بوومەلەرزەكەی كرماشان و ريسوایی زیاتری دەسەڵاتدارانی ئێران!

عەلی بارامی
شەوی یەكشەممە 21ی خەزەڵوەری 1396، بوومەلەرزەیەكی 7.3 ریشتەری پارێزگای كرماشانی لەرزاند و لە چەند ناوچەی وەك ئەزگلە، سەرپێڵی زەهاو، سەلاسی باوەجانی گیلانی غەرب و قەسرینی شیرین و ... زیانی گەروەی مرۆیی و مادیی لێ كەوتەوە. بەپێی راپۆرتەكانی رژیم هەتا ئێستا زیاتر لە 600 كەس كوژراون نزیك بە 9000 كەسیش بریندار بوون. بەڵام ئامارە نارسمیەكان باس لەوە دەكەن كە ئاماری قوربانیانی ئەو كارەساتە سروشتیە زۆر لەوە زیاترە كە ناوەندەكانی رژیم بڵاوی دەكەنەوە.
لە دوای كارەساتەكە، هەر زوو خەڵكی ناوچەكانی كوردستان بەشێوەیەكی خۆبەخشانە كەوتنە كۆكردنەوەی هاوكاری و كۆمەك بۆ زیالێكەوتووان و بەدەم بوومەلەرزە لێدراوانەوە چوون. ئەو هەنگاوە خۆبەخشانەی خەڵكی كوردستان و ئەو بەدەمەوە چوونە توانی ئازاری زیانی بوومەلەرزەكە لەسەر خەڵكی زیاندیتوو كەم بكاتەوە. بەڵام ئەوەی جێگەی سەرنجە كردەوە نامرۆییەكانی رژیم و دامودەزگا سەركوتگەرەكانیەتی لە حاست خەڵكی زیان لێكەوتووی پارێزگای كرماشان و رێگەنەدان بە كۆمەك و هاوكاری شارەكانی كوردستان و دەستبەسەرداگرتنی ماشینەكانی هەڵگرتنی هاوكاری خەڵك و رەوانەكردنیان بۆ ئەنبارەكانی سپای پاسداران و ناردنیان بۆ سوریە. هاوكات رژیمی ئێران هەر چەند رۆژ لە دوای رووداوەكە بەبێ ئەوەی هەوڵێكی جیددی بۆ دەرهێنانی تەرمەكان لە ژێر دارو پەردووی بینا رووخاوەكان بدات، هەر زوو رایگەیاند كە پرۆسەی رزگاركردن و هێنانە دەرەوەی تەرمەكان كۆتایی هاتووەو ئاماری قوربانیانی ئەو كارەساتەشی كەمم دەكردەوە و رێگەی بە بڵاو كردنەوە ئامارە دروستەكان نەدەدا.
لە بەختی خەڵكی لێقەوماو، حەوتوویەك دوای كارەساتی بوومەلەرزەكە، شەپۆلێكی بەفر و باران و سەرما و شەختە رووی لە ناوچەكە كرد و ئەوەش دەرد و رەنجی خەڵكەكەی لەوەی كە هەبوو زیاتر كرد. لەوەش دا رژیم بە كەمتەرخەمی و بەدەمەوە نەچوونی زیاندیتووان هەلی بۆ كارەساتێكی مرۆیی لە پارێزگاكە دەرەخساند و وەك لە راپۆرتەكاندا هاتووە تا ئێستا چەندین نەخۆشی لە نێو خەڵكی لێقەوماودا بڵاو بۆتەوە، دەیان خێمە و چادر ئاگریان كردووە و لێقەوماوان لەوپەری بێ وەزعیدا دەچین.
