چارەنوسی رژیمی ئاخوندی بەرەو كوێ دەچێ!؟

 

رژیمی ئاخوندی ئێران ماوەی چوار دەیەیە لەنێو موعادیلات و كایە سیاسیەكاندا زۆرترین پشكی دەست تێوەردان و شەرئەنگێزی بەركەوتوە لەسەر ئاستی جیھاندا، و لەنێوخۆی وڵاتەكەشی وەك مشەخۆرێك جگە لە ویشك كردنەوەی جەستەو وزەی خەلكی وڵاتەكەی و بە ھەدەردانی سەرمایەو و ژیانی ھاوڵاتیانی، شتێكی زیاتری پێ نەبووە.

لە هێندیك كاتدا رژیم لە دەرفەتەكان بۆ بلاوكردنەوەی پانتایی شەرئەنگێزیەکانی كەڵكی وەرگرتووە و یەك لەو كاتانە ئەو كاتەیە كە باراك ئۆباما سەرۆك كۆماری پێشوی ئامریكا، ساڵی ٢٠١٥ رێكەوتننامەی ناوكەیی ناسراو بە بەرجامی لەگەل رژیم واژۆ كرد، ھێندەی تر دەسەڵاتی رژیمی بەرفراوان كردەوە بۆ شێواندنی مەیدانی سیاسی نێودەوڵەتی. 

بەڵام وەك دەڵێن تەمەنی ھەر رژیمێكی دیكتاتۆرو خوێن خۆر كورتەو تا سەر ناتوانێ بەردەوامبێ. 

رێكەوتنی بەرجام شا دەماری رژیم بوو، بە كۆتایی ھاتنی، چارەنوسی رژیمی بە تەواوی گۆری و فشارەكان تا دێ‌ قورستر و بازنەی گەمارۆكان تەسكتر دەبنەوە.

ئەم وەزعەی كە ئێستا بەرۆكی رژیمی گرتووە، بۆتە مۆتەكە بۆ سەرانی دەسەڵات و لەنێو شەرێكی دەرونی خراپدا دەژین و لە نێوان دو ریانێكدا گیریان كردووە كە دەربازبونیان مەحاڵە.

ئەو گەمارۆیانەی كە لە قۆناغی یەكەمدا و دوای نەوەد رۆژ مۆڵەت كارا كران، بەشێكی زۆر لە سێكتەرەكانی رژیمی كردۆتە ئامانج لەوانە: سێكتەری ماشین، زێرو كانزا خاوەكان، فەرش و پۆشاك، لەسەروشیانەوە تمەن و ئاڵوگۆری دولار. 

ئەوەش كۆڵەكەی وێستانی رژیم لەق دەكات، چونكە توانای ئابوری رژیم لە بازرگانی جیھانیدا ناھێڵێ و پەكی دەخات.

لەناوخۆی وڵاتەكەشیدا قەیرانەكان و نەھامەتیەكانی خەڵكەكەی سەد قات دەكاتەوە و ھێندەی تر لە مەرگ نزیكیان دەكاتەوە. 

ئەوەی جێگەی دڵخۆشیە لێرەدا، ئەم دۆخەی ئێستا دروست بووە چارەنوسی رژیم بەرەو ئاقاری لەناوچوونی یەكجاری دەبات و ناچاری دەكات كە پێملی فشارو بریارەكانی ئامریكا ببێت بەوەی كە لە پەلەقاژە بكەوێت و لەپێناو مانەوەیدا قەبوڵی ھەر شێك بكات.

بە ھەڵسەنگاندنی دۆخی رژیمیش لەناوخۆ و ئەو قەیرانە ئابوریەی كە چاوەرێی دەكات، دەگەینە ئەو نەتیجەیەی كە رژیم تا وەگەرخستنەوەی گەمارۆكانی قۆناغی دووەم كە لە مانگی یانزەی زاینیدا كارا دەكرێنەوە، ناچاردەبێت كە بچێتە سەر مێزی وتوێژ و پێملی بریارەكان ببێ، چونكە ناتوانێ فشاری ئەو ھەمووە قەیران و راپەرینە جەماوەریانەی خەڵكەكەی ... ھەڵگرێت و شانی وەبەردا، یان پشت بە بەلێنەكانی وڵاتانی ئوروپایی و یەكگرتوو ببەستێ، چونكە ئەو وڵاتانە خۆشیان بە باشی دەركیان بە مەترسیەكانی ئامریكا و گەمارۆكانی كردووە.

بۆیە رژیم ئەگەر لەماوەی ئەو نەوەد رۆژەی دیكەدا كە دەرفەتە، ئەگەر بە باشی بیر نەكاتەوە، ئەوكاتە خێرایی زیاتر دەدات بە پرۆسەكانی لەناوچونی خۆی و دەسەڵاتەكەی. هەموو ئەگەرەكانیش باس لەوە دەكەن كە دەربازبوون لەو قەیرانە یەكجار دژوارە و هەر رێگەیێك بۆ رژیم تێچووی یەكجار گەورەی بەدوادادەبێ.

 
ڕێکه‌و 2018-08-09 19:32:39
به‌شی ( سیاسی )







سیاسی