٣٧ ساڵ تێکۆشان له‌ پێناوی ئازادی

جەلال خۆشكەلام

به‌ر له‌ ٣٧ ساڵ له‌مه‌وبه‌ر،  سه‌ركرده‌ی بزووتنه‌وه‌ی رزگاریخوازی كوردستان و ڕێبه‌ری ژیر و زانای کوردمان (مامۆستا شێخ جه‌لال حسینی) دامه‌زراندنی سازمانی خه‌باتی کوردستانی ئێرانی له‌ ٢٧ی ئه‌گوستی ساڵی ١٩٨٠دا راگه‌یاند. سازمانی خه‌بات هه‌رزوو  بوه‌ لانه‌ی شۆڕشگێڕان و نیشتمانپه‌روه‌رانی کورد و بوه‌ هه‌وێنی بوژانه‌وه‌ی فکری نه‌ته‌وه‌یی و سه‌رمه‌شقی ڕێبه‌ریکردنی به‌شێکی زۆر له‌ جه‌ماوه‌ری تازه‌ ڕاپه‌ڕیوی خه‌ڵكی کوردستان.

سازمانی خه‌بات له‌گه‌ڵ هەبوونی له‌مپه‌ر و ڕێگریی خۆیی و غه‌یره‌ خۆیی بەڵام زوو گه‌شه‌ی کردو  جێگه‌و پێگه‌ی خۆی له‌ناو جه‌ماوه‌ردا کرده‌وه‌. سازمانی خه‌بات پاش دامه‌زرانی  درێژه‌ی به‌ کاروانی شۆڕش و تێکۆشانی هه‌مه‌لایه‌نه‌ی سیاسی و كۆمه‌ڵایه‌تی و كولتووری داو‌ و سه‌دان سه‌روه‌ریی بۆ گه‌لی كوردستان  و جوڵانه‌وه‌ رزگاریخوازە‌كه‌ی تۆماركردووه‌. 

مێژووی پڕ له‌سه‌رو‌ه‌ری سازمانی خه‌بات، پڕیه‌ له‌ داستانی ئازایی و بوێری و چاونه‌ترسی. بێگومان تۆماری  ئه‌م دیرۆکه‌شی‌ به‌ خوێنی ئاڵ و گه‌شی هه‌زاران شه‌هید و رۆڵه‌ی قاره‌مان نه‌خشاوه‌ و له‌و پێناوه‌ش دا، نه‌وه‌کانی ئه‌م ڕێبازه‌ له‌ وه‌فاداری و درێژه‌دانی ڕێگای شه‌هیدان به‌رده‌وام ده‌بن.  

هیچ کاتێک گه‌لی کورد له‌ ڕۆژهه‌ڵاتی کوردستان ناتوانێ داستانی ئازایی و بوێری هێزی پێشمه‌رگه‌ و زیندانیانی سیاسی سازمانی خه‌بات له‌ بیرکا، چونکه‌ ئه‌وان نموونه‌ی  که‌سانی وه‌فادار و دڵسۆزی گه‌له‌که‌مان بوون و به‌ وره‌ی به‌رز و شۆڕشگێڕانه‌یان دژی زوڵم و سته‌م وه‌ستانه‌وه‌. ئه‌وان بونه‌ وێردی سه‌رزمان و گه‌ل و نه‌ته‌وه‌ شانازیان پێوه‌ ده‌که‌ن. 

ڕێبه‌ر و دامه‌زرێنه‌ری سازمانی خه‌بات، مامۆستا سه‌یید جه‌لال حسینی یه‌کێکه‌ له‌ دیاریترین ڕێبه‌رانی ناو بزوتنه‌وه‌ی ڕزگاریخوازی کورد. بیر و هزری مامۆستا شێخ جه‌لال کوردانه‌ و شۆڕشگێڕانه‌بوون و تا دوا هه‌ناسه‌ی ژیانی بۆ ئازادی گه‌ل و نیشتمانی تێکۆشا. 

سازمانی خه‌بات له‌ رابردوو و لە ئێستادا نموونەی خەباتگێڕی و گیانفیدایی بووە و، بە جۆرەها دۆخی جیاوازدا تێپەڕیوەو لە سەركەوتن و لە قەیران و قوربانیدان هاوشانی حزبە كوردستانیەكانی دیكه بووه‌، كە ئەمەش نەریتێكی واقعبینیه بۆ هەر حیزبێك یاخود رێكخراو و سازمانێک كە ئامانجی هەبێت و خەبات لە پێناو ئامانجەكانی بكات.

ئێمه‌ له‌ درێژه‌دانی کاروانی خه‌بات بۆ گه‌یشتن به‌ ئازادی پێشه‌نگ و پێشمه‌رگه‌ین.

بۆ لێک نزیکبوونه‌وه‌ی ده‌نگه‌ جیاوازه‌کانی ناو ماڵی کورد و هه‌وڵدان بۆ کار و خه‌باتی هاوبه‌ش له‌ نێوان هێزو لایه‌نه‌ شۆڕشگێڕه‌کاندا سه‌رمه‌شق ده‌بین و ڕێ له‌ ناکۆکی و دووبه‌ره‌کی ناو ماڵی کورد ده‌گرین. 

 ئێمه‌ دڕکی چاوی که‌س نین، ته‌نها دوژمنی کورد نه‌بێ، هه‌رکه‌سیش ئێمه‌ وه‌ک دڕکی چاوی خۆی ده‌بینێ ئه‌وا ده‌بینه‌ موکێشی ده‌ستی. ئێمه‌ بۆ باوه‌ڕو به‌رخودان و کوردایه‌تی به‌ره‌و لوتکه هه‌نگاو ده‌نێین ‌، تا گه‌یشتن به‌ ئامانج هه‌دا ناده‌ین. 

٣٧ ساڵه‌ خۆری هه‌ڵاتووی ده‌مکه‌لی ئازادین، هیوای گه‌ل و باوه‌ڕی به‌رزی پێشمه‌رگه‌ین. بۆ پێشه‌وه‌ هه‌نگاو ده‌نێین و سه‌رده‌که‌وین. 

به‌خێر هاتی یادی پیرۆز.

سڵاوی شۆڕشگێڕانه‌ ده‌نێرم بۆ ئازادیخوازان و پێشمه‌رگه‌و ئه‌ندامه‌ دڵسۆزه‌کانی سازمانی خه‌بات. سه‌ری ڕێز و نه‌وازش بۆ بنه‌ماڵه‌ی سه‌ربه‌رزی شه‌هیدان داده‌نوێنم. ئه‌م یاده‌ له‌ هه‌موو لایه‌ک پیرۆز ده‌که‌م.

 
ڕێکه‌و 2017-08-16 14:17:43
به‌شی ( سیاسی )







سیاسی