ئیلام بێكارترین ناوچەی ئێران

پارێزگای ئیلام نازناوی بێكارترین ناوچەی ئێرانی پێدرا، كە ئەوە زەنگی مەترسیە بۆ لاوان و خوێندەوارە بێكارەكان لەو پارێزگا بێ بەشە.

بەپێی راپۆرتی ماڵپەری حكومەتی "ایلام بیدار" كە 13ی پووشپەر بڵاو كراوەتەوە، بێكاری و ئەو دیاردانەی بەهۆی بێكاریەوە سەرهەڵدەدەن كە هەژاری یەكێك لە هۆ سەرەكیەكانی تووشبوون بە تاوان، بەرز بوونەوەی رێژەی خوێندەواری بێكار، ئەو ئەگەرە بەهێز دەكات كە رێژەیەكی زۆری كەسەكان بۆ رزگار بوون لە فشاری ئابووری روو لە ئەنجامدانی تاوان بكەن.

حەشیمەتێكی زۆری لاوانی ئیلام و شاری ئابدانان خوێندنیان تەواو بووە و مەدرەكی كارناسی  و هەندێكیش كارناسی ئەرەشەد و دوكتورایان لە زانستگاكان وەدەست هێناوە بەڵام بەبێ كار و پێشە سەرگەردانن.

خوێندەواری بێكار لە ئیلام

بەهۆی لێنەهاتویی كاربەدەستانی ئەو رژێمە سەدەنێوەراستیە ژمارەیەكی بەرچاو لە خوێندەوارانی ئەو شارە كە رشتە جۆراوجۆرەكانی زانستگایان تەواو كردوە لە ریستوران و هوتێلی شارە گەورەكانی وەك تاران و لە رەوشێكی تارادەیەك سەخت دا خەریكی كار كردنن بۆ ئەوەی بتوانن لەو رێگەوە شتێك بۆ خۆیان و خانەوادەكانیان وەدەست بێنن.

یەكێك لەوانەی خوێندنی كارناسی تەواو كردووە دەڵێ: چەند ساڵە كە زیاتر لە 20 جار لە تاقی كردنەوەی ئیستخدامی دا بەشداری كردووە و لەو رێگەدا خەرجێكی زۆرم كردووە و نمرەی قەبووڵیشم وەدەست هێناوە بەڵام لەدوای بەدەستهێنانی نمرەی قەبووڵیش، بە بیانووگەلێك رێگەی چوونە نێو رێكخراوەكانم پێ نەدراوە.

لە درێژەدا وتی: بەداخەوە رێژەی ئەو كەسانەی وەرگیراون بۆ ئیداراتی دەوڵەتی لە ئاستی پارێزگا و شار زۆر كەمە كە ئەوە هەلی وەرگرتن و قەبووڵ كردنی ئێمە زۆر حەستەم دەكات.

هێندێ لە لاوانی خوێندەوار و بێكار روویان لە كاری كاتی و سەعات كاری كەم و جوتیاری و حەیوانداری و هەندێكیش خەریكی كاری ئازادن و زۆرێكیش هەروا بێكار ماونەوە. بەڵام هەندێكی دیكە كۆچكردن لە شارستان بۆ شارە گەورەكان و ناوچە دووركانیان پێ باشترە بۆ ئەوەی پیشە و كارێك بدۆزنەوە و بەملی خانەوادەكانیانەوە نەمێننەوە.
ڕێکه‌و 2017-07-06 10:07:20
به‌شی ( کۆمه‌ڵایه‌تی )







سیاسی