رۆحانی: نابێ لە بەرامبەر ژمارەیەكی كەم كە بڵیندگۆی گەورەیان بە دەستە بترسین

رۆژی سێ شەممە 20ی پووشپەری 1396 ئاخوند رۆحانی لە رێ و رەسمێك لەژێر ناوی جەژنوارەی "عومرانی سەلامەت" بە هێرش بۆ سەر سوپای پاسداران و باندی خامنەیی جارێكی دیكە كێشەكانی نێو دەسەڵاتدارانی رژێمی لە دوای شانۆی هەڵبژاردنەكان بە باشی خستەروو.

ناوبراو سەرەتا لە قسەكانی دا هەوڵی دا كە ئیدعای موشەكی و چالاكی و دەستێوەردانی سەربازی لە وەلاتانی ناوچەكە لە دەستی سوپا و خامنەیی وەرگرێ و خواستەكانی خۆی بباتەپێش، دیانی بە زۆر بابەتی گرینگ كرد و وتی: تەواوی ئەو چەكانەی عێراق بۆ شەری داعش پێویستی بوو كێ دابینی كرد؟ كێ پووڵەكەی دابین كرد؟ لەو دۆخەدا كە گەمارۆكان هەبوون كێ پووڵی پێداویستیەكانی خەڵكی سوریەی دابین كرد؟ ئێمە دەبیستین كە مووشەكێك لە خاكی ئێمەوە رۆیشتووەو ناوەندێكی ترۆریستی كردوەتە ئامانج راستە ئەوانەی ئەو موشەكەیان هاویشتووە هەوڵیان دا و فیداكاریان كرد بەڵام كێ موشەكەكەی دروست كرد؟ دەوڵەت و وەزارەتی دیفاع ئەو موشەكەی دروست كردوە.

ناوبراو هەروەها دیفاع لە بەرجام دەكات و هێرش دەكاتە سەر باندی رەقیب و دەڵێ: ئەگەر قەرار بوو بە چوار جنێو و دروشم وەزیری دەرەوەی ئێمە لە مەیدان بچێتە دەر، بەرجامێك سەری نەدەگرت، هێندێك بێ رێزیان بە وەزیری دەرەوەی ئێمە كرد، لە ماڵپەریان، لە رۆژنامەیان، لە رێورەسمی 22ی رێبەندان، لە شەقامەكانی تاران، باشە مرۆڤ نابێ بەهۆی دروشمی ژمارەیەك لە مەیدانی خزمەت كردن دەرچێ.

سەرۆك كۆماری رژێم وێرای بە كەمینە دانانی باندی خامنەیی كە هەموو دەسەڵاتێكیان بۆ خۆیان قۆرغ كردوە، وتی: نابێ لەبەرامبەر ژمارەیەكی كەم كە بەداخەوە بڵیندگۆی گەورەیان بەدەستەوەیە و بەناحەقیش بەدەستیانەوەیە ئێمە لێ یان بترسین، ئێستا بەدەستیانە ئیتر هەر جۆرێك بێ بڵیندگۆ بەدەست ئەوانەیە ئێمە نابێ لە بڵیندگۆ بترسین.
ڕێکه‌و 2017-07-11 23:50:53
به‌شی ( هه‌واڵی ئێران )







سیاسی