قوربانیانی بومەلەرزەو سەرما، یان قوربانیانی حاكمیەتێكی دژە مرۆڤانە؟
و:سروە محەممەدی

 

لەدوای بومەلەرزەكەی پارێزگای كرماشانەوە تا ئێستا رۆژانەو بە بەردەوامی هەواڵی مردنی هاوڵاتیانی ئەو پارێزگایە بۆتە بابەت و هەواڵی بەشێك لە میدیاو راگەیەندنەكان، هەواڵی ئەو كەسانەی كە جارێك بونە قوربانی كارەساتێكی مرۆیی و ماڵ و حاڵ و كەس و كارو سەرپەناكانیان لەدەست داوەو تەنانەت سەرپەنایەكیان نیە بۆ ئەوەی لە سەرمای ژێر سفرو دوچار بوون بە نەخۆشی بیانپارێزێ‌.  ئەمە ئەوەیە كە سارینای تەمەن 2 ساڵە بەهۆی سەرماوە تەواوی بەدەنی توشی عفونەت دەبێت و بەهۆی لەرز و تاوە توشی تەشەنوج دەبێ، و 12 سەعات لە نەخۆشخانە دەخەوێندرێ بەڵام لەو ماوەیەدا هیچ كارێكی بۆ ناكرێ‌ و لە كۆتایدا رەوانەی نەخۆشخانەیەكی كرماشان دەكرێ  بەڵام دوای 5 سەعات گیان دەدات.

هەواڵدەری حكومەتی تەسنیم 6ی رێبەندان لە راپۆرتێكی هاوشێوەدا باسی لە مەرگی منداڵێكی 4 مانگە بە ناوی محەممەد لە دێهاتی كوئیك سیفوری كرماشان كرد كە ئەویش بەهۆی سەرماو عفونەتی سییەكانیەوە گیانی داوە، و خانەوادەی ئەویش بەهەمان شێوە لەناو چادردا دەژیان.

هەواڵدەریەكی دیكەی حكومەتیی بەناوی "ركنا" رۆژی 6ی بەفرانباری 1396 هەواڵی گیان لەدەست دانی چوار نەفەر لەو لێقەوماوانەی بەهۆی سەرماوە پشتراست كردۆتەوە.

ئەو هەواڵدەریە لە زاری شەهاب نادری نوێنەری مەجلیسی رژیم لە پاوەوە هەواڵی داوە كە: تا ئێستا چوار كەس بەهۆی سەرماوە مردوون و  لانی كەم 20 كەس لە بومەلەرزە لێدراوەكان بەهۆی بێ هیواییان لە بەرانبەر قەیرانەكان و كێشەو گرفتەكانیان لە دوای بومەلەرزەكە خۆیان كوشتووە.

ناوبراو هەروەها گوتوشیەتی 30 منداڵی تازە لەدایك بووش بەهۆی خراپی بارودۆخی ناوچەكە لەسەرە مەرگدان.

لە هەواڵێكی دیكەدا هەر لەناوچەی سەرپێڵی زەهاو رۆژی 5ی رێبەندانی 1369، راگەیەندراوە كە: كچێكی گەنجی 17 ساڵە بەناوی نوشین محەممەدی كە لەگەل خێزانەكەی لە دەوروبەری سەرپولی زەهاو لەناو چادردا دەژیا، گیانی داوە.

لە كاتێكدا كە ئاماری مردن بە هۆی سەرماو نەبوونی پێداویستی دەرمانی لە پارێزگای بومەلەرزەلێدراوی كرماشان رۆژ بە رۆژ بەرەو سەر دەچێ، رۆژی چوارشەممە 4ی رێبەندانی 1396 پارێزگای كرماشان بە هەواڵدەری حكومەتی مێهری گووت: هیچ حاڵەتێكی كۆچ كردن بەهۆی سەرماوە لەناوچە بومەلەرزە لێدراوەكان تۆمار نەكراوەو نیە.

