له‌سه‌رهێل 70
دووشه‌مه‌‌ 27 گوڵان 2721
سازمانی خه‌باتی کوردستانی ئێران
پەیامی بابەشێخ حوسەینی سكرتێری سازمانی خەبات ی كوردستان بۆ خەڵكی كوردستان وئێران

هاونیشتمانیانی تێكۆشەری كوردستان!
جەماوەری خۆڕاگری ئێران!
كەس و كاری شەهیدانی رێگەی ئازادی!
ڕاپەڕینی پڕجۆشی ئێوە جەماوەری وەزاڵەهاتوو لە چەند ڕۆژی ڕابردوو لە ئێران و كوردستانی ئێران، بەرانبەر حكومەتی ئیستبدادی ئاخوندە دەسەڵاتدارەكان، جارێكی دیكە ناڕەوایی و نامەشروع بوونی ئەو دەسەلاتە خۆسەپێنەی نیشانداو لە بەرانبەریشدا بڕیاری جەماوەری بۆ ئاڵوگۆڕی بنەڕەتی لە سیستم وشێوەی حكومەت لە ئێراندا خستەوە بەرچاو. درود بۆ هیممەت و بڕیاری كۆڵنەدەرانەو تێكۆشان و فیداكاریتان. سڵاوی گەرم بۆ خەڵكی شارەجیاجیاكانی كوردستان و ئێران و درود بۆ ڕۆحی شەهیدانی ڕاپەڕینەكانی ئەم چەند ڕۆژەی شارەكانی كوردستان و ئێران.
جەماوەری ستەملێكراو ڕاپەڕیوی كوردستان!
لاوانی خۆڕاگرو نیشتمان خۆشەویست!
راپەڕینی چەند رۆژەی ئێوە قەڵای دەسەڵاتی دیكتاتۆری لەرزۆك كردوە، ئەم ڕاپەڕینە كە بەدوای گران كردنی نرخی بەنزین لە لایەن دەسەڵاتەوە هاتە ئاراوە، لە ڕاستیدا تەنیا بە هۆی بەرزكردنەوەی نرخی بەنزین نەبوو، بەڵكو بەرزكردنەوەی نرخی بەنزین وای كرد كە ڕقی پنگ خواردوی چەندین ساڵەتان لە ئاخوندانی دەسەڵاتداری تاڵانچی، گەندەڵ، جینایەتكارو دیكتاتۆر، وەك گركان، وەك بروسكە، لە مەیدانی شارە جیاجیاكانی شارەكانی كوردستاندا،هەرەشە لەقەڵای ستەم و بێدادی حكومەتی ویلایەتی فەقیه بكات و مەترسی جیددیی بۆ سەر داهاتووی خۆیان و دەسەڵاتەكەیان دروست بكات.
لەگەڵ دڵنیابوون بە داهاتووی گەش و رۆژی ڕوون و گەیشتن بە ئازادی و بە مافی ڕەوای جەماوەر لە كوردستانی ئێران و دڵنیا بوون لە ڕوخان و لە ناوچوونی حكومەتی دیكتاتۆری مەزهەبی، داواكارم بە شێوەی دروست و بە ڕێكخستن و بەرنامە، درێژە بە ناڕەزایەتیەكان بدەن، بەردەوام بوونتان لە ناڕەزایەتی شیلگیرانە، دەتانگەێنێتە ئامانج و هێزە سەركوتگەرەكان لە بەردەوامی ناڕەزایەتی یەكگرتووانەتان، بێ‌ توانا دەبن لە روبەروو بوونەوەوەو سەركوتی جەماوەر.

