رۆحانی بە رفراندۆم كام دەرد چارەسەر دەكا؟!

عەلی بارامی

ئاخوند حەسەنی رۆحانی سەرۆككۆماری رژیمی ئێران، بەبۆنەی 22ی رێبەندان یادی سەركەوتنی شۆرشی گەلانی ئێران دژ بە رژیمی پاشایەتی لە ساڵی 1357دا، وتاری داو لە وتارەكەیدا داوای بەرێوەچوونی رفراندۆم و گشتپرسی لە ئێران كرد و ئەوەی بە چارەسەری دۆخی چەقبەستووی رژیم ناوبرد.

ئەم داوایەی ئاخوند رۆحانی پێویستی بە وردبوونەوەو خوێندنەوە هەیە كە گەلۆ لە یادێكی وادا كە ساڵانە سەرانی رژیم بەشان و باڵی رژیمەكەیاندا هەڵدەداو دەسەڵاتەكەیان بە نمونە و كەم وێنە وێنا دەكرد، چۆنەو چ گۆراوە كە ئەوساڵ رۆحانی رفراندۆم بە چارەسەر دەزانێ‌ و دەیهەوێ چارەسەری چی پێ بكات؟.

روونە لە كاتێكدا رۆحانی وتاری لەو چەشنە لە مەیدانی ئازادی تاران پێشكەش دەكا كە لە مانگێك لەوە پێشەوە لە زیاتر لە 130 شاری ئێران راپەرینی جەماوەری دژ بە رژیمی ئاخوندان بەرێوەچبوو و جەماوەری راپەریو دروشمی روخان و لەناوچوونی رژیمیان، وەك ویستی سەرەكی خۆیان بەرز كردەوە. 

ئەوەی جەماوەری گەیاندە ئەو بروایەی كە رژیمی ئاخوندان دەبێ بروخێ لەلایەك كارنامەی نزیك بە 4 دەیە دەسەڵاتداریی ئاخوندان لە ئێرانە، كە لە وەڵاتێكی دەوڵەمەندی وەك ئێران خەڵكەكەی تووشی دەیان قەیرانی ئابووری و كۆمەڵایەتی بوون و هەژاری و برسیەتی تەنگی بە خەڵك هەڵچنیوە. لە لایەكی دیكە گەندەڵی دارایی و ئیداری دەسەڵاتدارانی رژیمە، كە سەرانی ئەو دەسەڵاتە خۆیان و دەورووبەرەكەیان بە لاخستنی سەروەرت و سامانی خەڵك كە هەر یەكە دەیان ملیارد دولاریان لە بانكەكانی دەرەوەی وەڵات داناوەو گروپە تیرۆریستیەكانی ناوچەكە بە پووڵی خەڵكی هەژاری ئێران ساپۆرت دەكرێن و بەرنامەی چەك و چۆڵی پر خەرجی وەك برنامەی ئەتۆمی و مووشەكی پەرە پێدەدەن، لە پێناو مانەوەو بەهێز كردنی دەسەڵاتەكەیان كە تا ئێستا لە حاست داوا و ویستی سەرەتایی خەڵكی ئێران بێ توانا و لاواز بووە یان ماڵیان بە خاوەن ماڵ رەوا نەدیوە!.

لە هەمان كاتدا شەری نێو باڵەكانی رژیم لەسەر دزی و لاخستنی زیاتری دەسەڵات و سەروەت بووەو رۆژ لە دوای رۆژ زیاتر دەبێ و لەو نێوەدا باڵەكانی رژیم رۆژانە رێژە و ئاستی دزی و فزی یەكتر بۆ خەڵك ئاشكرا دەكەن و ئەوەش دەرفەتی بۆ خەڵكی برسی رەخساندووە كە لەبەرامبەر دەسەڵاتدارانی گەندەڵی رژیمدا بوێستنەوەو لێیان ڕاپەڕن.

رۆحانی لەو دۆخەی كە رژیمەكەی تێی كەوتووەو جەماوەری ئێران خوازیاری روخانی هەموو باڵ و پێكهاتەكانین، بە باس كردنی رفراندۆم كە ئەگەر بۆیان بچێتە سەر! چەند ئامانج دەپێكێ، یەكەم ئەوەی كە بەو رێگە دەیەوێ‌ رژیمەكەی لەو قەیران و دۆخە چەقبەستووەی تێی كەوتووە رزگار بكات و رق و بێزاری جەماوەر بۆ مایەك راگرێ و تەمەنی رژیمەكەی كەمێ‌ درێژتر بكا، دووهەم ئەوەی كە لە شەری باڵەكاندا بتوانێ‌ باڵی بەرامبەر (خامنەیی) پێ ملی ویستەكانی بكا و ئەو ئیمتیازاتانەی دەیهەوێ وەدەستی بێنێ، لەلایەكی دیكە بەر بە وەرینی زیاتری هێزەكانیان بگرن كە وەك بینیمان لە دوای سەرهەڵدانی راپەرین لە ئێران رێژەیەكی زۆری هێزەكانی رژیم پشتیوانی خۆیان بۆ خەڵكی نارازی و راپەڕیو راگەیاند، وە خاڵێكی دیكەی جێگەی سەرنج ئەوەیە كە ئەم باسی رفراندۆمە تاكتیك و میكانیزمێكی فریوكارانەی دیكەی ئاخوندانەیە كە دەیانەوێ بەناوی گەرانەوە بۆ دەنگی خەڵك و گشتپرسی وا نیشان بدەن دەنگی گەل بۆ ئەوان نرخ و قیمەتی هەیە!.

بەڵام دروشمەكانی یەك مانگی رابردووی جەماوەری ئێران پەیامێكی روونی بە دەسەڵاتدارانی رژیم دا كە هاواریان كرد "اصلاحطلب، اصولگرا، دیگه تموم شد ماجرا" یانی ئەوەی كە خەڵكی ئێران بە هیچ دۆعایەكی ئاخوندان ناڵێن ئامین و دەسەڵاتەكەیان لە سەرە مەرگدایە و  رۆحانی و دەسەڵاتدارانی رژیم بەو قسە و فرت و فێڵانە ناتوانن خۆیان لەو مەرگە حەتمیە رزگار بكەن.

 
ڕێکه‌و 2018-02-18 12:42:54
به‌شی ( سیاسی )







سیاسی