هەروەها هێندێك هەواڵدەری لە فەزای مەجازیدا باس لە گیان لەدەستدانی 11 كەس دەكەن بەهۆی سەرماوە لەو ناوچانەدا.

تا ئێستاش لەگەڵ تێپەربوونی سێ مانگ بەسەر كارەساتی بومەلەرزەكەی پارێزگای كرماشان، بارودۆخی ئەو ناوچانە زۆر خراپە و بە هەزاران كەس لە خەڵكی پارێزگای كرماشان لە بونی سەرپەنایەكی پێویست بێبەشن.

تەنانەت ئەو چادرو كانكسانەش كە بۆیان لەبەرچاو گیراوە ناتوانێ‌ گیانیان لە بەرانبەر سەرما و باراندا بپارێزێ‌.

راپۆرتگەلێكی جیاواز باس لەوە دەكەن كە ئەو كانكسانەی كە سوپا دروستیان دەكات بەرگە ناگرن، پێشتر عەباس ئاخوندی وەزیری رێگەوبان و شارسازی كابینەكەی ئاخوند حەسەن رۆحانی، لەبارەی دروست كردنی سەرپەنا بۆ بومەلەرزە لێدراوەكان لەلایەن وڵاتەوە، لەبەری دەرچوو  وە لەو بارەوە گووتی: ئێمە ناتوانین سەرپەرەستی بومە لەرزە لێدراوان لە دروستكردن و سەرلەنوێ‌ جیشتەجێ بوونی كاتی لەئەستۆ بگرین، هەروەها زیادی كرد كە: لەرێگەی بنیاد مەسكەنەوە 3 میلیۆن تمەن بۆ نیشتەجێ كردنی و 5 میلیۆن تمەن بۆ دروستكردنەوەی هەمیشەی لە دێهاتەكاندا لەبەرچاو گیراوە.

بارودۆخی تەندروستی لە ناوچە بومەلەرزە لێدراوەكاندا زۆر خراپەو لەدوای تێپەربوونی ئەو ماوە زۆرە تا ئێستاش زۆرێك لە خەڵكی ئەو ناوچەیە حەمام و سرویسی تەندروستیان نیە.

جێی باسە لەدوای تێپەربوونی ئەو ماوە زۆرە بەسەر ئەو كارەساتە دا، تا ئێستاش پێراگەیشتن بە كێشەی ئەو خەڵكەدا نەكراوەو بە تایبەت لە بواری نیشتەجێبوون، لە كاتێكدا كە سەرانی رژیم بە بەردەوامی ئیدیعای ئەوە دەكەن كە چاویان لەو خەڵكەیەو پێیان رادەگەن.

لە پێوەند بەو ناعەداڵەتیانەی كە لەلایەن سەرانی رژیمەوە لە بەرانبەر ئەو خەڵكەدا دەكرێ‌، هاوڵاتیەك گووتی: دەتوانین لەگەڵ بومەلەرزە بسازێین، بەڵام لەگەڵ ئەو بێ عەداڵەتیانە، ئەو سیاسیە پیسانە ناتوانین بسازێین.

نە سازان لەگەڵ سیاسەتە دژە مرۆڤانەكانی رژیمی ئێران و نا عەداڵەتیەكانی نێو ئەم نیزامە فاسید و جینایەتكارە، نەك تەنیا قسەی ئەو هاوڵاتیە بومەلەرزە لێدراوە نیە، بەڵكو قسەی خەڵكی راپەریویشە كە لە راپەرینەكانی ئێراندا خرۆشان و خوازیاری روخانی ئەم نیزامە فاسید و دژە مرۆڤانەیە بوون.

بارودۆخی نالەباری ژیان و گوزەرانی ئەم خەڵكە لێقەوماوە لە ژێر چادرەكاندا لەگەڵ نەبوونی پێداویستیە سەرەتاییەكانی ژیان، دڵی هەر مرۆڤێك وە لەرزە دێنێ‌.
ڕێکه‌و 2018-01-30 17:13:51
به‌شی ( سیاسی )







سیاسی