رێبوار حسێنی
ئه‌وا دیسان پووشپه‌ڕه‌ و،
له‌ خه‌مجاڕی وه‌رزی خه‌مان،
سه‌ر خه‌رمانی خه‌مان به‌ کۆن!
بۆ گریانی چاوی خه‌مخۆر،
خه‌می خه‌مخۆر سه‌به‌ب و هۆن!
له‌ خه‌مخانه‌ی خه‌می ئه‌و دا،
سه‌ری خه‌مان له‌ خم ده‌گرم!
سۆرانی هه‌ستم شین ده‌که‌م،
ملی کوێنم له‌ پۆڕ ده‌گرم!
له‌ کۆڕی یادی سه‌روه‌ر دا،
له‌ یادی باوک و رێبه‌ر دا،
وه‌ک رێبوارێکی رێگای ئه‌و،
سه‌ری بێ واز و دۆڕاوی،
نه‌فس نزمان له‌ قوڕ ده‌گرم!
هۆ خۆره‌ تاو!
شه‌ماڵه‌که‌ی به‌ جۆش و تاو!
دارستانی چڕ و زه‌وه‌ند!
رووباری خوڕ، هۆ ده‌ریای مه‌ند!
پووشی وشکی پێده‌شت و هه‌رد!
مامزی ره‌وه‌ک، که‌وی سه‌ر به‌رد!
ئاسکی سرکی تیژ ره‌وی کۆ!
نه‌سیمه‌که‌ی خۆش عه‌تر و بۆ!
بزوێنه‌ری هه‌ست و ده‌رون،
مایه‌ی که‌روێشکه‌ی گه‌نم و جۆ!
سوێسنه‌ و گه‌زیزه‌ی گوێ چه‌مان!
لابه‌ری گشت کوڵ و خه‌مان!
هۆ مه‌ڵبه‌ندی شۆڕش و خه‌بات!
گه‌رمیان و کوێستانی وڵات!
شه‌قام و باژێڕ و گوندم!
کوێستان و سه‌ر مله‌ و دووندم!
مه‌زرا و باغ و هۆبه‌ و هه‌وار!
چیاو چۆڵ و ده‌شت و نزار!
هۆ خه‌لکی ره‌نجده‌ر و هه‌ژار!
گوند نشینان، دانیشتوی شار!
گه‌نج و پیران!
کۆڕی ژیران!
خوێندکاری ریی قوتابخانه!‌
خۆ راگری ناو به‌ندیخانه‌!
کرێکاری پشت چه‌ماوم!
پیاو ماقولانی خۆش ناوم!
که‌س و کاری شه‌هیدانم!
تێکرای خه‌ڵکی نیشتمانم!
ئێوه‌ش وه‌ک من دڵ پڕ تاسه‌ن؟
ده‌روون پڕ سۆز و هه‌ناسه‌ن؟
بۆیادی گه‌وره‌ پیاوی کورد
بۆ یادی مامۆستای به‌رز و،
رێبه‌ری رێگه‌ دیاری کورد!؟
ئه‌ی رێبه‌ری رێباز روونی،
رێگه‌ی پیرۆزی خه‌باتم!
خۆشه‌ویسته‌که‌ی نیشتمان،
رێبه‌ره‌که‌ی رۆژ هه‌ڵاتم!
لە هەر هەنگاویکی کە نات،
فێرت کردین چۆن ڕێ ببڕین
لە هەر تێڕوانین و نیگات،
پێت نیشان داین سەرهەڵبڕین!
لە هیبەت و هیما و باڵات،
راوەستان و سەرفرازی،
لە وتار و لە کردارت،
هەڵس وکەوتی پڕ شانازی!.
کێ وەکو تۆ،
هەمم و خەمی هەر بۆ گەل و نیستمان بوو؟!
کێ وەکو تۆ،
خەمی کورد و کوردستانی لەسەر شان بوو؟!
نازانم چۆن دەستی ئەجەل،
سنووری رۆحی بەزاندی؟!
زیاد لە هەموو خەمخۆرانت،
بە تەنها لەمنی ستاندی؟!
سەرم بەرزە و ،
ئێستاش ،، رێبوار،، ی رێگاتم!
یادت مشغه‌ڵی دەستمانه‌ و،
رێبازت رێگای نه‌جاتم !
ک ح رێبوار حسێنی
ڕێکه‌وت: 2019-07-09 21:03:10
به‌شی ( ئه‌ده‌ب و هونه‌ر )