كۆمیتەی نۆروێژی سازمانی خەبات بەشداری لە دوو چالاكیدا كرد كە بەبۆنەی 10ی خاكەلێوە 72هەمین ساڵرۆژی لەسێدارەدانی پێشەوا قازی محەممەد و هاوڕێیانی بەرێوەچوو.
رۆژی یەكشەممە 11ی خاكەلێوەی 1398ی هەتاوی، كۆمیتەی نۆروێژی سازمانی خەبات بەشداری دوو چالاكی كرد كە لەلایەن هەر دوو كۆمیتەی گشتی حدكا و حدك بەرێوەچوون.
لەسەر بانگهێشتی كۆمیتەی گشتی حدك لە نۆروێژ خوشكە شنۆ شەرێعەتپەنا بەرپرسی پێوەندی كۆمیتەی نۆروێژی سازمان بەشداری لە سمینارێكدا كرد كە لە شاری لیلسترۆم بەرێوەچوو. لەو سمینارەدا بەرێز حەسەنی حاتەمی باسێكی تێروتەسەلی لەسەر 10ی خاكەلێوەو هەڵوێستەكانی پێشەوا لە بێدادگاكانی دەسەڵاتی شا پێشكەش كرد.
لەلایەكی دیكە و هەمان رۆژ هەیئەتێكی سازمان پێكهاتوو لە بەرێزان عەلی بەهرامی بەرپرسی رێكخستنی دەرەوە و مەحمود یوسفی بەرپرسی پێوەندیەكانی كۆمیتەی نۆروێژ لەسەر بانگهێشتی كۆمیتەی گشتی حدكا بەشداریان لە رێورەسمێكدا كرد كە بەبۆنەی 10ی خاكەلێوە بەرێوەچوو.
ئەو رێورەسمە كە لە شاری سترۆمێن بەرێوەچوو تیشك خرایە سەر رووداوەكانی 10ی خاكەلێوەو لە چەند پانێلی جیادا ئاوڕ لە ژیان و خەباتی چەندین شەهیدی دیكەی حدكا درایەوە، هەروەها چەند پێشمەرگەی دێرین یاد و بیرەوەریی هاوڕێ شەهیدەكانیان بۆ ئامادەبووان باس كرد.
هەیئەتەكانی سازمان لە هەردوو چالاكیەكەدا بروسكەی كۆمیتەی نۆروێژیان بەبۆنەی یادی 10ی خاكەلێوە پێشكەش بە بەرێوەبەرانی رێورەسمەكان كرد.
ڕێکه‌وت: 2019-04-02 20:58:42
به‌شی ( چالاکیه‌کان )