ئەركی ئوستادانی دانشگاو مەدرەسەكان،نووسەران، ڕۆشنبیران،شاعیرەكان و هونەرمەندانی تێكۆشەرە بە بەشداریان لە ڕاپەڕین و هەروەها لە ئاگاداركردنەوەو ووشیاركردنەوەی جەماوەر و زیاتر كردنی هەلومەرجی تەبایی لە ڕیزی كۆمەلانی خەڵكی كوردستان بە هەموو بیروباوەڕو ئایینە جیاجیاكان دەوری گرینگ و چارەنووس ساز بگێڕن. بێگومان دەوری ئێوەی بەڕێز حەیاتی و یەكلایی كەرەوەیە لە گۆڕانكاریەكان لە ئێستاداو لە سەقامگیری لە داهاتوودا.
داوا لە مامۆستایانی ئایینی ئیسلام لە كوردستان دەكەم وەك هەمیشە بەرپرسایەتی مێژوویی خۆیان كە پێشڕەوی كردنی جەماوەرو روبەڕوبونەوەی ستەم و بیعەداڵەتیەكان بە جێ‌ بگەێنن. مامۆستایانی ئایینی لەم هەلومەرجە ناسك و مێژووییەدا ئەركی گەورەیان دیفاع و پشتیوانی لە جەماوەرو لاوانی شۆڕشگێڕەو، بەرپرسایەتی نیشتمانی و ئایینی یان دەكەوێتە سەرشان و دڵنیام بە هەست كردنیان بەو بەرپرسایەتیەیان، دەوری سەرەكی دەگێڕن لە شۆڕشی ڕەوای جەماوەر بەرانبەر بە حكومەتی دژی دین و دژی مروفایەتی لە ئێراندا.
هەروەها داوا لە ئەندامان و لایەنگرانی تێكۆشەری سازمانی خەبات و تێكڕای دۆستان و ئازادیخوازان لە شارو دێ‌ كوردستان دەكەم بە شێوەی كاریگەرو دوور لە دروشمی تەشكیلاتی و سازمانی و تەنیا لە چوارچێوەی ویستی گشتی جەماوەر، دەوری كاریگەریان هەبێ‌، وە وەك هەمیشە لە هەوڵەكان بۆ یەكگرتوویی و تەبایی بەردەوام بن.
هاونیشتمانیانی خۆڕاگر!
لەم لە هەلومەرجە چارەنووس سازەدا یەكگرتوویی و تەبایی و هاودەنگی پێویستێكی حەتمی و زەروریە، لە ئێستادا بەكرێگیراوانی رژیم هەوڵ دەدەن بە جیاوازی دانان لە نێوان خەڵكی شارەكانی كوردستان و مەرزبەندی و دروست كردن، دیاردەی دزێوی ناوچەگەرایی و شارگەرایی، یەكێتی و یەكگرتوویی لە نێوان دانیشتوانی كوردستان بشێوێنن. پێویستە ڕەچاوی ئەو ڕاستیە بكەین كە خەڵكی هەموو شارو گوندێكی نیشتمان تێكۆشەرو نەبەزن و هەموو لە خەبات و ڕاپەڕین لە بەرانبەر دەسەڵاتی دیكتاتۆردا هاوبەشن وزوڵم و بێدادی دەسەڵات، ڕوی لە هەموو ماڵ ودێ‌ و شارێكی كوردستان كردوە بە بێ‌ جیاوازی، هەر بۆیە هەموو هاوچارەنووسین و هیچ شارو گوندێكی نیشتمان جیاوازی نەبوەو نەكردوە لە ڕاپەڕین بۆ كۆتایی هێنان بە حكومەتی مرۆف كوژو كورد كوژی ئاخوندی.
هەروەها پێویستە پێوەندی و هاوكاری خەڵكی ڕاپەڕیوی كوردستان لە گەڵ شارەكانی دیكەی ئێران بە شێوەێكی تۆكمە بەردەوام بێ‌ و رێگە نەدەین ڕژیمی ئاخوندی و بەكرێگیراوانی كەلێن و جیاوازی لە نێوان نەتەوەكان لە ئێراندا پەرەپێ‌ بدەن. تێكۆشان و خەباتی تێكڕایی خەڵك لە ئێران و كوردستان بۆ ڕوخانی ئەو ڕژیمە ستەمگەرو دیكتاتۆرەو هێنانە دیی حكومەتی دیموكراتێك لە ئێراندایە كە مافی نەتەوەكانی ئێران دابین بكات.
لە گەڵ سڵاو درود بۆ رۆحی پاكی شەهیدانی راپەڕینی دژ بە ئیستبدای ئاخوندی
سەركەوتوبێ‌ ڕاپەڕینی تێكڕایی جەماور لە ئێران و كوردستان.
بڕوخی ڕژیمی دیكتاتۆرو ستەمگەری ئاخوندی.
سازمانی خەبات ی كوردستانی ئێران
سكرتێری گشتی
بابەشێخ حوسەینی
28ی خەزەڵوەری 1398 كۆچی خۆری
18ى نوامبری 2019

 
ڕێکه‌وت: 2019-11-19 10:53:02
به‌شی ( سکرتێری گشتی )





دیمانه

سیاسی