بەشداری هەیئەتێكی سازمانی خەبات لە سمیناری ناوەندی لێكۆڵینەوەی رووداو






رۆژی پێنج شەممە 28ی بانەمەڕی 1396، هەیئەتێكی سازمانی خەبات كە پێكهاتبوون لە بەرێزان رێبوار حسێنی ئەندامی دەفتەری سیاسی، شۆرش حاجی و ئەوین فەرەجی ئەندامانی كۆمیتەی ناوەندی لەسەر بانگهێشتی ناوەندی لێكۆڵینەوەی رووداو بەشداری سمینارێكی ئەو ناوەندەیان كرد لە ژێر ناوی "ئۆراسیا و رۆژهەلاتی نێوەراست" كە بۆ بیرمەندی ناوداری رووسی "ئەلكساندەر دووگین" رێكخرابوو.


ئەو بیرمەندە رووسە خاوەنی نزیك بە 30 كتێب و لێكۆڵینەوەی سیاسیە و كەسایەتیەكی نزیكە لە دەسەڵاتدارانی رووس و تێزەكانی وەك سەرچاوە بۆ چارەسەری قەیرانەكان بەكار دێنن.


پوختەیەك لە باسەی ئەلكساندەر دووگین لە هەولێر: 



لە بیرۆکەی ئەو بیرمەندە رووسەدا جیهانی یەک جەمسەری و دوو جەمسەری جێگای نابێتەوە و پێیوایە قۆناخی دووەمی مرۆڤایەتی قۆناخی کۆمەڵگای مەدەنییە.

ئەلیکساندەر دووگین بە ئاماژەدان بەوەی وشەی خەڵک و گەل مەفهوومێکی بنچینەییە کە دەتوانێت لە کۆمەڵێک هۆزی جیاواز پێک بێت گوتی: "من دڵنیام کە کورد گەلن و ئەمەش قوڵترین و بەهێزترین شووناسە ، مێژوویەکی هەزاران ساڵەیان هەیە و هیچکەس ناتوانێ نکوڵی لە ئێوە بکات وەک نەتەوەیەک".

سەبارەت بە بیرۆکەی ئوراسیا، ئەلیکساندەر دووگین گوتی: "بۆ خەڵکانی وەک ئێمە خەڵک گرنگترین رەگەزە ، جیاوازی رەگەزی لەنێوان خەڵک لەم بیرۆکەیەدا رێگە پێدراو نییە ، هیچ گرووپێک ناتوانێت بەسەر گرووپی دیکەدا زاڵبێت، ئەو جیهانە نوێیە لەسەر ئەوە دامەزراوە کە خەڵک بەهێزترین رەگەزی ناو ئەو بیرۆکەیەیە".

ئەو بیرمەندە رووسە رەخنەی لە جیهانبینی رۆژئاوایی گرت و گوتی: "جیهانی ئەوان یەکجەمسەرە و پێیانوایە یەک بەها هەیە لە جیهاندا و ئەویش جیهانگیرییە، ئەو جیهانەی کە رۆژئاوا خەولقاندوویەتەی ئەوەیە کە گرووپێک زاڵدەبێت بەسەر خەڵکدا، ئەوان جیهان پۆلێن دەکەن بۆ دوو لایەن ، گەشەکردوو و گەشە نەکردوو، ئەگەر گەشەکردوو بی لەگەڵ ئەوانی ئەگەر گەشەکردوو نەبی لەوان نیت ".

ئەلیکساندەر دووگین لە درێژەی قسەکانیدا لەبارەی جیهانگیری رۆژئاوا گوتی: "لە روئیا جیهانییەکەیاندا خەڵک بوونی نییە و تەنیا کەڵک لە گەلان وەردەگرن ، بۆیە بزووتنەوە پۆپۆلیستییەکان لە ئەوروپا لە گەشەکردندایە ، نیوەی ئەمریکاش دەیانەوێت خەڵکەکەی خۆیان دەرباز بکەن بۆیە دەنگیان بە ترەمپ دا، ئەگەر بمانەوێت داکۆکی لە مافی گەلان بکەین دەبێت دژایەتی جیهانگیری رۆژئاوا بکەین".



شایانی باسە لەو سمینارەدا ژمارەیەك لە نوێنەری ئەحزاب، سەركردە و كەسایەتی و چالاكانی سیاسی بەشدار بوون.





ڕێکه‌و 2017-05-18 22:43:22
به‌شی ( چالاکیه‌کان )







سیاسی