بەرێوەچوونی پلۆنۆمی یەكەمی كۆمیتەی ناوەندی هەڵبژێردراوی كۆنگرەی شەشەمی سازمانی خەبات






رۆژانی شەممە و یەكشەممە 26 و 27ی خاكەلێوەی
 1396 لە بارەگای ناوەندی سازمانی خەبات بە ئامادەبوونی سكرتێری گشتی، یەكەمین پلۆنۆمی كومیتەی ناوەندی كۆنگرەی شەشەمی سازمانی خەبات ی كوردستان  بەرێوە چوو. 


پلۆنۆم بە دەقیقەیەك بێدەنگی و فاتیحایێك بۆ رێزگرتن لە روحی پاكی شەهیدان دەستی بەكارەكانی كرد


 و پاشان بەرێز كاك بابەشێخ حسێنی سكرتێری گشتی سازمانی خەبات ی كوردستان پلۆنۆمی كردەوە و سەبارەت بە كۆتایی كۆنگرە و دەسپێكی كارەكان بۆ وەرزێكی نوێ و چۆنیەتی و میكانیزمی پێش كەوتنی كاروباری سازمان قسەی كرد.


لەناو باسەكاندا بەرێز كاك بابەشێخ حسینی، تیشكی خستە سەر سیاسەتە ستراتیژییەكانی سازمانی خەبات وەك هەڵوێستی نەگۆری سازمان لە پێوەند بە رژیمی ئاخوندی و دروشمی رووخان و رەدكردنەوەی هەر جۆرە دانووستانێك لەگەڵ ئەو سیستەم و دەسەڵاتە،  هەروەها لەسەر پێوەندی و دۆستایەتیەكانی لە ئاستی ئێران و كوردستان بە گشتی و هەوڵدان بۆ راگرتن و پەرەدان بەو پێوەندیی و دۆستایەتیانە پێداگری كردەوە،   لەسەر مانەوەی پێوەرەكانی واقعی و عەمەل گەرابوون و میانەرەویی بۆ كاری سیاسی و تەشكیلاتی لە سازمانی خەبات تەئكیدی كردەوە و  بەو بەرچاوروونیە، ئاسۆی داهاتووی كاری سیاسی سازمانی بە روون و گەشاوە زانی . 


لەدوای وتەی كردنەوەی پلۆنۆم لە لایەن سكرتێری گشتی، دەفتەری سیاسی دیاری كرا  و  هەر لەو پێوەندییەدا  3 كەس لە هاورێیانی كومیتەی ناوەندی وەك ئەندامانی مەكتەبی سیاسی هەڵبژێردران . 


لەدوای برگەی هەڵبژاردنی دەفتەری سیاسی كۆمیسیۆن و ئورگانەكان بە سەر هەر كام لە ئەندامانی كومیتەی ناوەندی دابەش كران و ئایینامەی هەركام لەو ئورگانانە كە پێش وەخت وەك پرۆژە ئامادەكرابوو كەوتە بەرباس و موناقەشە و لەپاش قسە و باسێكی چڕ بە چاكسازیی و دەسكارییەوە ئایینامەی نوێی بەشەكان پەسەند كرا . 


ئەو پرۆژانەی كە لە پێوەند بە بەشی تەشكیلات و دیپلۆماسی و كەرتی ئابووری و ...هتد، لە جەریانی كۆنگرە بریاری لەسەر درابوو تەوەرێكی تری باسەكانی پلۆنۆم بوو، لەدوای باسێكی چڕ و پڕ ئورگانەكان بە رەسمی چوارچێوە و بەرپرسیان بۆ دیاری كرا. پلۆنۆم بریاری دا كە دەسكاری و خاڵە پەسەند كراوەكانی كۆنگرەی شەشەم بە زووترین كات لە رێگەی دەستەیێكی دیاریكراو بچەسپێندرێ‌ و لەكار و ئەركی داهاتووی تەشكیلات كاریان پێبكرێ‌ و ببرێنە بواری كردەوە و عەمەلەوە. 


پلۆنۆم لە دوای 2 رۆژ كاری بەردەوام  بە دیاری كردنی كار و بەرنامە و سیاسەتی داهاتووی سازمانی خەبات لەسەر بناغەی ئاكامی كۆنگرەی شەشەم، كۆتایی بە كارەكانی هێنا و كۆمیتەی ناوەندی هەڵبژێردراو بە بەڵێن بە خوێنی شەهیدان بریاری سەرخستنی پرۆژە پەسەندكراوەكان و بردنە پێشەوەی سیاسەتی نوێی سازمانی خەباتیان دا. 


سازمانی خەبات ی كوردستانی ئێران 


  كومیتەی ناوەندی


28ی خاكەلێوەی 1396






 


 
ڕێکه‌و 2017-04-18 19:01:10
به‌شی ( به‌یاننامه‌کان )







سیاسی