پێش بەرێوەچوونی حوكمی ئێعدامەكەی خانەوادە قوربانی لێی خۆش بوون

لە هەنگاوێكی مرۆڤانەی دیكەدا خانەوادەی قوربانی لە بكوژی كچەكەیان خۆش بوون و چەند ساتێك پێش بەرێوەچوونی حوكمەكەی لە مەرگ رزگاریان كرد.

بەپێی هەواڵەكان، بەرەبەیانی رۆژی پێنج شەممە 22ی پووشپەر، عەبدوڵا پوشتكار خەڵكی دێی مڕانەی ناوچەی دیواندەرە لە دوای 7 ساڵ چاوەروانی جێبەجێ كردنی حوكمی ئێعدامەكەی لە گرتووخانەی سنە، لەلایەن خانەوادەی قوربانی كە هاوژینی بوووە، بەخشرا و لە مەرگ رزگاری بوو.

عەبدوڵا هاوژینەكەی كە خەڵكی شارۆچكەی ساحێبی سەربە سەقزە، بەهۆی كێشەی خانەوادەییەوە كوشت، بەڵام پێش بەرێوەچوونی حوكمی ئێعدامەكەی، چالاكانی مەدەنی و مامۆستایانی ئایینی توانیان خانەوادەی قوربانیەكە رازی بكەن و لە بكوژی كچەكەیان خۆش بوون كە بەو كارە عەبدوڵا لە مەرگ رزگاری بوو.

شایانی گوتنە، لە چەند ساڵی رابردوودا چالاكانی مەدەنی سەربەخۆ و مامۆستایانی ئایینی لە چەند هەنگاوی هاوشێوەدا لێخۆشبوونیان لە خانەوادەی قوربانیان وەرگرتووەو چەند كەسیان لە ئێعدام رزگار كردووە.

 
ڕێکه‌و 2017-07-13 15:14:26
به‌شی ( هه‌واڵی کوردستان )







سیاسی