە یادە.

زۆر دوور نیە كە رۆژێك یەكێك لەو بروسكانە، ئاگر لە خەرمانی بوونی نیزام بەردا. ئاگرێك كە دەتوانێ‌ سەرتاپای نیزام بسوتێنێ.

مەئموری تەنیاییەكانی خامنەیی و مۆرە ئیتلاعاتیەكانی باشە بزانن كە بەراوردی ئەو كۆمەڵگە بە بۆشكەی بارووت، بەراوردێكی هەڵە نیە، هیچ زیادەرەویی و گەورەكردنەوەیەك لە بەراوردەدا نیە. كە وایە بزانن ئەوەی دەیچێنن درەوی دەكەن.

جەماوەری ئێران كە كێرد بە ئێسكیان گەیوە، پێشتریش زۆر جار نیشانیان داوە كە كاتێ راپەڕن، كارێكی گەورە دەكەن.
ڕێکه‌و 2016-11-21 09:53:18
به‌شی ( وتاری کۆمه‌ڵایه‌تی )







سیاسی