ڕۆڵ و كاریگەری لاوان لەریزەكانی سازمانی خەبات و رێكخراوی لاوان

سارۆ حسێنی


لە سەرەتای باسەكەمدا بە پێویستی دەزانم پێناسێكی لاو، گرینگی ئەو قۆناغەی ژیانی و رۆڵی لە كۆمەڵگادا بكەم.


قۆناغی لاویەتی گرینگ ترین قۆناغی ژیانە كە مرۆڤ پێیدا تێدەپەڕێت، لەو قۆناغەدا كەسایەتیەكەی بەسەرەكیترین گۆڕانیدا تێدەپەرێت و ئەو گۆڕانەش نیشانەكانی بە پێگەیشتنی كەسایەتی دەردەكەون بە بەهرەمەندنبوون و ئامادەگی بۆ وەرگرتن و تێگەیشتنی زیاتر هەستی پێدەكرێت.


دەوری سەرەكی لاوان لە پێشخستن و باشتركردنی باروودۆخی كۆمەڵگادا خۆدەبینێتەوە، لاوان رۆڵ دەبینن لە گۆرانكاری لە بارودۆخی ئێستای كۆمەڵگادا ئەویش لەرێگەی پێشرەوی كردن، داهێنان، نوێگەری و چاوەڕوانی سەرەكی لە لاوانە كە وەڵات پێشبخەن لە بوارەكانی سیاسەت، پەروەردە، تەكنەلۆژی و لە هەمانكاتدا پێویستە لاوان لە راستای ئەو پێشكەوتنانەش پارێزەری فەرهەنگی جوان و بەها بەرزەكانی كۆمەڵگابن.


جێگەی ئاماژەیە كە هێندێك كەس لە كۆمەڵگەی كوردەواری هەمیشە ترسیان لە گۆڕانە كۆمەڵایەتیەكان هەبووە بە پاساوی ئەوەی كە كۆمەڵگا بەرەو نادیار دەبات، بەڵام لاوان هەردەم دید و نیگایەكی جیاواز و تایبەت بە خۆیان هەبووە بۆ بەرێوەبردنی كۆمەڵگا و توانایی بەربەرەكانێ‌ و روبەڕوونەوەی كێشەكان و ئازایەتی و سەرلێدەركردوویی لاوان هەمیشە كۆمەڵگای بۆ دۆخێكی باشتر ئاراستە كردووە.


تەندروست بوونی كۆمەڵگا پەیوەستە بە تەندروست بوونی لاوان، ئەم مێتودەش سەلمێنەری ئەوەیە كە لاوان داینەمۆ و هێزی سەرەكی جوڵێنەری كۆمەڵگان.


لاوان هەر لە سەرەتای دامەزراندنی سازمانی خەباتەوە دەور و كاریگەری سەرەكیان هەبووە لە سەرخستن و پێشخستنی سازمانی خەبات.


هەر لە رۆژەكانی سەرەتای بەرەنگاربوونەوەی رژێمی ئاخوندیدا لاوانی چاونەترسی ریزەكانی سازمانی خەبات بە لێهاتوویی و هێز و توانا رووبەروی دوژمن وەستانەوە و بە بیرتیژی و دانایی و پلانی تۆكمەی چەندین فەرماندەی لاو، وەك شەهیدی فەرماندە كاك سەید عبدالكریم حسێنی، شەهیدی فەرماندە كاك تەها رۆحی، شەهیدی فەرماندە كاك خالید حەسەن نژاد، شەهیدی فەرماندە كاك عەتا قادری و دەیان فەرماندەی لاوی دیكە هەمیشە لەرزێنەر و روخێنەری قەڵای دوژمن بوون.


لاوانی ریزەكانی سازمان لە تێگەیشتوویی سیاسی و دووربینی و بیرمەندی نموونە بوون و لە نوێگەری و بەرەوپێشچوونی سیاسەت و بەرنامەكانی سازمان دەوری كارایان هەبووە.

