له‌سه‌رهێل 97
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
بەرزوبەڕێز بێ‌ یادی شەهید مامۆستا ئارام و هاوڕێیانی

 


بابەشێخ حوسەینی
بە باوەڕی من یەكێك لە ناخۆشترین و حەستەمترین كارەكان، نووسین و لێدوانە لە بارەی شەهیدانی لە خوێندا شەڵاڵی رێگەی ئازادیی، لەگەڵ ئەوەی ئەو ئەركە زۆرحەستەم و سەختە، بەڵام لەهەمانكاتدا شانازێكی گەورەو پیرۆزیشە ئەگەر بتواندرێ‌ لە سەر شەهیدانی رێگەی ئازادی گەل و نیشتمان بنوسرێ وقسە بكرێ‌.ئەویش شەهیدانی گەورەو خاوەن پێگە لە سازمانی خەبات ی كوردستانی ئێران كە ئەگەر باسی هەر كامیان بخەینە سەر كاغەز، دەست دەلەرزێ‌ و پێنووسیش شەرم دایدەگرێ‌ و خامەو كاغەزیش بارانی فرمێسكی بەسەردا دەبارێ‌.
جا لە رێبازی پاك و بێگەردی سازمانی خەبات، رێبازی كوردایەتی راستەقینە،رێبازی شۆڕشی خاوەن پڕەنسیپ و خاوەن بنەمای دروستی ئازادیخوازانە، شەهیدی سەركردەو لێهاتووی گەلێك گەورەو دیار هەن كە بەڕاستی باڵانوێنی مرۆڤی پێگەیشتوو تێگەیشتووی ناو جەماوەرو نیشتمانی داگیركراون.
مامۆستا سەید عەبدوڵڵا ئارام یەكێك لەو شەهیدە مەزنانەی كوردو كوردستان و رێبازی سازمانی خەباتە كە لەگەل هاوڕێیانی شەهیدی بە خوێنی سووریان جارێكی دیكە سەنەدی حەقانیەتی جوڵانەوەی مافخوازانەی خەڵكی كوردستان و رەوایی خەباتی شۆڕشگێڕانە بەرانبەر بە رژیمی ئاخوندیان نووسیەوە.
بەڵی لە كاتێكدا خومەینی و هاوكارانی پێش بەدەستەوە گرتنی حوكم و دەسەلات، بەڵێنی زۆریان بەگەلانی ئێران و بەگەلی كورد دابوو، كە ماف و ئازادییەكان دابین دەكەن و ئێران دەبێتە بەهەشتی سەر زەوی، بەڵام لە دوای چەند مانگ لە گەیشتنیان بەدەسەڵات، دەستیان دایە ستەم و بێ عەداڵەتی لەبەرانبەر گەلانی ئێران و گەلی كورد دا.
زۆری پێ نەچوو لە وەڵامی داوای ماف خوازانەی رەوای گەلی كورد، ئاور و ئاسنیان بەسەر كوردستاندا باراند و بە فەرمانی جیهادی خومەینی هەزاران پاسداری چەقۆكێش روویان لە كوردستان كرد و ئەوەی جینایەت و دڕەندەییە لە بەرانبەر هاونیشمانانی كورد بە بێ جیاوازی بەرێوەیان برد. بۆ گەلی كورد هیچ رێگەیێك نەما بێجگە لە بەربەرەكانێ و خەبات لە بەرانبەر دەسەڵاتدارانی ستەمگەر و ملهۆڕدا.
هێزی دژمن بە دڕندانەترین نەوعی سەركووت و هەڕەشە و كۆمەڵكۆژی توانی كوردستان داگیر بكا، سەرەڕای داگیركەرانی كوردستان موقاوەمەت و خۆراگری كورد و پێشمەرگە قارەمانەكان تا ئێستا درێژەی هەیەو گەلی كورد لە مەیدانی خەباتدایە بۆ گەیشتن بە ئازادی.
