گەمارۆ نوێكانی ئەمریكا دژ بە دەسەڵاتدارانی ئێران!

كەریم فەیزیان

بە گوێرەی لێكۆڵینەوە و بەدواداچوونی لێكۆڵەرەوان کردویانە و ئەو بشێوی و ئاڵۆزیانەی لە رۆژهەڵاتی ناوەراست دروست بووە رژیمی ئێران ماکە و دارێژەری سەرەکی ناسەقامگیریه ناوچەکەو جیهاندا، ئەو رەوشە ئەگە رهەروا بەردەوام بێ ئاگری شەرێکی ماڵوێرانکەرتر لە شەری داعش، سوریە، یەمەن و عێراق لە ناوچەکەدا هەڵدەگیرسێ کە زۆر لە وڵاتانی دیكەی ناوچەکە دەگرێتەوە. لێرەدا ئەوەی بۆ ئەمریکا جێگای بایەخە وڵاتە هاوپەیمانەکانیەتی کە ئەگەر بەهۆی پیلانەكانی رژیمی ئێران بكەونە مەترسیەوەو ئالوگۆریان تێدا بکرێ، ئەوە ئەمریکا زەرەرمەندی سەرەکییە و بەرژەوەندی گەورە لە ناوچەکەدا لە دەست ئەدات.  رژیمی ئێران مەبەستی سەرەکی ئەوەیە ناوچەکە ناسەقامگیرتر بکات و دایم شەر و کێشەی تێدا بێت، ئەو رژیمە بە یارمەتی و پشتیوانی لە دەستەو تاقمی شیعە هەوڵ دەدا وەڵاتانی ناوچەكەو بەتایبەت وەڵاتانی كەنداو بكەونە دەست گروپە شیعەكانی نزیك لە خۆی، كە لە ئەگەری سەركەوتنی ئەم پیلانانە، ئاخوندەکان تەمەنی گڵاوی رژیمەكەیان درێژتر دەكەن و دەبنە باڵادەست لە ناوچەكەدا و بە كردەوە حوكمی ئەو وەڵاتانە دەكەن .

 بۆ بەربەستی ئەو کارە نەشیاوانەی رژێمی ئێران و چارەکردنی پێشوەخت، ئەنجومەنی پیران (سەنا)ی ئەمریكا لە دوای هەڵگرتنی بەربەستە قانوونی و یاساییەكان، گەلاڵەی نوێی گەمارۆی سەر رژێمی ئێرانی پەسەند کرد و بەرزیان کردۆتەوە بۆ مەجلیسی نوێنەران (كۆنگرە)، بۆ ئەوەی پەسەند بکرێت و دواتر بخرێتەبەر دەستی سەرەك كۆمار بۆ ئیمزا کردن. ئەوەی لێرەدا جێگای سەرنجە ئەوەیە بۆچی ئەمریکاییەکان،  رژێمی ئێران و روسییەیان خستۆتە یەک تێڕەوە و لە یەک کاتدا گەمارۆ دەخەنە سەر هەردوو لایان، دیارە کە ئەمریکا نگەرانە لە روسیە سەبارەت بە کریمە و پشتیوانیکردنی لە دەوڵەتی سوریە و ئەو گومانەیش کە  ئەمریکییەکان هەیانە لەوەی کە گوایە روسەکان دەستتێوەردانیان لە هەڵبژاردنی سەرکۆماری ئەمریکادا بووە . ئەوەی كە رژێمی ئێرانیان وەک هاوشانی روسیە کە دووهەم زلهێزی جیهانە لە ئاستی نیزامیدا گەمارۆ داوە، بۆ ئەوە دەگەرێـتەوە كە چالاكی تێكدەرانە و بشێوی نانەوەی ئەو رژیمە لە ناوچەكە و هەوڵەكانی بۆ وەدەستهێنانی چەكو چۆڵی كۆكوژ و مەترسیدار و هەروەها سەركوت و پێشێلكردنی مافی خەڵكی ئێران بە هەموو نەتەوەو ئایین و مەزهەبو پێكهاتەیەكەوە، هاوكات رژێمی ئێران هەوڵ دەدا بۆ ئەوەی وەك زڵهێزێكی ناوچەیی هەڵسووكەوت بكات كە ئەم هەوڵ و پاوانخوازیانە كۆمەڵگەی نێونەتەوەیی و بەتایبەت دەوڵەتی ئەمریكای بەو بروایە گەیاندووە كە پێویستە بە جیددی لەبەرامبەر رژێمی ئێراندا بوێستنەوەو سنوورێك بۆ كارو كردەوەكانی دابنرێ. لە لایەكی دیكە ئەگەر چی ئەم هاوشانییە رژێم تووشی لەخۆ بایی كردن دەكات، بەوەی پێی وایە ئەم هەنگاوەی ئەمریكا دەبێتە هۆی ئەوە لەگەڵ روسیە نزیكتر بێتەوە و هەوڵ دەدا حەزی پاوانخوازی و ئیمتیاز خوازی لە ناوچەكە بەتایبەت لە بەرامبەر هاوپەیمانەكانی رۆژئاوا زیاتر بكات، بەڵام رژێمی ئێران وڵاتێکی داڕماوە لە باری نیزامییەوە ، بەدەر لە هێندێ‌ چەکوچۆلی روسی و چینی هیچیکەی نییە ئەوەی نیشانی دەدەن و دەیڵێن هەر هاشوهوشە، دیارە روسیە بە بەهانەی ئەو چەند موشەکە مامناوەندییەی بەناوی  ئێس ٣٠٠  و هێندێ یارمەتیدان بۆ دروستکردنی موشەکی دوور هاوێژ (بالستیک) ، نیوەی سەروەتی ئیرانیان بردووە. بەڵام بەدوور لە چاوەروانی سەرانی رژیم، روسیە لەبەرامبەر ئەمریكا و دۆستەكانی دا نەرمی دەنوێنێ‌ و حەز ناكا كێشەكانی لەگەڵ ئەمریكا لەوە زیاتر و گەورەتر بێ،  وەك بینیشمان بۆ كێشەی سوریە لەگەڵ ترامپ رێكەوت و هێمای ئەوەش دەكرێ لە داهاتوودا لەسەر پرسەكانی دیكە رێكەون. كە ئەمە بۆ رژێمی ئێران هەواڵێكی خۆش نابێ و وەك زۆر جاری دیكە سەریان بێ كلاو دەمێنێتەوە.

