له‌سه‌رهێل 76
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
یادی سەروەران

سەروەرانی گەل: شەهیدان عومەر ڕەئوفی و نووری مورادی
ئەوانەی كە لە زانكۆی خەبات و تێكۆشاندا دەرسی فیداكاری فێر دەبن، چ باكیانە لە پێشكەش كردنی بەنرخترین سەرمایەی ژیانیان، تێرێژی خوێنی لەسەر كوردستان ڕژاویان ڕێگای خەباتی ڕزگاریخوازی گەلی نیشتمان بەشكراوی كوردی ڕوون كردۆتەوە و بەو پەڕی قارەمانەتیەوە تێکۆشاون. بۆ خەباتگێرێكی شەهید چ باشترە لەوە كە لە پێناو گەلە چەوساوەكەیدا شەهید دەبێت و وەڵامی پرسیار و ئەمری خودا دەداتەوە و لە ڕێی پارێزگاری لە نیشتمان و لە ئینسان و لە پێناو مافی چەوساوەكان چ ئەو پیاوانە كە لە
بەندیخانەكانی ڕژێمی دیكتاتۆری خومەینی دا دەڕزێنەوە و لە بەندەن و بن بەردان لە سەر پارێزگاری لە دروشمی وەحدەت دەكوژرێن و چ ئەو ژن ومنداڵەی بێ دیفاعانە كە بە تاوانی كورد بوون دەكوژرێن و تاڵان دەكرێن و پەڕیوەی هەندەران دەبن. هەموو تاڵی و ناتەواوی و تەنانەت مەرگیش قەبووڵ دەكا. چ شانازییەك بۆ شەهیدان كاك عومەر و كاك نووری بەرزتر لەوەیە كە مەرگێكی پڕ لە شەرافەت، پاش مەرگێكی پێشمەرگانە نەتەوەیەك هەناسە پڕ لە ئاخ وداخ و حەیفیان بۆ هەڵدەكێشێ و وەك ڕۆڵەیەكی خۆیان، وەك برایەكی خۆیان، وەك پارێزەری بوون و مانیان فرمێسكیان بۆ بڕێژن و لە هەمانكاتدا شانازیان پێوە بكەن. چ شانازییەك گەورەترە بۆ ئەو ئیبراهیمانەی ئەو چارەكە سەدەی دوای سەدەی بیستەمی وڵاتی كوردەواری كە بۆ خۆیان كوڕە جوانەكانیان، جگەرگۆشەكانیان، شەهید عومەر وشەهید نووری بەو زینەتی(تفەنگ و فیشەكدان) كە پاشای مرۆڤ و مرۆڤایەتی بۆ قوربانیەكانی كوردستانیان بە پێویست داناوە، بڕازێننەوە و بەرەو قوربانگاكان بیاننێرن. 
لە 10/ خەرمانی/1364 دا پێشمەرگەكانی سازمانی خەبات لە نێوان بەردەبووك و كانی سێو لەسەر جادەی بانە بۆ خێڵە ڕەش كەمینیان بۆ هێزەكانی ڕژێمی ئاخوندی داناوە. لە ساعەت 4/30 خولەكی ئێوارە دا شەڕ بە توندی دەست پێكرا لەو شەڕەدا زیاتر لە بیست كەس لە ئەفرادی دوژمن كوژران و بریندار بوون و 3 كەسیان لێ بەدیل گیرا و ماشێنێكی تۆیۆتای هەڵگری ئەفرادی دوژمن شكێندرأ. دوای كۆتایی هاتنی شەڕەكە دژمن ناوچەکەی دایە بەر تۆپ و خۆمپارە كە بە داخەوە بوو بە هۆی شەهید بوونی دوو برای هاوسەنگەر، عومەر رەئوفی و نووری مورادی. شەهید عومەر لاوێكی شۆڕشگێڕ و ئازاو بەڕاستی بە هەڵمەت بوو، ئازایەتی و فیداكاری شەهید هەڵمەت هاوتای ئازایەتی هەموو شەهیدەكانی دیكەی ساوان بوو. 