جێگەی باسە كە لە درێژەی پێشكەوتنەكانی سازمانی خەبات و دامەراندنی ئۆرگانی راگەیاند و دواتریش رادیۆ دەنگی خەبات، لاوان بە بیری سەردەمیانە، لێهاتوویی لە دەربڕین، نوسین و رەوانی لە قسەكردن و ووتاردان لەو ئورگانانە چالاكانە بەشداربوون و رۆڵی سەرەكیان گێرا.


خۆشبەختانە بە بەرەو پێشچوونی زیاتری سازمانی خەبات و بە بەرنامە و پەیڕەوی سەردەمیانە و بە بوونی مامۆستا و زانا و رێبەرمان، مامۆستا سەید جەلال حسێنی كە هەمیشە پشت و پەنای لاوانی ریزەكانی سازمان بوو، مەیدانێكی فراوانی كار و چالاكی بە رووی لاواندا كرایەوە و ئەمجارە لە ریزەكانی سەركردایەتی و رێبەرایەتی سازمانی خەبات لاوان بە بیری سەردەمیانە خۆیان خستە خزمەت بەرژەوەندیەكانی سازمانی خەبات و دڵ گەرمتر و چالاكتر خۆیان تەرخان كرد.


هەر لە درێژەی پێشكەوتنی بێكۆتایی سازمانی خەبات و هەستكردنی زیاتر بە گرینگی و دەوری سەرەكی لاوان و بە پێشنیاری بەرێز كاك بابەشێخ حسێنی سكرتێری گشتی سازمانی خەبات، لاوانی چالاكی ریزەكانی سازمان خەبات جارێكی تر بە بەرنامە و پەیڕەوپرۆگرامی سەردەمیانە هاتنەوە مەیدان و لە 11 ی بانەمەری 1390 رێكخراوی لاوانی خەباتی كوردستانی ئێرانیان دامەزراند، ئەم هەنگاوەش سازمانی خەباتی بۆ قۆناغێكی زێرین لە خەبات و تێكۆشان گواستەوە.


رێكخراوی لاوان بووە مینبەرێك بۆ گەیشتنی زیاتری دەنگی لاوان و ئامرازێك بۆ زیاتر وەپێشچوون و وەدیهێنانی خەون و ئاواتەكانی لاوانی كوردستان بە گشتی و لاوانی ریزەكانی سازمانی خەبات و رێكخراوی لاوان بەتایبەتی.


رێكخراوی لاوان خەبات تێكۆشان و خەباتی لاوانی بۆ سەردەم و قۆناغێكی گەشەسەندوتر گواستەوە و بەبەستنی چەندین كۆڕ و كۆبوونەوە لە راستای پەروەردەكردن و بەرەسەربردنی ئاستی زانیاری لاوان و بەستن و بەشداری چالاكانە لە چەندین كۆنفرانسی گەورە و بەرچاو لە خزمەت زیاتر بەرەوپێشچوونی بارودۆخ و پێگەی لاوان لە كۆمەڵگادا درێژەی بە خەبات دا.


شتێكی روون و ئاشكرایە كە پێگەی لاو لە ناوخۆی كوردستان لە دۆخێكی نالەبار و نەخوازراودایە و رۆژ بە رۆژ بۆ خراپتریش دەڕوات، چونكە رژیم بە هەستكردن بە دەور و پێگەی لاوان لە خەبات و ترس لە تێگەیشتوویی و كرانەوەی لاوی كورد بە رووی دونیادا كە كاریگەری راستەخۆی لەسەر پایە لەرزۆكەكانی دەسەڵاتەكەی دەبێت و بەرەو لەناوچوونی دەبات، هەوڵ دەدا لە رێگەی مۆرەكانیەوە بە پلانە دزێوەكانی كار بۆ كەم هێزكردن و لەناوبردنی لاوی كورد بدا. دەسەڵاتدارانی رژیمی ئێران لە رێگەی ئیعدام، تیرۆر، زیندانی كردن، گیرۆدە كردن بە ئیعتیاد، لەناوبردنی كەسایەتی، تەجاوزكردن، دورخستنەوە لە خوێندن و فێربوون، بێكاركردن و زۆر رێگە و شێوازی تریش هەوڵەكانی بۆ لە باربردنی توانای لاوان درێژە پێ‌ دەدا. بەڵام خۆشبەختانە بەرنامە و پلانی نەگریسی رژێم هەرگیز رێگرنەبووە لە چالاك بوون و بەردوام بوونی لاوان لە خەبات.