لە دوای مانگێگ بەسەر ئەو كارەساتە سروشتیانەی بەسەر خەڵكی پارێزگای هەژار نشینی كرماشاندا هات، لە ئێستادا كە پلەكانی سەرما بەرزبۆتەوە و خەڵكی وەزاڵەهاتووی ئەو ناوچانە لە كاركردنی دامودەزگاكانی رژیم نارازین و پێیان وایە دەسەڵاتی ئاخوندان ئەوەی بۆ تیرۆریستان لە لوبنان، سوریە، عێراق و یەمەن دەیكات بۆ خەڵكی هەژار و لێقەماوی پارێزگای كرماشانی لەبەرچاو نەگرتووە لە كاتێكدا خەڵكی ئەو پارێزگایە موحتاجی كەرەستەی سەرەتایی بۆ دروست كردنی سەرپەنا بوون، رژیم بە شانازیەوە كاروانی هاوكاریەكانی بۆ سوریە دەنارد.
لێرەدا تیشك دەخەینە سەر كاركردی دامودەگاكانی رژیم لە ناوچە بوومەلەرزە لێدراوەكان و بەدەمەوە نەچوونی خەڵكی لێقەوماو لەم وەرزی سەرماو سۆڵەدا، لە زمان ژمارەیەك لە نوێنەرانی مەجلیسی رژیم.
لە دوای تێپەرینی یەك مانگ بە سەر كارەساتی بوومەلەرزەكە بەپێچەوانەی میدیاكانی رژیم، دۆخی بوومەلەرزە لێدراوان زۆر خراپەو هەتا ئێستا كارێكی ئەوتۆ بۆ بەدەمەوە چوونیان نەكراوە لە باری نیشتەجێ بونەوە.
سپای پاسدارانی رژیم بەردەوام لە میداییاكانیەوە هاواری ئەوەدەكات كە كانكسی بەسەر ژمارەیەكی زۆری خێزانەكان دابەش كردووە. بەڵام دابەش كردنی كانكس بەسەر خێزانەكاندا ئەوندە سنووردار و كەمە كە لە هەندێ شوێندا بە چەند خێزان و خانەوادە یەك كانكسیان پێ دراوە. ئەوە لە كاتێكدا جوێ لەو كانكسانەی لەلایەن خێرخوازانەوە بۆ بوومەلەرزە لێدراوان نێردرا، سپای پاسدارانی رژیمیش كانكس گەلیكی بەناوی خانووی هەمیشەیی لە سەرپێڵی زەهاو بەسەر بوومەلەرزە لێدراوان دابەش كردووە كە هەمووی بە كوالیت و كەیفیەتێكی خراپ دروست كراون.  سپای پاسداران و ناوەندە دژە خەڵكیەكانی دیكەی رژیم كە كانكسیان بە ناوی هەدیە داوە بە خەڵكی لێقەوماو، لە دروست كردنیاندا بە مەوادی زۆر خراپ و پرۆفیلی سووك، كەڵك وەرگیراوە كە بە بایەكی زۆر كەم تێك دەشكێن و بە بارانێكی كەمیش بانەكەیان تكە دەكاو لە دیوارەكانیەوە ئاو دەچێتە ژوورەوە.
لەو پێوەندەدا نوێنەری رژیم لە پارێزگای كرماشان قاسم جاسمی دەڵێ: بەداخەوە بە هاتنی با زۆرێك لە كانكسەكان عەیبیان هێناوەو هەندێكیشان با بردوونی، كانكسەكان زۆر بێ كەڵكن و بوومەلەرزە لێدراوان لەئێستادا لە رەوشێكی خراپدا دەژین و زۆرێك لە خەڵكەكە هەتا ئێستاش نیگەران و بێ جێگەو رێگەن. دیارە حكومەت بەدواداچوونی نەكردووە.
ئەحسەن عەلەوی نوێنەرێكی دیكەی مەجلیسی رژیم لە سنە  ئەو كانكسانەی لەلایەن سپای پاسداران و باقی ناوەندەكانی رژیم دراوە بە بوومەلەرزە لێدراوانی بە "بڵایەكی خراپتر لە بوومەلەرزە" ناوبردووە. بەپێی وتەی ئەو نوێنەرەی مەجلیسی رژیم لە دروست كردنی ئەو كانكسانەدا بنەمای موهەندیسی لەبەرچاو نەگیراوە بۆیە پەرپووت و لاوازن و زوو تێكدەچن.
