له‌سه‌رهێل 75
سێ‌شه‌مه 8 ره‌زبه‌ر 2720
سازمانی خه‌باتی کوردستانی ئێران
نەوید ئەفکاری، زۆرانبازی ئێرانی لەسێدارە درا

سەرەڕای فشارە نێونەتەوەییەكان، داواكاری زۆری کەسایەتیە سیاسیەكان، ڕێكخراوەكانی پارێزەری مافی مرۆڤ و یەکێتی جیهانی یاریزانان، ئەمڕۆ شەممە ڕێكەوتی 22ی خەرمانان، نەوید ئەفکاری زۆرانباز و وەرزشوانی ئێرانی لەسێدارە درا. 
کازمی موسەوی، سەرۆکی گشتی دادوەری پارێزگای فارس سەرەڕای پشتڕاستكردنەوەی ئەو هەواڵە، ووتی: ئەم حوکمە بەئامادەبوونی خانەوادەی نەوید ئەفکاری و خانەوادەی کوژراوەكە جێبەجێ کراوە. 
نەوید ئەفکاری، سەرەتا بەتاوانی بەشداریکردن لە خۆپیشاندانەكانی ساڵی 96 گیرا، و دواتر بەهۆی شاهێدی ناڕاستی کەسێک بەناوی سەعید ئەرجومەند دەشتەکی، تاوانی کوشتنی ئیتڵاعاتیەکی بەسەردا سەپێندرا، دواتر لەژێر شكەنجەدا، نەوید ناچاركرا دان بەتاوانەكەی دا بنێ‌.
شایانی ئاماژەیە دو کوڕی دیکەی خانەوادەی ئەفکاری بەناوەكانی وەحید و حەبیب، کە وەرزشوانن و لەكاتی خۆپیشاندانەکان دا گیراون، سزای قامچی و زیندانیان بەسەردا سەپێندراوە. 
هەر لەو پێوەندەدا، بەشێكی زۆر لە خەڵکی ئێران و کەسایەتی سیاسی و وەرزشوانی ئەو وڵاتە، هەڵوێستی توندیان گرتووە و لەداردانی نەویدیان مەحكوم كردووە.
ئەمەش دەرخەری ئەوەیە كە ڕژیم لەلایەن ئەو کەسانەوە هەست بە مەترسی دەکات و ڕۆژانە هەزاران قاچاقچی مەوادی هۆشبەر بەئازادی و بەبڕیاری خودی ئیتڵاعات لەنێو لاوانی وڵات دا مەوادی هۆشبەر بڵاو دەكەنەوە.
ڕۆژانە گەنج و لاوی ئێران و بەتایبەتی کوردستان، بەبێ تاوان و بۆ چاوترسێنی خەڵکانی دیکە لەسێدارە دەدرێن، ئەمانە هەموو دەرخەری ئەوەن كە ڕژیم لەژێر چ فشارێك دایەو لەپێناو مانەوەی دا پەنا بۆ هەر كارێك دەبات....
ڕێکه‌وت: 2020-09-12 21:01:10
به‌شی ( هه‌واڵی ئێران )





دیمانه

سیاسی