كوردانی نیشتەجێی سویید رێپێوان و گردبوونەوەیەكی جەماوەریان دژ بە هێرشی هێزەكانی توركیە بۆ سەر كوردستانی رۆژئاوا بەرێوەبرد.
رۆژی شەممە 20ی رەزبەری 1398ی هەتاوی، كوردانی نیشتەجێی وەڵاتی سویید لە ستۆكهۆڵمی پێتەخت بە بەشداری هەزاران كەس، هێرشی هێزە جینایەتكارەكانی حكومەتی ئۆردوغانیان بۆ سەر كوردستانی رۆژئاوا بە توندی مەحكوم كرد.
لەو گردبوونەوە جەماوەریەدا كوردانی نیشتمانپەروەری سویید بە دانی دروشم و خوێندنەوەی پەیام پشتیوانی خۆیان بۆ خەڵكی زۆرلێكراوی كوردستانی رۆژئاوا راگەیاند و پەلامار و جینایەتەكانی دەسەڵاتی توركیەیان بە توندی مەحكوم كرد و داوایان لە حكومەتی سویید كرد پشتیوانی لە خەڵكی كورد لە رۆژئاوا بكەن و چاوپۆشی لە جینایەتەكانی ئوردوغان و دارودەستەكەی نەكەن.
شایانی باسە ژمارەیەك لە ئەندامان و دۆستانی سازمانی خەبات لە وەڵاتی سویید بە شێوەیەكی چالاكانە بەشداری ئەو رێپێوان و چالاكیە بوون و بە هەست و سۆزەوە پشتیوانیان لە براكانیان لە كوردستانی رۆژئاوا كرد.

ڕێکه‌وت: 2019-10-14 09:16:03
به‌شی ( چالاکیه‌کان )