شەهید عومەر لە بنەماڵەیەكی ئایینی لە گوندی شەهیدانی بێشكەی قارەمانیەتی، گوندی ساوانی ناوچەی بانە لە دایك بووە. شەهید عومەر بەرەبەرە تەمەنی بەرز بۆوە بە یارمەتی باوكی خوێندن و خوێندنەوە و نووسین فێر بوو ژیری و ژیكەڵەیی و وردی و بیركردنەوە و ڕاپەڕین، هەروەك چۆن لەخوە تایبەتەیەكانی شەهید عومەر بوون، دەبوو ببنە ناوێك بۆ ئەو، هەر بەو هۆیەوە ناوی هەڵمەتی لێنرا كە بەڕاستی ناوەكەی پڕ بە پێستی بوو. شەهید عومەر بەرەو قوتابخانە كەوتە ڕێ لە دێ و لە شار درێژەی بە خوێندندا، تا كۆتایی دەورەی ناوەندی قوتابخانەو لەگەڵ تەمەنی كەمدا باوەڕی پێشمەرگانەی هانی دا كە پەیوەندی لەگەڵ ڕێكخراوە نهێنییەكانی خەبات بگرێ. لەوەش زیاتر هەنگاوی هەڵێنایەوە و بە پێی پەروەردەیی بنەماڵەیی و دژایەتی دوژمنانی ئازادی ڕاستەوخۆ هاتە ڕیزی پڕ لە شانازی پێشمەرگایەتی. ماندوو نەبوون و هەوڵ و تەقەلای بێوچانی بوو بە هۆی ئەوەی پلە پلە بچێتە سەرێ هەتا بوو بە ئەندامی ڕێكخراوەی شارستان و بەرپرسی ناوچەی (وەزەنێ)....
شەهید نووری مورادی:
هەڵكەوتووی ڕیزەكانی خەبات و شۆڕە لاوی خۆڕاگری ناو سەنگەر. تێكەڵاوێك بوو لە خۆشەویستی و ئازایەتی و لەسەرە خۆیی. شەهید نووری لە ناو دڵی پێشمەرگەكاندا جێگەی تایبەتی هەبوو و لە هەر جێیەك باسی ئەخلاق و ئینسانیەت و لە سەرەخۆیی بكرایە شەهید نووری بۆ نمونە ناوی دەبرا. شەهید نووری پەروەردەی بنەماڵەیەكی زەحمەتكێش بوو. هەژارانی كوردستان بە تێكە خۆشەویستی ئەو بوون دەیویست زیاتر گژەبای ماڵ و ێرانكەری بێگانە كە پڕی حەسانەوەی نەتەوە ژێر چەپۆكەكەمان نەڕووخێنێ. دەی هەویست ئەوەی دەكرێ و ئەوەی بۆخۆی دەیكا هەموو لە قازانجی گشتی شۆڕشی كوردستاندا بێت. شەهید نووری ژیرێكی بە بیر بوو لە نووسراوەكانیدا، لە دانیشتن و قسەكانیدا هاوبیرانی خۆی بەرە و ڕاستی هان دەداو ئەو شێوەی كە پێی وابوو كەڵكی شۆڕشی تێدایە، بە هەموانی دەگووت بیری دەكردەوە و هەولێ زانستی دەدا. شەهید نووری لەگەڵ ئەوەدا تەمەنی لە 17 ساڵ تێنە پەڕیبوو بۆ چوون و لێزانینی لە پیاوێكی بە تەمەن دەچوو. لەسەر كارو چالاکی لێكدانەوەی باشی هەبوو. نووسراوەكانی پاش ئەو مەرگە پڕ لە شانازییەی رێنوێنی هاوبیران و هاوسەنگەرانی ئەون.
شەهید نووری وەك زۆربەی كوڕە كوردەكان بەرەو خوێندن بەڵام بە زمانی بێگانە وەرێكەوت. تامەزرۆی فێربوونی خوێندنەوە و نووسینی كوردی بوو بەڵام لەبەر ئەوەی لە شاری بانەدا دەژیا و فەرهەنگی داسەپاوی فارسی دەچوو بەڕێوە، نەیتوانی زمانی زگماكی خۆی کە کوردیە فێربێت.
شەهید نووری لەساڵی 1360 دا هاتە ڕیزی پێشمەرگەكانی خەباتەوە و بە تاسەیەكی زۆرەوە ئەركی پێشمەرگایەتی بە جێ دەگەیاند. زۆر شوێنی كوردستان جێگەی قارەمانیەتی و ئازایەتی ئەو بوون، لە شەڕەكانی دوژمنی داگیركەر و دژی گەلی دا. بەڵام ئەو تێكۆشەرانەی كە هیچ كات لە بیر ناچنەوە و لە باسكردنیان دڵی دایكان هەڵدەقڕچێ، بە داخەوە لە ڕۆژی 10/خەرمانانی/1364 هەتاوی دا لە بەرزاییەكانی بەردە بووك دوای شەڕێكی قارەمانانە بە هۆی خۆمپارە بارانی دوژمن شەهید بوون و درێژە پێدانی ڕێگای خەباتیان بە هاوبیرانی بە ئەمەکیان سپارد.
بەرزوو بەڕێز بێ لە شەهیدان، كە دەرسی خۆبەخت كردن بۆ دایكی هەموومان كوردستان بە دیاری بە جێهێشت




ڕێکه‌وت: 2020-08-31 10:32:47
به‌شی ( شه‌هیدان )





دیمانه

سیاسی