ئەوەی جێگەی شانازیە، فیداكاری و قارەمانی رۆڵە نەبەز و پێشمەرگە تێكۆشەرەكانە كە هەر لە رۆژانی سەرەتای زوڵم و بێعەداڵەتی رژیمی ملهۆری ئاخوندی، قارەمانانە دەستیان دایە چالاكیی سیاسی و تەشكیلاتی وپێشمەرگانە. بێشك لەو موقاوەمەت و خۆراگرییە بەردەوامەی پێشمەرگە قارەمانەكانی كوردستان، دەوری كادر و پێشمەرگەكانی سازمانی خەبات، رێبوارانی رێگەی ئازادی و نەتەوەیی و نیشتمانی گەلێك بەرچاوە.
قارەمانەكانی ریزەكانی سازمان هەر لە رۆژانی سەرەتای هێرشی هێزی بەكرێگیراو وداگیركەردا كەوتنە خۆ و لە هەموو مەیدانەكانی خەبات و موبارزە تێكۆشان كە لەو بەربەرەكانێ و فیداكاریە قارەمانە و خۆ نەویستەدا، مامۆستا سید عبدلله ئارام و هاورێیانی كە لە ئەنجامی ئەركێكی سیاسی، تەشكیلاتی لەناوچەی بۆكان و لە دەوروبەری دێی‌ یەكشەوە دەكەونە گەمارۆی دژمن و بەداخەوە مامۆستا ئارام و شەش هەواڵی بەناوەكانی شەهید عوسمان عەبوو، شەهید ئیسمایل سلیمانژاد، شەهید قانع زەندی، شەهید حەسەن ساحێب نەزەر، شەهید محەممەد رەسوڵی، شەهید محەممەدی خالیدی، گیانیان بەرەو بەهشتی شەهیدان دەفرێ. شەهید مامۆستا عبدالله ئارام، كەسایەتێكی تێكۆشەرو دڵسۆزو بەوەفا بوو، كاتێك ئەو لە زانستگا دەیخوێند، هێزەكانی رژیم بە كوردستان وەرببون و ستەمیان لە بەرانبەر خەڵكی بێ تاوانی كوردستان ئەنجام دەدا، مامۆستا ئارامی تێكۆشەر بە بیستنی هەواڵی ئەو ستەمگەریانە خۆی پێ نەگیرا هاتە بنكەی قەڵای خەبات ی سازمان لە دێی بلەكێ لە ناوچەی بانە و مەبەستی خۆی بە بەرێز و تێكۆشەر مامۆستا سەید جەلال الدین حسێنی راگەیاند كە پێشمەرگایەتی لە ریزی سازمان و نەگەڕانەوە بۆ دانشگایە. هەرچەندە مامۆستا سەید جەلال فەرمووبووی، درێژەدان بەخوێندن پێویستە و دەتوانێ كاری باشتر لەو مەیدانەدا بكا، بەڵام مامۆستا ئارام بریاری كۆتایی خۆی كە خزمەت بەگەل و سازمان دەربری، هەر بۆیە ئیتر مامۆستا ئارام درێژەی بەكاری پێشمەرگەیی دا. مامۆستا ئارام لە یەكەمین كۆنفرانسی دامەزرانی سازمان، بە ئەندامی كومیتەی ناوەندی هەلبژێردراو بەرپرسایەتی كومیتەی شارستانی بۆكانی پێ ئەسپێردرا، كە بەوپەڕی دڵسۆزی ولێهاتوویی، كاری تەشكیلاتی و سیاسی لە ناوچەی بۆكان درێژە پێ دا. بەڵام، مامۆستا سەید عبدالله ئارام، زۆر نەژیا تا زیاتر خزمەت بەگەلی كوردستان و سازمانی خەبات بكاو بەداخەوە لە ١٦ی خاكەلێوەی ساڵی ١٣٦١ لەگەڵ شەش كەس لە هاورێبازانی شەهید بوو.
هەزاران سڵاو لە روحی شەهید ئارامی فەرماندەو رێبەر، و شەهیدانی سورخەڵاتی سازمانی خەبات لە مانگی خاكەلێوە و تێكرای شەهیدانی رێگەی ئازادیی.
ڕێکه‌وت: 2019-04-06 09:34:39
به‌شی ( شه‌هیدان )





دیمانه

سیاسی