هاونیشتمانی تێكۆشەر!

 كەس و كاری سەربەرزی شەهیدان!

تێكۆشەرانی رێگەی ئازادی!

هێزو لایه‌نه‌ سیاسیه‌کانی ئێران و کوردستان!

 بە خۆشیەوە پێتان ڕادەگەێنین پلنیۆمی چوارەمی كۆمیتەی ناوەندی هەڵبژێردراوی كۆنگرەی شەشەمی سازمانی خەبات بەرێوە چوو. رۆژی یەكشەممە ٢٩ی بانەمەڕی ١٣٩٨ی كۆچی خۆری، بە ئامادە بوونی بەرێز كاك بابەشێخ حوسەینی سكرتێری گشتی و بەشداری تێكڕای ئەندامانی دەفتەری سیاسی و كۆمیتەی ناوەندی، پلنیۆمی چوارەمی كۆمیتەی ناوەندی هەڵبژێردراوی كۆنگرەی شەشەمی سازمانی خەباتی كوردستانی ئێران، بەشێوەیەكی سەركەوتوو كۆتایی بە كارەكانی هێنا.

سەرەتای كاری پلنیۆم بە دەقیقەیەك بێ‌ دەنگی و فاتیحه‌یه‌ک بۆ گیانی پاكی شەهیدانی كورد و شەهیدانی ڕێگەی ئازادی بەتایبەت شەهیدەسوور خەڵاتەكانی سازمانی خەبات و رێبەری نەتەوەیی و دامەزرێنەری سازمانی خەبات جەنابی مامۆستا سەید جەلالی حوسەینی دەستی بە كارەكانی كرد.

لە سەرەتادا رێزدار كاك بابەشێخی حوسەینی سكرتێری گشتی سازمانی خەبات راپۆرتێكی سیاسی لەبارەی رووداوەكانی ئەم دواییەی جیهان، ئێران و كوردستان پێشكەش بە پلنیۆم كرد. لە راپۆرتەكەی بەرێزیاندا تیشك خرایە سەر هەڵوێستی ئەم دواییانەی ویلایەتە یەكگرتووەكانی ئەمریكاو ناردنی هێز بۆ كەنداوی فارس و هەوڵە دیپلۆماسیەكانی ئەو وەلاتە،بە مەبەستی سەپاندنی گەمارۆ و فشاری هەمە لایەنە بۆ سەر رژیمی ئاخوندی و ئەگەری سەرهەڵدانی نارەزایەتی گشتی لە ئێران وئاڵۆزی لە ناوچەكە زانرا و  روخانی رژیم بە ئەگەرێكی بەهێز داندرا.

لە راپۆرتی كاك بابەشێخ بە وردی ئیشارە بە هەڵوێستی یەكیەتی ئوروپا و ڕوسیە و هاودەنگیان لەگەڵ ئەمریكا کراو و پێێ‌ وابوو كە ئەو هەڵوێستانە دەرخەری كاریگەریی سیاسەتەكانی ئەمریكا لە حاست رژیم و جیددیەتی ئەو وەڵاتە بۆ پێمل كردنی دەسەڵاتی ئاخوندی بە ویستەكانی ئەمریكایه‌.

 لە بەشێكی دیكەی راپۆرتە سیاسیەکه‌ی بەرێز سكرتێری گشتی، له‌مه‌ڕ کاریگه‌ریه‌کانی سیاسەتی ئەمریكا لەبەرانبەر رژیم و پەكخستنی بەشێكی زۆر لە سیاسەتە دژی ئینسانیەكانی ئەو دەسەڵاتە، ئاماژه‌ به‌ هەڵاوسان و دارمانی كەرتی ئابووری رژیم کراو، دۆخی خەڵكی ئێران و كوردستان بەشێویەكی ورد خرایه‌ بەر باس.

سكرتێری گشتی سازمانی خه‌بات، ڕێژیمی ئاخوندی و‌ تێكڕایی باند و باڵ و ئورگانەكانی ئەو رژیمەی به‌ هۆکاری تێکڕایی ئه‌و قه‌یران و کێشانه‌ زانی که‌ به‌رۆکی خه‌ڵکی ئێران و کوردستانی گرتۆته‌وه‌.

