نارەزایەتی و راپەرینە جەماوەریەكان كۆتایی تەمەنی رژیم خێراتر دەكەن!

 عەلی بەهرامی 

لە ماوەی شەش مانگی رابردوودا زنجیرەیەك نارەزایەتی جەماوەری لە ئێران و بەتایبەت شارە گەورەكان سەری هەڵدا كە ئەم نارەزایەتیانە لەلایەن هەژارانەوە ستارتی خوارد و تێكرای چین و توێژەكان پشتیوانیان لێ كرد و درێژە و دەوامی هێنا هەتا ئێستا، بەڵام لە سێ رۆژی رابردوودا ئەم نارەزایەتیانە بە مانگرتنی بازاریانی شاری تاران و شارە گەورەكانی دیكەی وەك كرماشان، كەرەج، تەورێز و... پێی نایە قۆناغێكی دیكە. 

ئەو قۆناغەش بە بەرزبوونەوەی نرخی دوولار و ناجێگیربوونی نرخی ئەرز كە كاریگەری زۆری كردەسەر بازار و پەكخستنی كرین. ئەوەش نیشانەی زەق و ئاشكرای وێرانی دۆخی ئابووری و دارووخانی باری ئابووریە كە رژیم هەوڵێكی زۆری دەدا بە تەزریقی دوولاری زۆر بە بازار ئەو شكستە بشارێتەوە، بەڵام لەگەڵ شكست هێنانی ئەو هەوڵەش بازاریان و كەسەبەی تارانی پێتەخت و باقی شارەكان وەك نارەزایەتی بەو دۆخە و دەستەو وەستان و بێ توانایی دەسەڵاتداران لە كونترۆڵی دۆخەكە، دوكان و بازاریان داخست و رژانە سەر شەقامەكان و دژ بە دەسەڵاتی گەندەڵ و بێ توانای ئاخوندان كە تەنیا هونەریان دزی و نانەوەی فیتنە و كێشەیە، دروشمیان دا. 

لە كاتێكدا كە خەڵكی ئێران بە تێكرای چین و توێژەكانیەوە رۆژانە نارەزایەتی بە دۆخی خراپی ژیان لە ئێران دەردەبرن، لەگەڵ پەرەسەندنی نارەزایەتیەكان، دەسەڵات لە رێگەی مۆرەكانیەوە كەوتووەتە سازكردنی هەندێ گومان لە نێو خەڵكی نارازیدا، بۆ وێنە بوونی نارەزایەتیەكانی ئەم سێ رۆژەی دوایی پێوەند دەدەن بە كێشەی باڵەكانی نێو دەسەڵات، مەبەست لەم قسە ئەوەیە كە جەماوەری راپەریو وا حاڵی بكرێن كە ئەوەی ئەوان هەوڵی بۆ دەدەن درێژەی شەری باڵەكانی رژیمە و خەڵك وەك كەرەستەیەك دژ بە یەكتر بەكار دێنن و جەماوەر لەوەدا تەنیا دەبێتە قوربانی و خێرەكەی بۆ باڵەكانی دەسەڵاتە، بەوەش جەماوەر لە شەقامەكانەوە بگێرنەوە ماڵەوە.

لای كەس شاراوە نیە خەڵكی ئێران كێرد بە ئێسكیان گەیشتووە و هەر زوو هاواریان كرد كە بروایان نە بە ئیسلاح تەڵەب و نە بە ئوسولگەرا هەیە و خوازیاری لەناوچوونی تێكرای پێكهاتەی ئەو دەسەڵاتەن و دروشمەكانی مەرگ بۆ دیكتاتۆر و مەرگ بۆ خامنەیی بوونە دروشمی سەرەكی راپەریوان. 

لە ئێستاشدا كە رژیم هەموو هەوڵی خۆی دەدا رەوتی نارەزایەتیەكان بە لارێدا بەرێ و دەمكوت و سەركوتی نارازیان بكات و بۆ ئەو مەبەستە بەشێوەی جۆراوجۆر خەریكی چاوترسێن كردنی خەڵكە، جەماوەر بەبێ گوێدانە هەڕەشە و چاوسووركردنەوەی بەرپرسان و دامودەگاكانی ئەو رژیمە درێژە بە نارەزایەتیەكانیان دەدەن و هەر وەك لە سێهەم رۆژی نارەزایەتی بازاریان دا بینیمان رۆژ لەگەڵ رۆژ رێژەی جەماوەر لە شەقامەكاندا زیاتر دەبێ و ئاخوندان ئەوە بە گەورەترین مەترسی بۆسەر دەسەڵاتەكەیان دەزانن.

لەكاتێكدا كە هەتا دێ رژیمی ئێران زیاتر و زیاتر پەراوێز و گۆشەگیر و دەكرێتە ئامانجی گەمارۆی زیاتری ئەمریكا و دوور نیە لە داهاتوودا وەلاتانی دیكەش بچنە پاڵ ئەو هەوڵانەی ئەمریكا، رژیم لاوازتر و بێ تواناتر دەبێ و دۆخی خەڵك لەوەی كە هەیە خراپتر دەبێ. بۆیە باشترین كار كە دەكرێ خەڵك لە ئێستادا بیكەن ئەوەیە بەبێ گوێدانە ئەو هەرەشە و گورەشانە و ئەو هەوڵانەی بۆ بەلارێدا بردنی نارەزایەتیەكان دەدرێ، درێژە بە نارەزایەتیەكان بدەن و هاوكات كار بۆ گشتگیرتر بوونی شۆرشە جەماوەریەكان بكەن، چوونكە رژیمی ئاخوندی لەوە زۆر لاوازترە بتوانن زۆر خۆ لەبەرامبەر رق و توورەیی جەماوەردا راگرێ.
ڕێکه‌و 2018-06-27 15:20:06
به‌شی ( سیاسی )







سیاسی