 نموونەی ئەوبەردەوامییەی لاوانیش خۆپیشاندان و مانگرتنەكانی ئەم چەند مانگی پێشووی ناوخۆی وەڵات بوو كە لاوان دەوری باڵایان تێداگێراو لەرزیان خستە دڵی دەسەڵاتدارانی رژێمەوە.


هەر لە درێژەی باسی بەردەوامی و چالاكی لاوان، بەباشی دەزانم كە سوپاسی لاوانی خوێنگەرمی ناوخۆی وەڵات بكەم بۆ ئەو چالاكیە كەم وێنانەیان كە شار بە شار و دێ‌ كانی كوردستان پشتگیری كردنیان لە سازمانی خەبات لە رێگەی دروست كردنی فیلم و بڵاوكردنەوەی لە سۆشیاڵ میدیاكاندا دەربڕی.


لە لایەكی دیكەوە پەیوەست بوونی پۆل پۆلی لاوانی خوێن گەرمی كوردستان بە ریزەكانی سازمانی خەبات و رێكخراوی لاوان و بەردەوامیان لە خەبات و تێكۆشان، دەرخەری ورەی پۆڵایین و چاونەترسیانە و هەڵبژاردنی رێبازی پیرۆزی سازمانی خەبات و رێبازی شەهیدان نیشانەی تێگەیشتوویی و بیری سەردەمیانەیانە.


لە كۆتایدا دەبێت ئاماژە بەوە بكەم كە ئەم قوناغ و سەردەمە لە خەبات و تێكۆشان كەپێ گەیشتوین و دید و بەرنامەی ئەورۆیانەی سازمانی خەبات و رێكخراوی لاوان، چاوەروانی بەشداری و چالاكی زیاتری لاوانی لە برەودان و بەرەوپێشچوون و دێژەدان بە خەبات و تێكۆشان زیاتركردوە.


پێویستە لاوانی ریزەكانی سازمانی خەبات و رێكخراوی لاوان بە تێگەیشتن لە گرینگی ئەم قۆناغە هەستیارە، زۆر چالاكانەتر بێنە پێش و بە خوێندنەوە و فێربوون، بردنەسەری ئاستی زانیاری و ئاگابوون لە پرسەكانی رۆژ، چاودێری كردنی پێشهاتەكان، چالاكی مەدەنیانەی زیاتر، بەشداری كردن لە كۆر و كۆبوونەوەكان وەڵامدەرەوەی پێویستیەیاكانی ئەم قۆناغەبن.


هیوادارم كە سازمانی خەبات و رێخكراوی لاوان چالاكتر و زیاتر بەردەوام بن و بەبەستنی كۆڕ و كۆبوونەوەی بەرهەمدار و بەرنامە و پرۆگرامی پەروەردەیی سەردەمیانە لە راستای بەرەوسەربردنی ڕادەی زانیاری و تێگەیشتوویی و بەرەوپێشبردنی بارودۆخی لاوانی ریزەكانی سازمانی خەبات و رێكخراوی لاوان هەوڵ بدەن و بە سوود وەرگرتن لە وزە و توانای لەبن نەهاتووی لاوان و ئەزموونی تێكۆشەرانی لە مێژینەی سازمان بۆ هەرچی زووتر گەیشتن بە ئامانج و ئاواتی لەمێژینەی نەتەوەكەمان زیاتر تێ‌ بكۆشن.
ڕێکه‌و 2019-01-01 20:44:20
به‌شی ( سیاسی )







سیاسی