دۆخی كۆمەڵایەتی و سیاسی و ئابووری خەڵكی كوردستان، بەشێكی گرینگی راپۆرتە سیاسیەكەی بەرێز سكرتێری گشتی سازمان بوو. کۆتایی هاتن به‌ نه‌هامه‌تی و کیشه‌و قه‌یرانه‌کانی کۆمه‌ڵانی خه‌ڵک ته‌نها به‌ نه‌مانی ده‌سه‌ڵاتی ئاخوندان زاندرا. راپەرین و نارەزایەتی سەرانسەری جەماوەری، دژی ئەو دەسەڵاتە دیكتاتۆر و گەندەڵەو پشتیوانی نێونەتەوەیی لە شۆرای ملی مقاومەتی ئێران بە رێگەیەكی گرینگ و چارەنووس ساز زانرا.

لە بەشێكی دیكەی ڕاپۆرتی سكرتێری گشتی دا باس لە گرینگی هاوپەیمانی مێژوویی سازمانی خەبات و سازمانی موجاهیدینی خەڵقی ئێران و هه‌ماهه‌نگی زیاتر لە پێناو خەبات لە دژی ڕژیمی ئاخوندی و گەیشتنی گەلی کورد بەمافەکانی و سەقامگیری لە ئێراندا کرایه‌وه‌.

سکرتێری گشتی باسی له‌ هاوکاری و ته‌بایی هێزه‌ سیاسیه‌کانی كوردستانی ئێران لە پێناو داهاتویێكی گەش بۆ گەلی كورد و ئارامی و ئۆقرەیی بۆ ئێران کرد و له‌م په‌یوه‌ندیه‌دا بانگی سەرجەم هێز و،لایەنەکانی کوردستانی ئێرانی کرد، تا لەسەر بنەماکانی، ١.رووخانی دەسەلاتی ئاخوندی ٢. دەستبەرکرانی مافە نەتەوەییەکان گەلی کورد ٣. بەرێوەبەریی داهاتووی کوردستان لەسەر بنەمای دیموکراتیک و سێکۆلار، هەوڵ بۆ درووست کردنی بەرەێیکی واقعی هێز و لایەنە سیاسیەکانی کوردستانی ئێران بدەین و خەباتی نەتەوەیی گەلەکەمان بەهەست بە بەرپرسایەتی زیاتر بەرەوپێش ببەین.

ئەندامانی كۆمیتەی ناوەندی، وێڕای سەرەنج و تێبینی لەسەر راپۆرتەكەی سكرتێری گشتی، بە تێكرای دەنگ پەسەندیان كردو چووە دەستووری كاری پلنیۆم.

پلنیۆمی چوارەمی سازمانی خەبات تاووتووێی نارەزایەتیەكانی ناوخۆی ئێرانی بە وردی كرد و پشتیوانی خۆی بۆ تێكرای داوا رەواكانی خەڵك بەتایبەت ویستی جەماوەر بۆ روخانی رژیمی ئاخوندی دەربری و داوای كرد كە چالاكانی ناوخۆ و چین و تووێژەكان، جیدی تر لە رابردوو لە بەرامبەر سیاسەتەكانی رژیمدا بوێستنەوە. رژیم لە هەر دەمێكی دیكە زیاتر لە روخان نزیك بووەتەوە و بە خەباتێكی یەكانگیری جەماوەریی، كۆشكی زوڵم و ستەمی ئاخوندان دادەڕمێ‌. پلنیۆم لە درێژەی كاری خۆیدا پێداچوونەوەی بە ئورگان و بەشەكانی سازمان كرد و چەندین بریار و راسپاردەی بەجێی بۆ كاری تەشكیلات و ئورگانەكانی سازمان پەسەند كرد.

سازمانی خەباتی كوردستانی ئێران كۆمیتەی ناوەندی

٣٠ ی بانەمەڕی ١٣٩٨ ی كۆچی خۆری ٢٠ ی مای ٢٠١٩ زایینی
ڕێکه‌وت: 2019-05-20 23:45:01
به‌شی ( چالاکیه‌کان )