  گەمارۆكانی ئەمریكا چەند بەشێکی گرینگ لە خۆدەگرێت، لە پەسەندكراوەكەی سەنادا خاڵی ئەساسی ئەوەیە کە رێگاوشوێنێک دەگرنەبەر بۆ رێگری کردن دەستتێوەردانەکانی ئێران لە وڵاتانی رۆژهەڵاتی ناوین و لە بەشێکیکەشدا باس لەبەرنامەی موشەکە بالستیکییەکانی رژیمی ئێران دەکات ، هەروەها ئەو پێشێلکاریانەی لە لایەن کاربەدەستانی ئێران و دەستوپێوەندییەکانیان دەکرێ دژ بە هاووڵاتییانی ئێران و مافەکانی مرۆڤ لەو وڵاتەدا، هەروەها باس لە کۆتاکردنی دەستی سپای پاسداران دەکات لەو جموجۆڵە تیرۆریستییانەی ئێستا بەرێوەی دەبەن لە نێوخۆی ئیران و ناوچەكەدا. 

ئەم گەمارۆیانەی کە ئێستا سناتۆرەکانی ئەمریکا دژ بە رژیمی ئێران سوورن لە سەری و هەوڵدەدەن بكەوێتە باری جێبەجێ كردنەوە، دەبووایە پانزە ساڵ پێش ئیستا ئەم جدییەتە بکرایە، دەبو لە دەورانی سەرکۆماری بیلکلینتۆن و ئوبامادا بکرایە نەک ئێستا کە ئیران چەند وڵاتی لە رۆژهەڵاتی ناوین خستۆتە ژێر رکێفی خۆی ، و ئەوەش لە ئەنجامی  سیاسەتی چەوتی ڕۆژئاواییەکانە لە ناوچەی خۆرهەڵاتی ناوەراست. 

 بە دەردی کوردە دەڵێ زەرەر لە نیوەش بگەرێتەوە هەر زۆرە ، بە باوەری من ئەم جارەیان وەک جارەکانی پێشو نییە رژێمی ئێران توشی حەریفی خۆی هاتووە و ناتوانێ خۆی قوتار بکات ، ئەم گەمارۆیانە بۆ ئەوەیە وردەوردە پەر و پۆی هەڵپاچن بۆ ئەوەی نەتوانی پەڵ بهاوێ ، بە کوردی پەتی باڵی دەکەن ، لە کۆتاییدا وایبەسەر دێنن توانای پاراستنی خۆشیان نەبێ لە نێوخۆی ئیراندا. 

بەم گەمارۆیانەی کە لە لایەن ئەمریکاوە بەرنامەرێژی بۆ کراوە، دەسەڵاتدارانی رژیم زۆر نگەران و شڵەژاون، چوونكە لە ئاكام و نەتیجەی ئەم هەنگاوانەی ئەمریكا  تێدەگەن و دەزانن چارەنووسیان باشتر نابێ لە دەسەڵاتە دیكتاتۆر درندەكانی دیكەو ئەمانیش هەر بە دەردی ئەوان دەچن. ئەوەی ئەم رژێمە بەرامبەر بە میللەتی ئێران كردوویەتی وەك بێ رێزی بە پێكهاتە نەتەوەیی و ئایینی و چین و توێژە جیاجیانی ئێران و حەیف و مەیل كردنی سەروەت و سامانی وەلاتی ئێران و تەرخان كردنی بۆ كاری تێكدەرانە و ترۆریستی لە ناوچەكە و جیهان، هەوڵدان بۆ وەدەستهێنان و کرینی موشەکی بالستیك و چەکی ئەتۆمی . وێرای گەمارۆكانی ئەمریكا هەندێ هەڵوێستی دیكە لەو وەلاتەوە دەبیسترێ كە نیگەرانی رژیمی زیاتر كردووەو سەرەتایەكن بۆ ئەوەی دڵی پێ خۆش بكرێ نەك بۆ ئەوەی ئەوان بێن رژێمێكی گەندەڵ و خراپكاری لەو چەشنە لەناوبەرن بەڵكوو سەرەتایەكە بۆ ئەوەی چاوپۆشی لە كردەوەكانی نەكرێ و وەك رابردوو شۆرشگێڕان نەكرێنە قوربانی سازان و ئیمتیازدان بە رژیم. بێگوومان ئاڵووگۆر لە ئێران و ناوچەكەدا بەرێوەیە، هیوادارم هێزە سیاسی و خەباتكارەكانی كوردستانی ئێران پێكەوە بە یەكیەتی و تەبایی بتوانن كەڵك لە هەلەكانی بەردەم وەرگرن و دەستكەوتی نەتەوەیی بۆ گەلی كورد لە ئێران وەدەست بێنن.

بروخێ و تەفروتونابێ ویلایەتی فەقیە 

سەركەوێ خەباتی ئازادیخوازانە و نەتەوەیی لە ئێران و كوردستان

 
ڕێکه‌و 2017-07-10 16:22:55
به‌شی ( سیاسی )







سیاسی