له‌سه‌رهێل 79
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
یادی سەروەران

سەروەری گەل: شەهید ئەحمەدی فاتمی
یادی سەروەران یادی شەهیدانە و هەموو دەمانە، یادی شادی وخەمانە.
لە شادیدا جێیان دیارە، بۆ خۆیان دەستیان لە ژیان بەردا، كە ژیانی سەربەرزانە بۆ گەل پێك بهێنن. چەكی شەرەفیان هەڵگرت كە شەرەفی گەل بپارێزن. ئەو شەهیدانە كە ژیانی كەم ماوەی خەباتیان پێ بە بایەختر بوو لە ژیانی درێژی ژێر دەستی و كۆیلەیەتی، دەستیان لە تەمەنی درێژی كۆیلەیەتی بۆ هەتا هەتایە بەردا. ئەو سەروەرانەی كە سەریان بەردە بازی رێگای ئازادییە و لافاوی خوێنیان، ڕوخێنەری كۆشكی بێدادیە، لە خۆ دەبوورن و لە مافی گەل نابوورن. دڵیان برینە، هێندەی بەرزایی كوردستان هیوایان بەرزە. هەر كام لەوانە بە لەش ئادەمیزادێكن، بەڵام بە هیواو ئامانج گەلێكن. بەڵێ ئەوانەی بۆ قازانجی گەل و دژایەتی ستەمگەران دێنە مەیدانی خەباتەوە، دەكەونە ڕێی هات و نەهاتەوە. دەبنە خەباتگێڕ و پێشمەرگە مەرگی خۆیان پێش مەرگی خەڵك دەخەن لە ڕێی ئازادی و بەختەوەری گەلی كورددا سەری خۆیان دادەنێن. ئەوانە یادیان زیندووە لە دڵاندا و لە بیر ناچن. كتێبی یادی سەروەران بە نۆرەی خۆی ئەركی یادیان لەسەر شان دادەنێ، كە دڵی زۆرتر بە یادی وان ئاوەدانتر دەكاتەوە، تا برا و خوشكانی كورد سەروەرەكانی خۆیان بناسن و بزانن چەندەن ئەو شێرە کچ وكوڕانەی كوردستان كە خۆیان فیدای كوردستان كردووە و بزانن كام ئاوەدانی زیاتر ئاوەدانن بە گیانی شەهیدانی سوور خەڵات. كام دێ و كام شار ڕۆڵەی زیاتریان پێشكەش كردووە بە كۆڕی شەهیدانی خەبات. كام دێ هەیە هێندەی ( دێی ساوان ) سەربەرزی ناو ئاوەدانیانی كوردستان بێت و هێندەی شەهید ناردبێتە ناو كۆڕی شەهیدانی خەباتەوە. كام دێ هەیە هێندەی نۆرە هەبێت لە گۆشەی یادی سەروەرانی سازمانی خەباتدا و هێندەی ناوكردبێ بە شەهیدەوە. بەڵێ ئەمڕۆش نۆرەی سەروەرێك لە سەروەرەكانی (ساوانە). شەهید ئەحمەد فاتمی ناسراو بە ( ساوان )ی، كوڕی عەبدوڵایە خەڵكی دێی ( ساوان ) لە بنەماڵەیەكی جوتێر لە دایك بوو. تا پۆلی یەكی ڕاهنمایی لە قوتابخانەی ساوان خوێند، پاشان لە بەهاری ساڵی 1362 دا هاتە ناو ڕیزی پێشمەرگەی سازمانی خەباتی کورستانی ئێرانەوە. لاوێكی ژیر و لە سەرەخۆ و بە باوەڕ بوو. دوای ڕاهێنان و بارهاتن بە ئەركی پێشمەرگایەتی شان بە شانی برا پێشمەرگەكانی لە بەرنامەكانی جەنگی پارتیزانیدا لە خۆی بردوو بەشدار بوو. لە ناو هاوەڵاندا، بە لاوێكی ژیر و بە باوەڕ دەناسرا. لە سەرەتای لاوییەوە ئارامی و لە سەرەخۆیی پیاوێكی گەڕاوە و خاوەن ئیحترام بوو لە ناو هەڤاڵان، زۆر جێی هیوا و هومێد بوو بۆ هەڵگرتنی ئەركی زیاتر لە شۆڕشی ڕەوای گەلەكەماندا. بە داخی گرانەوە لە ڕۆژی 12/گەلاوێژی/1363 دا لە دێی ( كەپرەسەن)، لە ناوچەی پاش ( ئاربابا)ی بانە، بە گوللەی تفەنگەكەی خۆی كە بە دەستیەوە دەرچوو برینێكی كاری هەڵگرت و لە كاتی ڕاگوێزتنیدا لقەكەی كەوتە بەر گەمارۆی دوژمنی داگیركەر و وەك ئاوی باران گوللەی تۆپ و خومپارە بە سەریاندا باری. شەهید ئەحمەد وەك پێشمەرگەیەكی ساغ ورەی بەرز بوو، دوای ڕزگار بوون لە هێرشی دڕندانەی دوژمن لە كاتێكدا كە بزەی شادمانی شەهادەت و سەڵامەت بوونی هەڤاڵانی لە سەر لێو بوو، گیانی پڕ لە ئیمانی خۆی بۆ كۆڕی شەهیدانی سازمانی خەبات، لە دێی ( سیسارگی سووركێو)، چۆوە باوەشی نیشتمانی خۆشەویستەوە...
هەزاران سڵاو بۆ شەهیدانی كوردستان و شەهید ئەحمەد
ڕێکه‌وت: 2020-08-02 20:21:59
به‌شی ( شه‌هیدان )





دیمانه

سیاسی