لەلایەكی دیكەوە ئەگەر چی سەرانی رژیمی ئاخوندی هەر لە سەرۆككۆمار و رێبەر و سەرۆكی مەجلیس و بەرپرسانی سپای پاسداران سەردانی ناوچە بوومەلەرزە لێدراوەكانیان كرد و سەرۆككۆماری رژیم بەڵێنی قەرزی بە لێقەوماوان دا بەڵام ئەوانەی ئەو كانكسە بێ كەڵك و پەرپووتانەیان بەركەوتووە لەو قەرزەی حەسەن رۆحانی بێ بەش دەبن. هاوكات فەرمانداری رژیم لە سەرپێڵی زەهاو دەڵێ كانكس بە هەموو لێقەوماوان نادرێ. (ماڵپەری ئینتخاب 23ی سەرناوەزی 96)
هەواڵدەری حكومەتی ئیلنا 18ی سەرماوەز بڵاوی كردەوە كە یەكێك لە دانیشتوانی دێی "بی بیانی" دەستی زەهاو وتی خێرخوازەكان كانكسیان بۆ ناردن و بریار بوو لەگەڵ دوو خێزانی دیكە كەڵكی لێوەرگرن، بەڵام كانكسەكانیان لێوەرگرتین و وتیان، قوتابخانە لە پێشتره و دەبێ بۆ قوتابخانە كانكسەكانیان پێ بدەین. لە درێژەدا ئەو كەسە دەڵێ: ئەو دێهاتە 130 بۆ 140 ماڵی تێدایە كە بە هەر 3 بۆ 4 خانەوادە پێكەوە لە كانكسێكی 3 لە 4 دا دەژین و هەتا ئێستا ئەوەشیان بە هەموو دێهاتەكە نەداوە. بەداخەوە لە دابەش كردنی كۆمەكەكاندا خزم خزمێنە و فەرق و جیاوازی دەكرێ.
بەدەمەوە نەچوون و كەمتەرخەمیەكانی رژیم لە حاست خەڵكی لێقەوماوی پارێزگای كرماشان بەجۆرێكە كە رق و توورەیی و بێزاری خەڵك زیادكردووەو نوێنەرێكی مەجلیسی رژیمیش لەو بارەوە دەڵێ ئەگەری زۆرە توورەیی خەڵك كێشەی ئەمنیەتی بۆ رژیم دروست بكات و دەڵێ: چەند شەوی رابردوو لە ژێر بەفر و بۆراندا 35 خێمە و چادری خەڵك با بردنی، بەڵام سەرۆكی بونیادی مەسكەن 48 سەعاتە تەلەفونەكەی هەڵناگرێ.
ئەمە گۆشەیەكە لە دەرد و ئازاری خەڵكی لێقەوماوی پارێزگای بوومەلەرزە لێدراوی كرماشان و فەساد و كەمتەخەمی ناوەندەكانی رژیمی ئێران، كە وەك پەڵەیكی رەش و ریسواییەكی دیكەی دەسەڵاتداریی ئاخونداندا تۆمار دەكرێ، و لە ئەنجامدا هەر وەك ئەو نوێنەرەی مەجلیسی رژیم مەترسی لێكردووە، ئەم بەدەمەوە نەچوونەی ناوەندەكانی رژیم و پشتگوێ خستنی خەڵكی بوومەلەرزە لێدراو لە ئاكامدا دەبێتە هۆی سەرهەڵدانی نارەزایەتی جەماوەری و پێچانەوەی دەسەڵاتی گەندەڵ و دژە خەڵكی ئاخوندان.
ڕێکه‌و 2017-12-16 16:02:26
به‌شی ( کۆمه‌ڵایه‌تی )







سیاسی