وەك نەریتێكی ساڵانە، رێورەسمی نەورۆز لە شاری سارپسبۆرگی وەلاتی نۆروێژ بەشێوەیەكی بەشكۆ بەرێوەچوو.
ئێوارەی رۆژی چوارشەممە 29ی رەشەممەی 1397ی هەتاوی بەرامبەر بە 20ی مارسی 2019 بە بەشداری ژمارەیەكی بەرچاو لە كوردانی نیشتەجێی ناوچەی ئۆستفۆڵدی وەڵاتی نۆروێژ رێورەسمی ئاگری نەورۆز لە شاری سارپسبۆرگ بە شێوەیەكی بەشكۆ بەرێوەچوو.
رێورەسمەكە لە چەند بڕگەی جیاجیای پەیامی كۆمیتەی بەرێوەبەری و شیعر و هۆنراوە پێكهاتبوو. پەیامی كۆمیتەی بەرێوەبەری ئاهەنگی نەورۆزی لە شارپسبۆرگ لەلایەن سۆران مەحمودیەوە پێشكەش كرا. لە دوای چەند هۆنراوەیەك فەرمانداری سارپسبۆرگ بەرێز سیندرا مارتینسێن بەوبۆنەوە وتارێكی پێشكەش كرد و پیرۆزبایی خۆی پێشكەش بە بەشداربووان كرد.
لە دوای وتارەكەی سیندرا مارتینسین، چەند پارچە هۆنراوەیەكی تایبەت بە نەورۆز لەلایەن خاتوو كەژاڵ كاكەییەوە پێشكەش كرا.
لە پاش پەیام و هۆنراوەكان ئاگری نەورۆز لەلایەن چوار كەس لە ئامادەبووان كرایەوە و بەشداربووان بە گۆڤەند و هەڵپەركێ شایی و خۆشی خۆیان بەبۆنەی نەورۆزەوە دەربری و جەژنە پیرۆزەیان بە یەكتری دەگوت.
شایانی گوتنە ئەندامانی سازمانی خەبات لە ناوچەی ئوستفۆڵد زۆر چالاكانە بەشداری ئاهەنگی نەورۆزیان كرد.

ڕێکه‌وت: 2019-03-27 07:27:52
به‌شی ( چالاکیه‌کان )