کورته یه ک له مێژووی پڕ شانازی سازمانی خه بات - په سه ندکراوی کۆنگره ی ٤ی سازمانی خه بات



لەدواى هێرشی پاسدار و ئەرتەشی بەکرێگیراو بۆسەر کوردستان و کوشت و بڕی خەڵکى کوردستان بە تاوانى دژى ئینقلاب و دژى ئیسلام، بڕیاری جەماوەرى کوردستان بۆ دیفاع لە نیشتمان و تێکۆشان بۆ هاتنە دیی ئامانجە رەواکان و ئازادى، ژمارەیێک لە مامۆستایانى ئایینى و کەسایەتیە تێکۆشەرەکانى کوردستان کە پێشتر لەژێر ناوى دەفتەری مامۆستا شێخ عزالدین دا چالاکیی سیاسی نیزامیان ئەنجام ئەدا، بیریان لە پێک هێنانى سازمانێکى سیاسیی نەتەوەیی و ئیسلامى کردەوە کە بە بۆچوونێکى جیاواز لە رێبازى هێزو لایەنەکانى دیکەى گۆڕەپانى خەبات بێتە مەیدان و پەرچەمدار و پێشڕەوى ئەو جەماوەرە بێ کە خاوەنى بیرێکى نەتەوەیی و ئیسلامین، هەربۆیە لە ٥ى خەرمانانى ساڵى ١٣٥٩ى کۆچی خۆری بەرانبەر بە ٢٧ ئەگۆستى ١٩٨٠ى زایینى، پێکهاتنى سازمانى خەباتى نەتەوایەتى و ئیسلامیی کوردستانى ئێران (خەبات)یان راگەیاند.

 


بە راگەیاندنى سازمانى خەبات، خاوەن بیرانى ئەو رێبازەو بەشێکى بەرچاو لە جەماوەرى کوردستان دڵخۆش و هیواداربوون. خەڵک بەزوویی پێشوازى گەرمى لە سازمانى خەبات کرد، لە چەندین شار و ناوچە لە باکوور تا باشوورى کوردستانى ئێران بنکە و رێکخراوەکانى سازمان داندران و کادر و پێشمەرگەکانى سەرەڕاى کەند و کۆسبى زۆر هەڵسووڕانى سیاسی نیزامیان لە بەرانبەر هێزە بەکرێگیراوەکانى رژیمى ئاخوندیدا دەست پێ کرد. بەڵام بەداخەوە بە هۆى کۆسپ و تەگەرەى جیاجیا کە خرانە سەر رێگەى کار و چالاکى کادر و پێشمەرگەکان، سازمانى خەبات نەیتوانى وەک پێویست ئەرک و کارە تەبلیغى و تەشکیلاتیەکانى ئەنجام بدا. هەر بۆیە ناچار بوو بۆ پەرە پێ دانى سیاسەت و هەڵوێستى سەربەخۆ و بێ لایەنانەى خۆى هێندێک ناوچەى کوردستان بە نهێنى هەڵسووڕێ.
سەرەڕاى بوونى ئەو گشتە کۆسپ و تەگەرانە بەخۆشیەوە سازمانى خەبات توانیى بەرەو پێش بچێ و سەربەخۆیی سیاسى و تەشکیلاتیى خۆى بپارێزى و لەماوەى ٣٠ ساڵ مەوجوودیەتى لە مەیدانى خەباتدا، ئەرکە نیشتمانى و نەتەوەییەکانى بەڕاستى و پاکى و دوور لە هەر جۆرە خەیانەت و هەڵەیێک بەجێ بێنێ. سازمانى خەبات واقعییەت و ماهییەتى رژیمى ناسیوە و هەربۆیە درووشمى رووخانى رژیم یەکێک لە درووشمە سەرەکى و نەگۆڕەکانیەتى.

 


سازمانى خەبات ى کوردستانى ئێران لەم کۆنگرەى چوارەمەدا، مەسەلە چارەنووس سازەکان و هەل و مەرجى خەباتى ئازادیخوازى گەلى کورد و گەلانى ئێران، بە پێى وەزعى سیاسى ئێران و وەزعى سیاسى جیهان و بوونى وەڵاتانى رۆژئاوا لە نزیک سنوورەکانى ئێران و گەڵاڵە ئەتۆمیە مەترسیدارەکانى رژیمى ئاخوندى کە لەوانەیە ببێتە هۆى روودانى جەنگێکى نوێ لە دژى ئەو رژیمەى هێناوەتە بەرلێکۆڵینەوە.
کۆنگرەى چوارەمى سازمانى خەبات ى کوردستانى ئێران، بە هەست کردن بە ئاڵ و گۆڕە سیاسیەکان و لێکدانەوەى دروست و بە چاوخشاندن بە کار و چالاکیەکانى سازمان لە ساڵانى رابردوودا، بڕیارى بە جێ و شیاو لە سەر ئاڵ و گۆڕى بنەڕەتى لە بەرنامە و پەیرەوى ناوخۆیی سازمان پەسەند دەکا.

سیاسی